Скачать или смотреть ចំណុច ១០ យ៉ាងមនុស្សមិនសប្បាយចិត្តចូលចិត្តធ្វើ | 10 Things Unhappy People Practice Everyday

ទំនាក់ទំនងបញ្ចូលសម្លេងផ្សាយពានិជ្ជកម្ម Mobile/ABA/AC: 012 649 534 (WhatsApp/Telegram)

នៅក្នុងវីដេអូនេះ ខ្ញុំនឹងចែករំលែកពី ទម្លាប់ ១០យ៉ាងដែលមនុស្សមិនសប្បាយចិត្តចូលចិត្តធ្វើជាជាប្រចាំ។ តោះដើម្បីកុំឲ្យខាតពេល សូមយើងស្តាប់ទាំងអស់គ្នា៖
• ទី១៖ អ្នកគឺជាមនុស្សម្នាក់ដែលតែងតែប្រើប្រាស់ការរស់នៅសព្វថ្ងៃដើម្បីផ្គាប់ចិត្តអ្នកដទៃ។ ស្តាប់ការរៀបរាប់របស់អ្នកដទៃ ច្រើនជាងជឿលើខ្លួនឯង។ មានចិត្តស្ទាក់ស្ទើច្រើន តែមិនស្ទាក់ស្ទើក្នុងការទទួលយកគំនិតដុលរបស់អ្នកដទៃមកដាក់ក្នុងខ្លួននោះឡើយ។
• ទី២៖ អ្នកគឺជាមនុស្សម្នាក់ដែលមានសុទ្ធតែការភ័យខ្លាចនៅក្នុងខ្លួន ខ្លាចការទិះទៀនរបស់អ្នកដទៃ ស្តាប់យោបល់អ្នកដទៃខ្លាំង តែមិនទុកចិត្តខ្លួនឯងទាល់តែសោះ។
• ទី៣៖ អ្នកគឺជាមនុស្សដែលផ្សារភ្ជាប់ខ្លួនឯងជាមួយការនិយាយបណ្តុះបង្អាប់ខ្លួនឯង និយាយតែពីភាពអវិជ្ជមានពីខ្លួនឯង និយាយថាខ្លួនឯងអន់ មិនចេះ ធ្វើមិនកើត ស៊ីត្រាវស្ទើតែមិនលោះថ្ងៃ។ល។ នៅពេលលើកពីភាពអវិជ្ជមាន ឬឈ្មោះរបស់នរណាម្នាក់ដោយមិនមានវត្តមានរបស់អ្នកនោះ ពិតណាស់នោះគឺជារបៀបនិយាយដើមដែលអ្នកមិនបានដឹងថាកំពុងតែស៊ីត្រាវ ហើយអ្នកនៅជិតអ្នកក៏សុំស៊ីពីរបីមាត់បន្ថែមដែរដោយគិតថាឆ្ងាញ់។ ទាំងអស់នេះគឺជាជញ្ជាំងដែលអ្នកបង្កើតឡើងខ្លួនឯងដោយមិនបើកទ្វារទទួលយកឱកាសថ្មីៗនោះឡើយ។ អ្នកអាចនិយាយថាខ្ញុំនៅក្មេងពេក គ្មានបទពិសោធន៍ ខ្ញុំចាស់ហើយមិនដឹងធ្វើអីទៀតទេ ទុកឲ្យក្មេងៗគេធ្វើចុះ។ ជីវិតគឺបានត្រឹមតែរស់តែមិនសូវជាមានន័យ មិនបានដឺងថាចង់បានអ្វីពិតប្រាកដនោះឡើយ ធ្វើការគឺដើម្បីតែធ្វើការ។ និយាយឲ្យចំគឺគ្មានគោលដៅនៅក្នុងជីវិត!
• ទី៤៖ អ្នកគឺជាប្រភេទមនុស្សខ្លះកន្លះកែវ។ ការមើលឃើញបែបនេះ បើទោះជាអ្នកមានផ្ទះ មានរថយន្ត មានម៉ូតូ មានសញ្ញាប័ត្រ សញ្ញាឃើញ មានគ្រួសារ មានការងារធ្វើ មានមុខរបរហើយក៏ដោយក៏អ្នកនៅតែនិយាយថាខ្ញុំខ្វះនេះ ខ្ញុំខ្វះនោះដែរ។ មើលឃើញទៅអ្នកដទៃគេមានច្រើនជាងខ្លួនរហូត។
• ទី៥៖ អ្នកគឺជាមនុស្សដែលអនុញ្ញាតិឲ្យអតិតកាលជាអ្នកដឹកនាំ ដោយមិនអាចទុកចោល ឬបំភ្លេចចោលនូវភាពសោកសៅ ឬភាពអវិជ្ជមានពីអតីតកាលបានឡើយ ហើយអនុញ្ញាតិឲ្យវាចូលមករុករានក្នុងជីវិតរបស់អ្នករាល់ថ្ងៃដើម្បីបន្លាច និងឲ្យវាក្លាយទៅជាអ្នកដឹកមុខ ហើយជាអ្នករៀបចំផែនការអនាគតរបស់អ្នកថែមទៀត។
• ទី៦៖ អ្នកគឺជាមនុស្សដែលមិនខ្វល់ពីសុខភាព គិតតែពីធ្វើការ រកស៊ី រកលុយតែមួយមុខដោយមិនបានយកចិត្តទុកដាក់ធ្វើលំហាត់ប្រាណឲ្យបានទៀងទាត់។ សកម្មភាពរស់នៅប្រចាំថ្ងៃជាច្រើនរបស់មនុស្សគឺបង្ករឲ្យមានបញ្ហាជាច្រើនដល់សុខភាព ជាពិសេសនៅពេលដែលអ្នកមានវ័យ ៤០ឡើង ឬជាវ័យមានគ្រួសារ ត្រូវចិញ្ចឹមកូន មានបន្ទុកក្នុងគ្រួសារច្រើន។ ការថែទាំសុខភាពឲ្យបានល្អនៅវ័យក្មេង រួមផ្សំនឹងកត្តាយកចិត្តទុកដាក់ថែសុខភាពបន្ថែមនៅវ័យកណ្តាល និងវ័យចាស់ នឹងធ្វើឲ្យអ្នកទទួលបានសុខភាពល្អ និងមានអាយុយឺនយូរ។
• ទី៧៖ អ្នកតែងតែខ្វល់ខ្វាយជាប្រចាំ ខ្វល់ខ្វាយមិនដឹងមុខ ខ្វល់ខ្វាយមិនឈប់ ជួនរឿងខ្លួនឯង ជួនរឿងរបស់អ្នកដទៃ អូសយកមកដាក់នៅក្នុងជីវិតរបស់អ្នកទាំងអស់។ រៀនដាក់ចុះនូវកិច្ចការណាដែលមិនចាំបាច់ចោលខ្លះ ឲ្យរបស់ដែលអ្នកមិនប្រើប្រាស់ទៅអ្នកដទៃខ្លះ ចែកទានឲ្យបានច្រើន ឈប់ស៊ីត្រាវ ឈប់ខ្វល់ខ្វាយច្រើនទៀតទៅ។ ស្វែងរកភាពរីករាយ និងកសាងសុភមង្គលក្នុងគ្រួសារឲ្យបានច្រើនវិញប្រសើរជាង។
• ទី៨៖ អ្នកគឺជាមនុស្សម្នាក់ដែលមិនចេះអត់ឱនទោសឲ្យនរណាម្នាក់ងាយៗនោះឡើយ អ្នកអនុញ្ញាតិឲ្យកំហឹងតាមតោងអ្នកជាប់ជានិច្ច។ អ្នកនិយាយថាខ្ញុំមិនអាចអត់ឱនឲ្យម្នាក់ហ្នឹងបានទេ អ្នកនិយាយថាបើគេធ្វើយ៉ាងម៉េចដាក់ខ្ញុំ ខ្ញុំនឹងធ្វើយ៉ាងនោះដាក់អ្នកដែរ។ នេះគឺជាឃ្លា ឬប្រយោគដ៏ពេញនិយមរបស់មនុស្សដែលចងគំនុំ មិនចេះស្រាយ ឬមិនចង់ស្រាយ។ ដោះវាចេញ កុំចងវាទុកនៅក្នុងជីវិតអ្នករហូតអី ខ្ញុំយកវាដាក់តាមខ្លួនរហូតដល់ក្លាយជាដីវិញអី។ មានមនុស្សច្រើនណាស់ត្រូវការសេចក្តីស្រឡាញ់ និងការអត់ឱនទោសដូចជាអ្នកដែរ។
• ទី៩៖ អ្នកគឺជាមនុស្សដែលត្រូវតែធ្វើឲ្យបានល្អជាដាច់ខាត បើមិនល្អគឺមិនធ្វើ។ មនុស្សប្រភេទនេះគេហៅថាមនុស្សល្អឥតខ្ចោះ គាត់តែងតែរង់ចាំឱកាសល្អឥតខ្ចោះចូលមកដល់ តែសូមចាំថាគ្មានឱកាសឥតខ្ចោះណានឹងរត់ចូលមកក្នុងជីវិតរបស់អ្នកនោះទេ។ ចាប់ផ្តើមធ្វើពីចំណេះដឹងតិចតួចដែលអ្នកមានស្រាប់ ហើយកែខៃវាឲ្យកាន់តែប្រសើរឡើង។ ចាប់ផ្តើមធ្វើជាមួយនឹងធន់ធានដែលអ្នកមានស្រាប់ កុំរង់ចាំទាល់តែអ្នកមានរបស់នេះ ឬរបស់នោះដើម្បីអាចចាប់ផ្តើមបាននោះឡើយ។ ចាប់ផ្តើមពេលនេះគឺជាពេលវេលាដ៏ល្អបំផុត។ ឈប់និយាយថាស្អែក សប្តាហ៍ក្រោយ ខែក្រោយ ឬឆ្នាំក្រោយទៀតទៅ។ ឥឡូវនេះជិតដាច់ឆ្នាំហើយ អេដាច់ឆ្នាំហើយណា ឈប់អូសក្រឡាទៀតទៅសម្លាញ់។ ពេលវេលាដែលល្អបំផុតដែលអ្នកត្រូវចាប់ផ្តើមគឺពេលនេះឯង!!!!
• ទី១០៖ អ្នកគឺជាមនុស្សម្នាក់ដែលប្រាប់ខ្លួនឯងថាអ្នកគឺជាមនុស្សបែបនេះតាមរយៈកិច្ចការដែលអ្នកធ្វើ។ អត់ទេៗ អ្នកមានសមត្ថភាពច្រើនជាងការគិតរបស់អ្នកឆ្ងាយណាស់។ ឈប់និយាយថាអ្នកគឺជាម្នាក់នេះតាមរយៈកិច្ចការដែលអ្នកធ្វើទៀតទៅ។ មនុស្សជាច្រើនរកមិនឃើញគុណតម្លៃ ឬការចង់បានរបស់គាត់ឲ្យពិតប្រាកដនោះទេដែលគេហៅថា អ៊ីកៃ។ មនុស្សភាគច្រើនធ្វើការងារទាំងខុសជំនាញ និងត្រូវជំនាញដើម្បីតែរកកម្រៃដើម្បីទិញអាហារមកដាក់លើតុឲ្យគ្រួសារតែប៉ុណ្ណោះ ឬហៅម្យ៉ាងទៀតជាភាសាអង់គ្លេសថា Skills to Pay the Bill!

ក្រោយពីបានស្វែងយល់ពីចំណុចទាំង ១០នេះរួចហើយ តើអ្នកត្រៀមខ្លួនដើម្បីចាកចេញពីភាពអវិជ្ជមាន ឬចង់ក្លាយជាមនុស្សមានភាពរីករាយជាងមុនដែរឬទេ? ប្រសិនបើអ្នកស្តាប់ Podcast នេះរួចហើយ អ្នកពេញចិត្ត សូមចែករំលែកវាទៅកាន់មិតភក្តិផ្សេងទៀតនៅលើបណ្តាញសង្គមរបស់អ្នកផង! ខ្ញុំសូមជូនពរអ្នកឲ្យក្លាយជាមនុស្សថ្មីប្រកបដោយភាពវិជ្ជមាន!