【星級斜槓族】《愛．回家》英進招浩明專訪 棄高薪銀行工勢入娛圈 屢敗屢戰依然決心追夢

無綫處境劇《愛．回家之開心速遞》由2017年開播至今，收視高企，近年更一星期播足7日，成為港人追看的處境劇。而劇中飾演網店「尋寶圖」職員「英進」的招浩明，亦憑劇集成功入屋；雖然他在劇中只是辦公室的小職員，但現實中的招浩明原來曾任職投資銀行及空中服務員，更是屢獲殊榮的魔術師，非常厲害。

嫌辦公室工作沉悶
招浩明曾就讀名校喇沙書院，讀至中二移居美國，畢業於加州州立大學商業及財務管理學系，更曾擔任摩根大通的實習生。從事高薪厚職的投資銀行工作，讓別人稱羨，但招浩明卻毅然放棄，「我本身唔太喜歡朝9晚5嘅工作，同埋成日對住啲數真係唔啱我，日日坐喺度好辛苦，老細又係咁畀工作我；我每朝要check email，未做完手頭上工作，老細已經畀新嘢我做，真係好疲勞。」

一度「衝上雲霄」投考空少
放棄沉悶的銀行工作，招浩明堅持選擇走演藝路。談到對表演的熱情，他即興奮道︰「其實我細細個已經好鍾意表演，當時我睇電視，會將電視較做靜音，跟字幕讀，好似自己演緊戲咁。」招浩明自言12、13歲時已經想入行，更曾寫自薦信給TVB，雖然不獲回覆，但他沒有放棄入行的念頭，嘗試參加《超級巨聲》、《魔法擂台》等比賽，「我仲曾經參加過亞視嘅《我要上ATV春晚》，去到決賽，但最後都係不了了之。曾經亦有個美國電台舉辦DJ選拔，當時好僥倖考到，但最後都無咩節目畀我做。」

多次參賽但成績未如理想，招浩明也有打算放棄的一刻，「我第一次考藝員訓練班，佢要求我講一個笑話/感人故事，我當時揀咗感人故事，將故事印埋出嚟，甚至貼喺淋浴間，背到滾瓜爛熟。但一去到試場，我就緊張到唔記得晒。當時覺得自己準備咗咁多，但都做唔嚟，可能自己真係唔適合（娛樂圈），所以就去考空中服務員。」

盡力做好自己 不與人比較
「空中飛人」的生活多姿多彩，招浩明表示他曾在外地表演魔術，獲得莫大的滿足感，「我喺加德滿都玩魔術畀小朋友睇，變啲糖、朱古力畀他們食。我聽唔明白佢哋講咩，但佢哋好似好興奮，我鍾意呢種帶畀人歡樂嘅感覺。」但最後為何會「落地」再投考TVB？他憶述︰「其實面試失敗之後，我唔想再見到TVB嘅嘢，會諗起面試失敗嘅回憶，但見到演員招募廣告，我就覺得心郁郁。當時真係諗住試吓就算，無咩準備，但反而最後成功咗。」

加入TVB後，招浩明的最為人熟知的角色相信是《愛．回家》的英進，但其他角色多為閒角，面對着同期訓練班的周嘉洛已晉升主角行列，招浩明說︰「我唔會灰心，每個人都有各自嘅步伐同時間線，所以我都係隨緣，只要自己盡咗力就得，永遠唔好同其他人比較。」

冀發展寵物事業
另一方面，招浩明除了是一名演員，同時也是一名魔術師，他坦言若然當時未能入行，現在可能會以魔術表演維生。而他與魔術淵源從小已開始，「細細個爸爸玩過一個魔術，睇完我覺得好神奇，所以嘗試去搵點樣做，就慢慢建立咗興趣。當時有間百貨公司有魔法櫃位，我成日都去睇有咩新嘢玩㗎。」及後，他考進美國Magic Castle，與不同魔術師交流，更開始參加不同比賽，屢獲殊榮。

招浩明現時雙線發展演員及魔術事業，但他原來已有新想法，期望能夠三線發展。「我覺得香港依家好需要dog walker，專門幫人放狗，因為主人未必有時間，所以可能會搵朋友、工人姐姐放狗，但佢哋好多都係好唔專心咁撳電話，唔係真係放緊狗。同時又有好多『寵物友善餐廳』，但其實入面完全唔係寵物友善，只係用啲寵物嚟幫助生意，所以我好想做一啲幫到寵物，又幫到主人嘅事。」

招浩明身分多多，他亦鼓勵大家發掘自己更多可能性及發展空間。不過他強調一定要把書讀好︰「讀書唔只書本上嘅知識，仲有待人接物等溝通技巧；同埋讀書讀得好你可以有選擇權，可以做其他職業，個腦一直都喺度嘛。聰明人都唔一定要做律師，讀醫生、國際金融呢啲科目，可以喺自己有興趣嘅範疇上面做得最好。」

#CTgoodjobs #星級斜槓族 #斜槓族 #slash #slasher #招浩明 #英進 #愛回家 #開心速遞 #處境劇 #演員 #魔術師 #空少 #投資銀行

策劃、記者：Crystal
攝影、剪接：Kenneif
監製： Philess、 Winsome