Ауғанстандағы қазақ отбасылары аштықтан бір үзім нан таппай отыр

Пияз бен нан ғана жеп отырмыз деген Ауғанстан қазақтары өздерін тезірек бұл елден алып кетулерін сұрайды. Бір күндік ақшамыз тек 4 килограмм ұнға ғана жетеді деген қандастар өмір сүру тым қиындап кеткенін айтып видео жолдады. Жығылғанға жұдырық болып, азық-түлік бағасы да шарықтап кеткен екен. Тәліптер жаулап алған елдегі қазақтардың жағдайы туралы әріптесім Өмір Серікбекұлы айтып берсін.
Ауғандағы қазақтар қазір ішер астың өзін әрең тауып отырғандарын айтады. Күнде пияз бен нан ғана жеп отырмыз деген қандастар арнамызға фото-видео жолдады. Бір күн бойы жұмыс істеп, төгілген тердің құны 1 доллар ғана екен. Оған 4 килограмм ұн сатып алып, 20 адамға нан пісіреді. Күндегі тірлігіміз осы деген Ауған қазақтары берекесі қашқан елден алып кетулерін өтінеді.
АБДУЛҚАДІР ЫҚЫЛАСБАЙ, Ауғанстан қазағы:
– Жағдай қиын болып жатыр. Жұмыс жоқ. Ақша жоқ. Біз елшілікке звондадық. Елшілік айтады, келіңдер деп елшілікке. Біздің тұрған жеріміз 2 мың километр жол. Жол ұзақ. Біз бара алмаймыз. Қазақстан үкіметі өтініш сұраймыз бізді алып кетіңіз Қазақстан.
Тағы бір отбасы да пияз қуырып жеп отырған суреттерін жолдады. Байланыс тым нашар болғандықтан ұялы телефонға түсірген жазбаларын жолдай алмады. Бұл үйдегі еркектер қарауыл болып жұмыс істейді екен. Бір күн жұмысқа шықпай қалсақ, кішкентай балалар аш қалады. Сондықтан, әр күнді әупірімдеп әрең өткізетіндерін айтады.
Ауғанстандағы қазақтар мәселесі бойынша Сыртқы істер министрлігіне хабарласқан едік. Олардың жазбаша жауабында: Қазір өздерінің этникалық қазақ екендерін дәлелдеген 23 отбасы, яғни, 200 адам бар. Қазақстан аумағына қандастар ретінде кіруге ниет білдіргендермен тиісті жұмыс жалғасуда. Ауғанстанның қазіргі саяси-әскери ахуалын ескере отырып, қосымша эвакуациялау рейсінің уақыты туралы нақты айтуға мүмкіндік жоқ. Жақын арада елдегі жағдай тұрақтанып, қандастар Қазақстанға емін-еркін келе алатынына сенім білдіреміз" деген. Ал, бізге хабарласқан қандастар ол жақтағы қазақтар 23 отбасынан да көп дейді.
Өмір Серікбекұлы









Бізді әлеуметтік желіде оқыңыздар:
Youtube -   / @informburo31kanal  
Facebook -   / informburo31  
Instagram -   / informburo31  
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Ауғанстан #қандастар #этникалық_қазақтар #аштық #елге_қайтару
#тәліптер_режимі