Скачать или смотреть अधिक मास - पुरुषोत्तम मास भजन गीत

अधिक मास - पुरुषोत्तम मास गीत
विदर्भातील जुन्या पिढीतील प्रख्यात कीर्तनकार वै. सौ. लीलाताई कुलकर्णी, वाशीम , महाराष्ट्र यांनी सुमारे ८० वर्षांपूर्वी लिहिलेले हे गीत आज अधिक मासाच्या सुरुवातीला प्रसिद्ध करतांना अतिशय आनंद होत होत आहे. हे गीत ऐकतांना श्री व्यंकटेशाची मानसपूजा केल्याचे समाधान मिळेल. श्रीकृष्णार्पणमस्तु!

संकलन आणि संकल्पना - ह.भ.प. श्री. श्याम देशपांडे , अमरावती
गायन- सौ. अपूर्वा हृषीकेश देशपांडे आणि सौ. रेणुका शशांक देशपांडे, पुणे
ध्वनिचित्रमुद्रण आणि संपादन - श्री. हृषीकेश संजय देशपांडे, पुणे

Adhik Maas Marathi Song written 80 years back by Late Sau. Leelatai Kulkarni, Washim, Maharashtra

॥श्रीकृष्ण प्रसन्न॥
पुरुषोत्तम मासाचे गाणे
आला हो पुरुषोत्तम मास
आला हो पुरुषोत्तम मास॥धृ॥
त्रयवर्षी हा नेहमी येई
या मासाची महती पाही
विष्णूपूजन या मासी करिता
पुरवी कामनेस॥१॥आला हो..
मासारंभी हरिस्थापना
करुनि पुजावे लक्ष्मीरमणा
एक मास हे व्रत आचरिता
देतो मुक्तीस॥२॥आला हो...
प्रभात काळी नित्य उठावे
शुचिर्भूत हे मन करावे
भक्तिभावे भूपाळी गाउनि
उठवावे प्रभुस॥३॥आला हो.
गंगास्नान नित्य करावे
श्रीहरिचे मनी ध्यान धरावे
स्नान होता अर्घ्य द्यावे
नित्य आदित्यास॥४॥आला..

शुचिर्भूत ते वस्त्र नेसुनी
भक्तिआसने दृढ बैसोनी
डोळे मिटुनी ध्यानि आणावे
लक्ष्मीकांतास॥५॥आला...
सावळी तनू नयन मनोहर
दृढ ठेवावी दृष्टि समोर
चरणांगुष्ठा पासुनी पहावे
विष्णु स्वरुपास॥६॥आला
चरणांगुष्ठी गंगास्नान
आरक्त तळव्यावरी भूषण
ध्वज वज्रांकुश कमळरेखा
चिन्हे तळव्यास॥७॥आला
सुंदर मोहक युग्म पाउले
लक्ष्मीला जे बहु आवडले
भक्त गणांचे शिर ते झुकले
विष्णू पादास॥८॥आला हो..
दोन्ही पोटर्या सरळ शोभती
वर्तुळाकार गुढघे वरती
निर्मळ मोहक गोंडस जान्हू
शोभे त्या हरिस॥९॥आला हो..
स्वच्छ कटीला असे पितांबर
निर्या ज्याच्या पदांगुष्ठावर
रत्नजडित ती कटी मेखला
शोभे हो कटिस१०॥आला हो...
नाभीमध्ये कमळ उगवले
ब्रह्मदेव जेथुनी जन्मले
उदरामध्ये साठविले हो
ज्याने ब्रह्मांडास॥११॥आला हो.
वक्ष:स्थळिचा मान केवढा
लत्ताप्रहार भृगुने केला
श्रीवत्सलांछन खूण म्हणोनी
मिरवी भूषणास॥१२॥आला...
कंठ शंखापरी शोभतो
कौस्तुभ मणी कंठि शोभतो
मंजुरि माळा घातली गळा
मान तुळशीस॥१३॥आला हो..
चतुर्भुज हा नटला श्रीहरी
शंखचक्र ते ऊर्ध्वकरि धरी
गदा पद्म ते अधोकरासी
शोभे हो हरिस॥१४॥आला हो..
मुख चंद्रमा हरिचा बघता
हरपुनि जाई देह ममता
हनूवटी अन् अधर चिमणे
कुंदकळ्या दिसत
दंत हे कुंदकळ्या दिसत॥१५॥
नासिग्राला रावे बघुनी
लाजत लाजत जाति पळुनी
विशाल मोहक नेत्र बघुनी
लज्जा हरिणीस
वाटते लज्जा हरिणीस॥१६॥
भुवया प्रभुच्या धनुष्याकार
दीर्घ कानी शोभे कुंडल
विशाळ भाळी गंध केशरी
शोभे हो हरिस॥१७॥आला हो..
कुरळ केश हो मस्तकि असती
मुकुटाला जे शोभा देती
असे आणावे रूप सावळे
प्रभुचे ध्यानास॥१८॥
ह्रदयस्थानी प्रभुला स्थापुनी
पंचामृत ते स्नान घालुनी
शुद्धोदक ते वरी घालुनी
वस्त्र नेसण्यास
द्यावे वस्त्र नेसण्यास॥१९॥
यज्ञोपवित गळा घालुनी
चरणांगुष्ठी गंध लावुनी
विशाळ भाळी गंध केसरी
लावा हो हरिस॥२०॥आला हो.
तुलसी माला गळा घालुनी
कमळपुष्पे करी देउनी
शुभ्रकमळ मग शिरी वाहुनी
वंदावे प्रभुस॥२१॥आला हो..
सुचित्ताच्या करा अक्षता
वाहता वारी प्रभू आपदा
कामक्रोध हा धूप जाळुनी
विवेक ज्योतीस
उजळवा विवेक ज्योतीस॥२२
रंग वल्लिका त्वरे काढुनी
त्रिगुणाची अडणई ठेवुनी
शांतिताट त्यावरि ठेऊनी
बसवा भोजनास
प्रभूला बसवा भोजनास॥२३॥
मीठ लोणचे कोशिंबीरी
चटण्या पंचामृत कुरडई
वडे भजे पापड सांडगे
वाम भागास
वाढावे वाम भागास॥२४॥आला
तर्हे तर्हेच्या भाज्या वाढा
डाळि मोकळ्या उसळी सगळ्या
सांभार्याला वाटी ठेवा
दक्षिण भागास॥२५॥आला हो..
वरण भात,साखर भात
नाना परिचे मसाले भात
दही भात तो मागुनि ठेवा
प्रभुस वाढण्यास॥२६॥आला..
पुरणपोळी,सांजापोळी
जिलबी,बुंदी आणि सांजोरी
लाडु,घारगा,घृत खिरीवर
वाढा हो प्रभुस॥२७॥आला हो..
थंड जलाने झारी भरुनी
प्रभुरायाला पिण्यास देउनी
तृप्ती ढेकर प्रभुने देता
द्यावे तांबुलास॥२८॥आला हो..
एक लक्ष प्रदक्षिणा करावी
जीव दक्षिणा प्रभुला द्यावी
पंचप्राणांचे करुनि निरांजन
ओवाळा हरिस॥२९॥आला हो.
एक मास हे व्रत करावे
निराहारी नित्य रहावे
किंवा भोजन नक्त करूनी
फल आहारास
घ्यावे फल आहारास॥३०॥i
असत्य भाषण कधि न करावे
कठोर भाषण वर्ज्य करावे
ब्राह्मण भोजन नित्य करोनी
द्यावे दानास॥३१॥आला हो..
सुवासिनीला वायन द्यावे
सौभाग्याचे वाण लुटावे
घारगे अनारसे तीस,तीन हो
द्यावे ब्राह्मणास॥३२॥आला हो..
यथासांग हे व्रत आचरिता
भक्तीभावे प्रभुसी पुजिता
प्रसन्न होउनी रमारमण तो
पुरवी कामनेस॥३३॥आला हो..
श्रीगोपालकृष्ण भगवान की जय