ពេលវេលាដែលត្រូវតបស្នង - វិភាគទានចំពោះអធិរាជសំលេងមាស លោក ស៊ីន ស៊ីសាមុត

យើងខ្ញុំមានសេចក្តីសោមនស្សរីករាយជាអនេក សូមចែករំលែកជាមួយប្រិយមិត្ត របស់យើងលើទំព័រ YouTube ស្តីពីខ្លឹមសារទាំងស្រុងនៃការប្រគំតន្ត្រី (បានកែសម្រួលដោយគ្មានការផ្សព្វផ្សាយពាណិជ្ជកម្ម) ក្រោមប្រធានបទ៖ “ពេលវេលាដែលត្រូវតបស្នង - វិភាគទានចំពោះអធិរាជសំលេងមាស លោក ស៊ីន ស៊ីសាមុត”។

ក្រសួងពាណិជ្ជកម្មបានផ្តួចផ្តើមរៀបចំការប្រគំតន្ត្រីនេះឡើងដោយមានការគាំទ្រពីក្រសួងវប្បធម៌និងវិចិត្រ​សិល្បះ ដើម្បីគូសបញ្ជាក់អំពីច្បាប់កម្មសិទ្ធិបញ្ញា និងច្បាប់សិទ្ធិអ្នកនិពន្ធ និងដើម្បីរ៉ៃអង្គាសថវិការ​ជួយឧបត្ថម្ភគាំទ្រដល់ភរិយារបស់លោក ស៊ីន ស៊ីសាមុត (ដោយលោកស្រីមិនដែលបានទទួលប្រាក់​លាភការបន្តិចណាសោះពីតន្ត្រី​ចម្រៀងរបស់ស្វាមីលោកស្រី​ និងកំពុងរស់នៅក្នុងភាព​លំបាក) តន្រ្តីករចាស់ៗបន្សល់ទុកពីសម័យ​នោះ និងជួយដល់មន្ទីរពេទ្យចំនួនពីរផងដែរ។

តាមរយៈជំនួយសប្បុរសធម៌ដ៏ថ្លៃថ្លាពីក្រុមហ៊ុនដែលបានជួយឧបត្ថម្ភជាថវិការ និងសម្ភារៈ មកកាន់ព្រឹត្តិការណ៍ នេះ​រ៉ៃអង្គាសប្រាក់បានចំនួន ប្រមាណជាង ១០ម៉ឺនដុល្លារសហរដ្ឋអាមេរិក (បានធ្វើសវនកម្មដើម្បីតម្លាភាពពីក្រុមហ៊ុន Price Waterhouse Coopers, Cambodia)។ ថវិការទាំងនេះត្រូវបាន ប្រគល់ជូនទៅ ១)លោកស្រី ខាវ ថងញ៉ុត ភរិយាលោក ស៊ីន ស៊ីសាមុត ២)បងស្រីបង្កើតរបស់លោកស្រី រស់ សេរីសុទ្ធា ៣)មន្ទីរពេទ្យគន្ធបុប្ផា ៤)មន្ទីរពេទ្យព្រះអង្គឌួង និង ៥)សិល្បៈករចាស់ៗ ដែលរស់នៅក្នុងស្ថានភាពលំបាក។

ការប្រគំតន្ត្រីនេះត្រូវបានចាក់ផ្សាយឡើងវិញតាមកញ្ចក់ទូរទស្សន៍ធំៗចំនួនប្រាំរួមមាន៖ ទូរទស្សន៍MyTV, CTN, ទូរទស្សន៍ជាតិកម្ពុជា, PNN និងទូរទស្សន៍អាស៊ីអាគ្នេយ៍ នៅក្នុងពិធី បុណ្យចូលឆ្នាំថ្មីឆ្នាំសកលនេះ។

សូមប្រិយមិត្តទាំងអស់អញ្ជើញរីករាយ​ទស្សនាខ្លឹមសារទាំងស្រុងនៃ​ការប្រគំតន្ត្រី ដែលបានកែសម្រួល​រួច និងផលិតឡើងដោយក្រុមហ៊ុនខ្មែរមេគង្គKMF (Khmer Mekong Films) និងដែលបានបង្ហោះលើទំព័រYouTubeដើម្បីប្រិយមិត្តបានរីករាយទស្សនាកំសាន្ត!