ӨМІРІҢІЗДІ ӨЗГЕРТЕТІН ДҰҒА! АЛЛАНЫҢ КӨРКЕМ ЕСІМ-СИПАТТАРЫ. КҮНДЕЛІКТІ ОҚЫЛУЫ ТИІС ДҰҒА.

• Уа, күллі тіршілік атаулының жалғыз Жаратушысы, барлық көркем есімдердің шынайы иесі, кемшіліктен пәк ұлы Аллам;
• Уа, бар жаратылысты мүлтіксіз жүйемен ұстап тұрған теңдессіз құдірет иесі Қаиюум (قَيُّومْ) Аллам;
• Уа, шет-шегі жоқ ғаламзатты шексіз мейірімімен тербеткен аса рақымды Рахман (رَحْمَانْ) Аллам;
• Уа, жер мен көкті, бүкіл болмысты нұрға бөлеген Мунир (مُنِيرْ) Аллам;
• Уа, теңі мен теңдесі жоқ, сипаты мен істерінде еш серігі жоқ, жалғыз –Әхад (أَحَدْ) Аллам;
• Уа, барлық жаратылыс Оған зәру, бірақ Өзі ешкімге мұқтаж емес Самад (صَمَدْ) Аллам;
• Уа, Күрсі мен Арштың, Қағба мен Құранның ұлы иесі Аллам;
• Уа, жердің асты-үсті һәм аспандағы, судың түбіндегі тұтас тіршілікті түрлі нығметімен рызықтандырушы Раззақ (رَزَّاقْ) Аллам;
• Уа, білімі күллі ғаламдағы жария-жасырын, үлкен-кіші көмескінің бәрін толық қамтыған шексіз ілім иесі Алим (عَلِيمْ) Аллам;
• Уа, бар болмысты көркем жаратып, әрбір жаратылысты әсем безендіруші Жәмил (جَمِيلْ) Аллам;
• Уа, күнәһар пенделерін дереу жазаламай, оларға тәубе етуі үшін мұрсат беруші, сабырлы да, аса биязы Хәлим (حَلِيمْ) Аллам;
• Уа, барлық істі аса даналықпен, терең хикметпен жасаушы Хәким (حَكِيمْ) Аллам;
• Уа, ізгі құлдарына молынан сый-сияпат беруші аса жомарт – Кәрим (كَرِيمْ)Аллам;
• Уа, барлық құлдарына, тіпті өзінен сырт айналып, адасқандарға да мейірбандық танытушы Хәннән (حَنَّانْ) Аллам;
• Уа, барша ғаламға сансыз жақсылығы мен есепсіз игілігін тарту етуші Мәннән (مَنَّانْ) Аллам;
• Уа, жасаған амалдарымыздың ешбірін ескерусіз қалдырмай, сауабын мен қарымын толық беруші Дәййәән (دَيَّانْ) Аллам;
• Уа, құлдарының күнәлары мен кемшілігін жасырып, оларды масқаралықтан сақтаушы Саттар (سَتَّارْ) Аллам;
• Уа, барша ақиқаттың дәлелі Бұрһан (بُرْهَان) Аллам;
• Уа, шексіз салтанат пен шынайы биліктің асқақ иесі, билеушілердің билеушісі Сұлтан (سُلْطَان) Аллам;
• Уа, барша дүние-мүліктің жалғыз қожайыны Мәлик (مَالِك) Аллам;
• Уа, кемшіліктен пәк, нұқсандық атаулыдан ада, еш мінсіз Субхан (سُبْحَان) Аллам;
Уа, бар болуы мен жалғыз екендігі айқын-аян Заһир (ظَاهِر) Аллам;
•Уа, кемел сипаттарының сыры мен істерінің ақиқи хикметіне ақыл жетпейтін Бәтин (بَاطِن) Аллам;
• Уа, бүкіл тіршілік атаулы жәрдем тілеп, көмек сұрайтын жалғыз жәрдемші, аса қамқор Мүстағән (مُسْتَعَان) Аллам;
• Уа, бүкіл жаманшылықтан сақтап, түрлі пәлекет пен қауіп-қатерден қорған болған Хафиз (حَفِيظ) Аллам;
• Уа, жан сырымыз бен көмескі құпияларымызды білуші − Хабир (خَبِير) Аллам;
• Уа, бүкіл жария-жасырын дұғаларымызды бір сәт шатастырмай анық естуші, тілегімізді беруші құдіретті Аллам;
• Уа, тыңнан мүмкіндік сыйлаушы, жабық есіктерді айқара ашушы Фаттах (فَتَّاح) Аллам;
• Уа, барша науқастың жан-тәніне дауа дарытушы, шипасын беруші Шафи (شَافِي) Аллам,
• Уа, адасқандарды тура жолға салушы, шатасқандарды ақиқатқа жетелеуші Һәәди (هَادِي) Аллам;
• Уа, тарыққандарға пана, қиналғандарға қорған болушы Уәкил (وَكِيل) Аллам;
• Уа, астамдық жасағандарға тосқауыл қоюшы, шектен шыққан залымдарға жазасын беріп, қаһарын көрсетуші Қаһһар (قَهَّار) да, Жаббар (جَبَّار) Аллам;
• Уа, күллі тіршілікті пәнилікке бас идірткен мәңгіліктің шын иесі Бақи (بَاقِي) Аллам;
• Уа, бар жаратылысқа тіршілік сыйлап, өмір беретін һәм өлілерді қайта тірілтуші Мұхий (مُحْيِي) Аллам;
• Уа, қалаған пендесінің дәрежесін биіктетіп, қалағанының абыройын түсіруші құдіретті Аллам;
• Уа, мына дүниеде жасаған әр ісіміздің есебін алып, қарымын беруші Хасиб (حَسِيب) Аллам;
• Уа, барлық нәрсені толық көруші Басир (بَصِير) Аллам;
• Уа, бүкіл жаратылысты дамылсыз һәм мінсіз бақылаушы Рақиб (رَقِيب) Аллам;
• Уа, біліп-білмей, жария-жасырын жасаған бар күнәмізді кешіре білуші Ғаффар (غَفَّار) Аллам;
• Уа, жалғыз қалғанда тастап кетпейтін сенімді Сүйенішім, жырақта жұбаныш табар Сырласым, қамыққанда медет берер Демеушім, мұқтаж сәтте көмек берер Жардемшім, қысылғанда бас сауғалайтын жалғыз Панам, бойдағы үрей-қорқынышымды сейілтер Қорғанышым, абыржып, сасқан сәтте жол көрсетер Жолбасшым!
Иә, Мейірбан Аллам, осынау көркем есімдеріңді дәнекер етіп, ұлы сипаттарыңның ақы-құрметі үшін, бір Өзіңе сыйына отырып, жалғыз Өзіңнен жалбарына сұраймын:

Бізді тура жолға сала гөр. Адасып, шатасудан сақта. Көкірегімізді иманға, ізгілікке, нұрға, қанағат, мейірімге толтыр!
Жаратылысымызды әдемі еткеніңдей, мінезімізді де көркем ет.
Жүрегімізді күнәнің дағынан тазартып, тәкаппарлық, қызғаныш, өкпе-реніш, кектен, көзбояшылықтан, дүниеқоңыздықтан сақтай гөр!
Рахман ием, менің жасаған күнәм қанша көп болса да, Сенің кешірімің мен мейірімің одан да зор. Бар жасаған қателерімді кешіре гөр!

Біздің әлеуметтік желілер:
Ілім дариясы
Telegram: https://t.me/ilimdariyasy
Instagram:   / ilimdariyasy  
Tiktok:   / ilimdariyasy  
Instagram:   / dariya_damytu  

DARIYA қосымшасын жүктеп, кітаптарды аудио нұсқада офлайн тыңдаңыз: http://onelink.to/dariya

#дұға #өзгеру #ДарияТВ