Скачать или смотреть #2025

بدع الشاعر ياسر محمد بن علي عامر اليافعي.. مرسله الى الشاعر / حسن ذيبان اليافعي

سلام مني من ربوع العاصمه
يوزن بلدنا كلها عرضاً بطول

واعداد ما الأزمات فيها قائمه
واعداد ما الغازي تلقاها قتول

الليل يالهاجس كلامي نضّمه
وابنه وقايس والحذر تبني ميول

ناقش معي لوضاع ذي هي قائمه
وكتب وسجل خطّنا ضمن السجول

ولا تخلّط حبّنا وترآكمه
بطّه ونسف ونخله مني نخول

لاعند بن ذيبان خطي سلّمه
وبلغ سلامي عند ساعات الوصول

الضيف لاقد حل عنده يكرمه
ولا تكلم منطقه جوهر ولول

قل له بقيت اتخبره واتفهمّه
لانه ونعمك جيد يعرف للاصول

ماشي عرفنا الدوله اللي حاكمه
ولا عرفنا ايش تالية الحلول

الوضع مزري في ربوع العاصمه
ازمه بازمه قبل ما الازمه تزول

ديزل وخلص والسفينه قادمه
وهكذا طول المواسم والفصول

يتلاعبوا فينا عيال الحالمه
يا للأسف صار الحكم بيد الفسول

الله لا صلح لبتهم خاتمه
عاشر سنه مرت ولا شفنا قبول

ياسر محمد قال كبدي وآرمه
من ذه سياستهم أسف ويش انقول

هذا خطف هذا قتل ذا دآهمه
والبعض في سجنه مقيد بالقفول

حتى القضاء اصبح بايدي ناعمه
خلاف واضح لصحابه والرسول

كم هي قضاياء بالقضاء متراكمه
والناس شف قد صابها بعض الخمول

كم اللويه معنا وكم هي احزمه
واسط المدينه صاحب الفكسي يجول

رؤؤس ضحينا بكمّن جمّجمه
وعقبها ردو لنا ذي هم ذيول

قاده معانا بالفنادق نايمه
وشعبهم عايش على روتي وفول

والانتقالي مثل ذي هيه وآحمه
والخوف اصبح ذي معاهم بالرجول

وين الحلول الجذريه والحاسمه
ويحاسبو من كان متخاذل كسول

هم المواطن فوق صدره جاثمه
وانا هنا ينتابني بعض الفضول

هذه نصيحه قبل يوم الطامه
كُلاً يحاسب خرجته قبل الدخول

لن عادها بتّقع معارك حاسمه
وصبر هذا الشعب لا يمكن يطول

يقضي على كل الرؤوس الظالمه
ذي اتعودو دايم على شرب الكحول

وسجلوني ضمن من بالقائمه
واحد معارض للقياده والطبول

يالله وتجعلها العواقب سالمه
ولا تخلي ازمة الشعب اتطول

الظلم زائل والنعم مش دايمه
واللي يبي النعمه حفظها بالزلول

هذا الذي الهاجس كلامي نضّمه
والعفو لاشي طف ولا شي ميول

كتبت عل أوضاع ذي هي قائمه
ماجيت من شان الخلافه والعدول

سينا لا أحمد والقطنه أوسمّه
وهم ولا يسوون بالمكيل سبول

بو قيس صاحبها وثابت سلمه
والنعم به ذيب النماره والوعول

ذكر النبي مالآح بارق جاهمه
واسقى بلدنا والسّيل شله شلول

صلاه تغشى المصطفى بو فاطمه
ماسقى بلدنا بالمطاره والسيول
........................................

جواب الشاعر / حسن ذيبان

حيا وسهلا بالضيوف القادمة
ذي شرفت ذيبان ساعات الوصول

دام المخوه والرؤى متلازمة
حيا بكم حتى على كسرة ذمول

قدها عوايد يافع المتعاظمة
رؤس الكباش الضان وكتاف العجول

حيا بكم ترحيب جمله عامه
لا بخل يلزمنا ولا نهبي الصبول

والجيد ياسر من عرب متراحمة
لا ينهر السائل ولا يبخس جهول

واحيان تتحول افاعي سامة
لو شافت الطاغي قرب نحو الحقول

واخبار ذي موجود راس القايمة
السل ذي بالراس يوجد بالرجول

حتى المشايخ ذي لحاهم غانمة
فاسق غبي كلن على الثاني يقول

كل النتائج ياصديقي صادمة
لا فرق ما بين الخوارج والمغول

لا شعب واعي لا حكومة فاهمية
لا تزعلوا لو طالت المحنة تطول

كل القبايل باليمن متفاهمة
لولا السياسة غيرت بعض العقول

ذي همشوا قاداتنا المتعلمة
واستبدلوهم غصب عنا بالفشول

والمحكمة من بعد سالم فاطمة
ذي ما لها قدرة على شل الحمول

كل الفصائل والنخب متخاصمة
كلن يرا نفسه على الثاني رسول

وكل واحد له عواصم داعمه
بالمال والموال والمُر الذلول

اذ انت نفسك من غباهم وارمة
انا غسلت ايدي من الثورة غسول

لا حد يقول العيب عيب الحالمة
العيب فينا والغلط فينا يصول

حتى الخلايا والفلول النايمة
كلن معه داخل عدن عائل يعول

حتى اروبا مننا متشائمة
امة حضر واتصدر المشهد سطول

امة على الماضي تضلي نادمة
بالبحر تغرق او مع الموجة تجول

لا فايدة با عدادها المتزاحمة
ولا بثروات الاراضي والسهول

والشعر عبر الفيس ثورة عارمة
يضفع عديم المعرفة ولا يبول

مشروعنا يافع تضلي حاكمة
والذوق يبقى ملح يافع والكمول

غصباً على بعض النفوس الناقمة
والشعر يتجدد بها ولا يدول

الراي واحد والخطط متلازمة
والسيف جاهز والجنابي والخيول

من رام يوصل فوق متن الراجمة
ايقن بان يافع عجي صعب الوصول

هذا جوابي بعد نظرة عامة
والمعذرة لو كنت في ردي خجول

ختمت مكتوبي وحسن الخاتمة
ذكر النبي و نسال الله القبول
...................................