台慶55｜郭富城夥半百舞者台慶勁舞 與舊識重聚狀態一流約飲茶

台慶55｜郭富城夥半百舞者台慶勁舞 與舊識重聚狀態一流約飲茶

喺TVB展開五光十色演藝生涯嘅 郭富城 以壓軸嘉賓身份為55周年台慶擔任嘉賓，仲同50位舞蹈員連番勁舞，成為全晚嘅高潮，而城城精彩嘅表演就吸引大批同事紛紛變身Fans，仲喺鏡頭後各據有利位置欣賞呀。

幕後同事平時成日嗌咪叫同事入廠準備，不過呢晚就因為大家太過熱情，一廠就竟然要臨時管制唔准同事入廠，行慢幾步嘅同事就只能夠喺場外睇電視欣賞喇。不過咪以為入到廠就有著數喎，因為現場直播關係，唔少搵唔到靚合嘅同事就只有望城輕嘆，只能夠望Mon止渴喇。

舞蹈藝員出身嘅城城，呢晚除咗表演之外，最重要仲係同當年嘅老師同學聚舊見面，呢日為咗同大家見面，城城就話幾忙都要現身先得，仲已經約定要同大家見面好好傾吓偈喇。

講到去食飯，日前城城一家就竟然喺餐廳遇到非常無禮嘅遭遇，當日被偷拍之下城城就出言制止，點知仲要被人放上網批評，認真冇品呀。

呢日表演完訪問完，城城依然繼續留喺電視城，除咗參與大合照之外，對各位同事嘅合照要求都來者不拒。合照時低正城城身後嘅 陳瀅 同 周家洛 仲盡得地利之便，事後訪問時佢哋都似乎未開心完呀。

邀請城城呢位舊生返TVB為台慶表演，總經理曾志偉就非常多謝對方，仲話現場氣氛高漲都係靠城城帶動呀。

除咗城城之外，唔少當年舞蹈組嘅中流砥柱呢日亦都齊聚電視城，好似Sunny Wong就話唔少都係當年開山元老，同時亦係大家嘅恩師都有在場。身為老師嘅大前輩Thomas就大讚佢哋各有成就喇。

老師在場就當然要問問當年嘅城城表現啦，除咗Thomas話城城學嘢快，另一位元老老師鍾浩就話城城夠晒活潑又好動，成日冇時停呀。而林青峰就話正籌備 香港舞蹈演藝人協會 成立，明年仲會舉辦展覽為香港市民介紹商業舞蹈嘅發展，等大家更為了解佢哋嘅發展同工作呀。

#萬千星輝賀台慶 #郭富城 #TVB舞蹈組 #舞蹈藝員 #陳瀅 #周家洛 #SunnyWong #ThomasSek #鍾浩 #林青峰 #香港舞蹈演藝人協會
#TVB #娛樂新聞 #TVB娛樂新聞台

#ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0