Скачать или смотреть Needaku Dhara Story నీడకు ధర

A simple Telugu story
నీడకు ధర

ఒక రోజు ఒక బాటసారి నడిచి, నడిచి బాగా అలసి పోయాడు. అతనికి నిలువెల్లా చెమటలు కారుతున్నాయి. ఇక నడవలేక ఆదారిన పోతున్న ఒక బండి వాడిని ఆపి తనని గ్రామానికి చేర్చమని కోరుకున్నాడు. అందుకు ఆ బండివాడు తనకు ఐదు రూపాయలిస్తే చేరుస్తానన్నాడు. బాటసారి అందుకు ఒప్పుకున్నాడు.

బండివాడు మధ్యాహ్నవేళ దారిలో బండి ఆపి, భోజనం చేయడానికి ఒక చెట్టు క్రిందకు వెళ్ళి కూర్చున్నాడు. అతడు భోజనం చేసినంత సేపు బాటసారి బండి నీడలో సేద తీరాడు. ఆ తరువాత బండివాడు బాటసారిని గ్రామానికి చేర్చాడు. బాటసారి తను ఇచ్చిన మాట ప్రకారం ఐదు రూపాయలు తీసి బండివాడికి ఇచ్చాడు. కాని బండివాడు ఆ ఐదు రూపాయలు తీసుకోకుండా మధ్యాహ్నంవేళ నీవు బండి నీడలో సేద దీరావు కాబట్టి, బండి నీడకు కూడా ధర ఇవ్వాలని మొత్తం పది రూపాయలు అంటూ పేచీ పెట్టాడు. బాటసారి అందుకు ఒప్పుకోలేదు. చివరికి గొడవ పెద్దదైంది. ఇద్దరూ కలసి న్యాయం కోసం గ్రామాధికారి వద్దకు వెళ్ళారు.

జరిగినదంతా విని గ్రామాధికారి, బాటసారిని అయిదు రూపాయలు పట్టుకొని నడివీధిలో నిలబడమన్నాడు. బండివాడితో ఇప్పుడు నీవు నీ పదిరూపాయలు తీసుకోమన్నాడు, కానీ బండివాడికి అర్థం కాలేదు "అతని చేతిలో ఒక ఐదు రూపాయలు మాత్రమే ఉన్నాయి. నేను పదిరూపాయలు ఎలా తీసుకోవాలి” అని ప్రశ్నించాడు.

అందుకు గ్రామాధికారి “ఐదురూపాయలతో పాటు ఐదురూపాయల నీడ కూడ ఉందికదా! దాన్ని కూడా తీసుకో బండి నీడకు కూలిగా ఐదురూపాయల నీడ సరిపోతుంది” అన్నాడు గ్రామాధికారి.

దానితో బండివాడికి బుద్ధి వచ్చింది. బాటసారి దగ్గర ఒక్క ఐదు రూపాయలు మాత్రమే తీసుకొని వెళ్ళిపోయాడు