„ქართული ოცნების“ გადაწყვეტილება - პრემიერის განცხადება

გუშინდელი რეზონანსული გადაწყვეტილება დღეს პრემიერმა კიდევ ერთხელ განმარტა.
მთავრობის მეთაური ოპონენტებს საზოგადოების მიზანმიმართულად შეცდომაში შეყვანაში ადანაშაულებს და ხაზს უსვამს, რომ ევროკავშირის წევრობაზე მოლაპარაკების გახსნის საკითხის 2028 წლამდე დღის წესრიგიდან მოხსნა ევროინტეგრაციის პროცესის შეჩერებას არ გულისხმობს. მმართველი გუნდი პირობას დებს, რომ გაგრძელდება ასოცირების და თავისუფალი ვაჭრობის შეთანხმების პუნქტების შესრულება. საგარეო პოლიტიკის პრიორიტეტად 2030 წლისთვის ევროკავშირში გაწევრიანება ცხადდება. „ქართულ ოცნებაში“ აქცენტს აკეთებენ იმ გარემოებაზეც, რომ 2028 წლამდე შეჩერებული პროცესი ცალმხრივია და ევროკავშირიდან შესაბამისი შეთავაზების შემთხვევაში საქართველო გაწევრიანებაზე მოლაპარაკებებს გახსნის. „ქართული ოცნების“ გადაწყვეტილებას საკმაოდ მძიმე საერთაშორისო გამოხმაურება მოჰყვა. ევროკავშირის ელჩმა დღეს ბრიუსელიდან კონკრეტული ზომების მიღებაც არ გამორიცხა. მწვავე იყო ამერიკის ელჩის ტონიც.
ჰერჩინსკის განცხადებას მმართველი პარტია დეზინფორმაციის კამპანიის ნაწილად განიხილავს. არ არის გამორიცხული, რომ ევროკავშირის წარმომადგენელი საგარეო უწყებაში დაიბარონ. ხელისუფლების გადაწყვეტილებას გაემიჯნა ქართველი დიპლომატების და საგარეო საქმეთა სამინისტროს თანამშრომლების ნაწილიც. ბულგარეთში საქართველოს ელჩმა თანამდებობა დატოვა.

ეწვიეთ ჩვენს საიტს - https://1tv.ge/
მოიწონეთ ჩვენი გვერდი -   / 1stchannel.1tv.ge  
გამოიწერეთ ჩვენი არხი -    / georgianpb  
ვიდეო წარმოადგენს საზოგადოებრივი მაუწყებლის საკუთრებას.
მისი გავრცელება შეგიძლიათ მხოლოდ ბმულის გაზიარებით.
დაუშვებელია მასალის ჩამოტვირთვა და სხვაგან ატვირთვა,
ამ შემთხვევაში მაუწყებელი უფლებას იტოვებს მიმართოს შესაბამის ზომებს.