Скачать или смотреть (ប្រសាសន៍ដើម)៖ មហាសន្និបាត UN, សម្តេចតេជោ ហ៊ុន សែន៖ កម្ពុជាក្លាយជាប្រទេស មានអត្រាប្រជាជនទទួល...

មហាសន្និបាត UN, សម្តេចតេជោ ហ៊ុន សែន៖ កម្ពុជាក្លាយជាប្រទេស មានអត្រាប្រជាជនទទួលវ៉ាក់សាំងជំងឺកូវីដ១៩ ខ្ពស់ជាងគេក្នុងកម្រិតសកល ដែលអាចបើកប្រទេសបានពេញលេញឡើងវិញ (Video inside)

(សហរដ្ឋអាមេរិក)៖ ថ្លែងក្នុងមហាសន្និបាតអង្គការសហប្រជាជាតិ (UN) លើកទី៧៧ នាទីក្រុងញ៉ូវយ៉ក សហរដ្ឋអាមេរិក នៅយប់ថ្ងៃទី២៣ ខែកញ្ញា ឆ្នាំ២០២២ (ម៉ោងនៅកម្ពុជា) សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងពីភាពជោគជ័យរបស់កម្ពុជា ដែលបានអាចបើកដំណើរការប្រទេសឡើងវិញ បានពេញលេញចាប់តាំងពីចុងឆ្នាំ២០២១មក តាមរយៈយុទ្ធនាការចាក់វ៉ាក់សាំងជំងឺកូវីដ១៩ ជូនប្រជាពលរដ្ឋដោយឥតគិតថ្លៃ។

ក្នុងឱកាសនោះ សម្តេចតេជោ ហ៊ុន សែន ក៏បានថ្លែងអំណរគុណប្រទេសជាមិត្តទាំងអស់ ដែលបានផ្តល់វ៉ាក់សាំងកូវីដ-១៩ ដល់កម្ពុជា តាមរយៈក្របខណ្ឌទ្វេភាគី និងពហុភាគីក្តី។

សម្តេចតេជោនាយករដ្ឋមន្ត្រីបានបញ្ជាក់ថា ជាងពីរឆ្នាំកន្លងមកនេះ រាជរដ្ឋាភិបាលកម្ពុជា បានខិតខំប្រឹងប្រែងប្រកបដោយភាពបុរេសកម្ម ក្នុងការទប់ស្កាត់ការរីករាលដាលនៃជំងឺកូវីដ១៩ តាមរយៈការដាក់ចេញនូវវិធានការសុខាភិបាល អន្តរាគមន៍សង្គម និងសេដ្ឋកិច្ច និងវិធានការរដ្ឋបាលនានា ហើយរាជរដ្ឋាភិបាលកម្ពុជា បានកំណត់ការចាក់ វ៉ាក់សាំងកូវីដ-១៩ ជាវិធានការយុទ្ធសាស្ត្រជាគន្លឹះ ។

សម្តេចតេជោ ហ៊ុន សែន ថ្លែងសង្កត់ធ្ងន់ថា «ជាលទ្ធផលកម្ពុជាបានក្លាយជាប្រទេសមួយ ក្នុងចំណោមប្រទេស ដែលមានអត្រាគ្របដណ្តប់នៃចំនួនប្រជាជនទទួលបានវ៉ាក់សាំងជំងឺកូវីដ-១៩ ខ្ពស់ជាងគេក្នុងកម្រិតសកលជាពិសេស ការសម្រេចបាននូវ ភាពស៊ាំសហគមន៍ដ៏រឹងមាំ និងអាចបើកដំណើរការប្រទេសឡើងវិញ បានពេញលេញនៅចុងឆ្នាំ២០២១ ក៏ដូចជាការស្ដារឡើងវិញ នូវសកម្មភាពសង្គម-សេដ្ឋកិច្ចទាំងអស់ ក្នុងគន្លងប្រក្រតីភាពថ្មីផងដែរ។ ក្នុងឱកាសនេះ ខ្ញុំសូមសម្តែងអំណរគុណយ៉ាងស្មោះស្ម័គ្រ ចំពោះប្រទេសជាមិត្តរបស់យើងទាំងអស់ ដែលបានផ្តល់វ៉ាក់សាំងកូវីដ-១៩ ដល់កម្ពុជាតាមរយៈក្របខណ្ឌទ្វេភាគី និងពហុភាគី»។

សូមជម្រាបថា គិតត្រឹមថ្ងៃទី២២ ខែកញ្ញា ឆ្នាំ២០២២ កម្ពុជាបានចាក់វ៉ាក់សាំងការពារកូវីដ១៩ ជូនប្រជាពលរដ្ឋដោយឥតគិតថ្លៃ នៅទូទាំងប្រទេសសរុបចំនួន ១៥,១៩១,០២៧នាក់ ស្មើ៩៤.៩៤% នៃចំនួនប្រជាជន១៦លាននាក់។ ជាមួយគ្នានេះ សម្រាប់អ្នកបានចាក់ដូសទី៣ ចំនួន ១០,១៦០,០១៩នាក់, ដូសទី៤ចំនួន ៤,២៧៥,១៧៩នាក់ និងដូសទី៥ចំនួន ៨១៥,៤២១នាក់។

ប្រទេសដែលមានផ្គត់ផ្គង់ជំនួយជាវ៉ាក់សាំងមកកម្ពុជា រួមមាន៖ ប្រទេសចិន ជប៉ុន អាមេរិក អង់គ្លេស អូស្ត្រាលី ប៉ូឡូញ ហូឡង់ ហុងគ្រី អ៉ីតាលី អេស្ប៉ាញ។ គិតត្រឹមថ្ងៃទី១៨ ខែសីហា ឆ្នាំ២០២២ កម្ពុជាទទួលបានវ៉ាក់សាំងសរុបប្រមាណ ៧៤លានដូស៕