Liberal Cawnpiaknak Hmaan Lo : Khamhnak Kong - Rev. Hoi Cung Tum

Liberal ti tikah Bible zumh dih lo bu in le pianthar lo bu in Khrihfa sinak a kalpi mi paohpaoh kha ti duh mi an si. A hohmanh ti hnawhmi kan ngei lo i, ti hnawh lomi zong kan ngei fawn lo. Bible zumh dih lo buin le pianthar lo buin Khrihfa sinak a kalpi mi paohpaoh kha Liberal an si caah kan doh mi hna cu an si.

Cawnpiaknak hmaan hi a um zungzal ve bantukin cawnpiaknak hmaan lo zong hi a um zungzal ve lai. Cucaah cawnpiaknak hmaan lo hi kan doh peng nak an si. Pumpak in kan huat hna ruangah an si lo. A bu in kan huat hna ruang zongah an si lo. Zumhnak hmaan lo le cawnpiaknak hmaan lo a dirpi mi hna le a kalpi mi paohpaoh kha kan dohmi hna cu an si.

A ngaite ti ahcun Liberal pawl hi Pathian vel kha tuahsernak an bet zungzal caah tuahsernak in cun piangthar tampi nak hmanh in an nun aa dawh deuh. An fel deuh. Siikaan an ngei deuh. An ttha deuh. Asinain vawleicung ah tuahsernak in a fel bik mi Pharisees pawl hmanh tuahsernak thawng in van ah an kai kho lo. Tuahsernak a aupi mi pawl khi hawinak in a ttha deuh mi le a fel deuh mi an si deuh hlei ballo. Minung mithmuh le hna theih awk ca sawhsawh lawng ah an si.

A bik in kan doh mi hna cu Pentecostal le Liberal pawl hi an si. Pentecostal tampi cu a piangthar mi tal an tampi. Liberal cu an nun aa dawh le an fel len zongah an pianthar lo caah zumlotu an si. Annih nih an i hmaithlak bik mi cu fimcawnnak, tthanchonak le daihnak ser hi a si. Cu bantuk cawnpiaknak cu miphun dang tampi sin ahcun a karh tuk cang caah Pathian hmanh an zum tilo. Pathian a kaltak mi an tam deuh cang. Hi thil vialte aa thoknak cu zumhnak hmaan lo le cawnpiaknak hmaan lo ruang ah a si. Laimi zong mifim pawl le mino tampi hmang in a kan naih, a kan phak thluahmah.

Zumhnak hmaan lo le cawnpiaknak hmaan lo hi mi tampi nih cun zei ah an ruat lo. Biapi ah an chia lem lo. Mi soi tu ah an ruah. An zumhnak le an cawnpiaknak a hmaan lonak kong chim hi soi ah an ruah ahcun an ruah ve cang ko lai ta. Hell ah a kan hruaitu zumhnak le cawnpiaknak cu mi tampi nih an zulh dih zongah mi tlawmte nih kan doh zungzal ve ko lai.

Thlarau cu zungzal in a thi ding mi or zungzal in a nung ding mi a si caah vawlei pumpi nak hmanh in Thlarau pakhat man hi a biapi deuh mi a si. Daithlanh awk a ttha lomi thil a si. Cucaah kan nun chung Pathian nih a rem a ti ahcun kan dirpi ding mi le kan doh zungzal ding mi rian sunglawi a si.