БАГШ.
Патриша Келли бол хотын захын ахлах сургуульд (14–18 насны хүүхдүүд) физикийн хичээл заадаг бөгөөд давхар охидын хөнгөн атлетикийн багийн ахлах дасгалжуулагчаар ажилладаг. Патришагийн нөхөр нь 30 жилийн өмнө гэр бүлийнхээ үүсгэн байгуулсан жижиглэн барааны сүлжээ дэлгүүрийг удирддаг. Сүүлийн таван жилд Патришагийн удирдлага дор сургуулийнх нь сурагчид шинжлэх ухааны бүсийн аварга шалгаруулах тэмцээнд гурван удаа түрүүлж, улсын аваргын нэг цол хүртжээ. Патришагийн заавар, чиглүүлгийн ачаар тус ахлах сургуулиас олон сурагч шинжлэх ухааны шилдэг их сургуулиудад (АНУ-ын MIT, Caltech зэрэг) элсэн орсон байна. Патриша хоёр охинтой. Нэг нь физикийн ухааны докторын зэрэг хамгаалж, одоо технологийн компанид ажилладаг. Нөгөө нь ахлах сургуульд байхдаа хэрэг төвөгт орж, сургуулиа төгсөөгүй бөгөөд алс зайтай хотод амьдардаг. Тэр охин нь гэр бүлийнхнийхээ холбоо барих гэсэн бүх оролдлогод хариу өгдөггүй.
ЧИНЭЭЛЭГ ХӨРӨНГӨ ОРУУЛАГЧ.
Питер Тэйлор бол хөрөнгө оруулагч бөгөөд ганц бие (нэг удаа гэрлэсэн ч дөрвөн жилийн дараа салсан). Тэр Лондон, Нью-Йорк, Бермуда дахь гэртээ ээлжлэн амьдардаг. Питер анхны хөрөнгөө стартап компанийн эхэн үед хөрөнгө оруулж, дараа нь томоохон өрсөлдөгч компанид зарснаар босгожээ. Түүний 240,000 ам.долларын хөрөнгө оруулалт 50 сая ам.долларын ашиг болж өссөн байна. Үүнээс хойш бүх зүйл зөвхөн “өсөлт” байсаар иржээ. Саяхан нэр хүндтэй бизнесийн сэтгүүл Питерийн тухай бүтэн нүүр нийтлэл гаргаж, түүнийг чөлөөт сэтгэлгээтэй, эрх чөлөөг эрхэмлэгч, үнэнч либертариан гэж тодорхойлсон. Питер тэр нийтлэлд “Би том эрсдэл гаргаад, эрсдэлээ амжилттай болсныг харах дуртай” гэжээ. Тэр ажлаас гадуур сонирхолтой үдэшлэгүүдэд оролцох дуртай (“Би их ажиллаж, их зугаацах дуртай”) болон жижиг онгоцоор нисдэг (“Ганцаараа тэнгэрт байх нь надад эрх чөлөөний мэдрэмж өгдөг”). Тэр үзэл бодол нийлдэг улс төрийн намуудад ихээхэн хэмжээний хандив өгдөг бөгөөд дэлхийн нөлөө бүхий улс төрчид түүнээс эдийн засгийн зөвлөгөө авдаг.
ТЕННИСИЙН МЭРГЭЖЛИЙН ТАМИРЧИН.
Жэнис Чунг нь шаргуу хөдөлмөрч, мэргэжлийн теннисчин бөгөөд карьерийнхаа туршид дөрвөн томоохон тэмцээнд түрүүлж, сүүлийн арван жилийн долоон жилд шагналын мөнгөний хэмжээгээр шилдэг 15-д багтсан байна. Тэр таван настайдаа аавтайгаа хамт теннис тоглож эхэлсэн бөгөөд аавынх нь тууштай, дарамттай, тасралтгүй бэлтгэлийн үр дүнд теннисийг төгс тоглож сурчээ. Түүнээс хойш теннис Жэнисийн амьдралыг ноёрхсоор ирсэн. Хэдэн жилийн өмнө тэр “Чунг Теннисийн Институт”-ийг байгуулж, хотын ядуу хороололд амьдардаг залуу эмэгтэйчүүдэд үнэ төлбөргүй теннисийн сургалт болон “амьдралын ур чадварын сургалт” явуулдаг болсон. Жэнис үл хөдлөх хөрөнгө хөгжүүлэгчтэй гэрлэсэн бөгөөд өөрөө хүүхэдтэй болж чадахгүй тул одоо 2, 6, 7 настай гурван солонгос хүүхдийг өргөж авсан. “Теннисийн талбай дээр амьдрал хүнд байдаг. Хүүхдүүдтэйгээ хүссэн хэмжээндээ цаг өнгөрөөж чаддаггүй” хэмээн тэр саяхан нэгэн теннисний сэтгүүлд ярьжээ.
ЧУЛУУНЫ ӨРЛӨГЧ.
Фред Хэмпшир бол том хотын ойролцоо насан туршдаа амьдарсан чулууны өрлөгч юм. Түүхэн архитектурын загварыг шимтэн судалдаг тэрээр эхнэр Мэритэйгээ 52 жилийн туш амьдарч байгаа бөгөөд гурван хүүхэдтэй (нэг хүүхэд нь хуульч, нэг нь банкир, нөгөө нь гэрийн эзэгтэй), долоон ач зээтэй. “Гартаа барьж буй чулуу бүхэн өөр” гэж тэр нэгэн удаа сурвалжлагчид ярьжээ. “Миний ажлын онцлог бол ажлын эхний өдрөө хийсэн зүйлээ улам бүр өсөж, өргөжиж байгааг харж болдог. Олон жилийн дараа буцаж очиход бүтээсэн зүйл маань хэвээрээ байж байдаг. Тоосго, чулуу өрөх бол сайхан ажил. Хүнд ажил ч гэлээ, чулуу бүрийг яг зөв газарт нь тааруулж тавих нь сонирхолтой, өдөр хэрхэн өнгөрснийг анзаарахгүй өнгөрдөг” гэжээ. Хэмпширт заримдаа санхүүгийн бэрхшээл тулгарч байсан гэдгийг хүлээн зөвшөөрдөг ч гурван хүүхэд тус бүрийнхээ байшинг барихад өөрийн гараар оролцсон гэдгээрээ бахархдаг.
БАНКИР.
Жэйн Рули нь том хот дахь олон улсын банканд ажлын гараагаа эхлүүлснээс хойш тасралтгүй ажиллаж, албан тушаал ахисаар Хөрөнгө удирдлагын үйлчилгээ хариуцсан дэд ерөнхийлөгч болсон. Тэр байгууллагадаа болон харилцагчдадаа туйлын үнэнч. Жэйн марафонд гүйдэг, ганц бие ээж. Тиймээс ажлын бус цагаа марафоны бэлтгэл, оюуны болон бие махбодын хүнд хэлбэрийн хөгжлийн бэрхшээлтэй бага насны охин Жюлитэйгээ өнгөрүүлдэг. Найз нөхөд, гэр бүлийнхэн нь Жэйнийг охиноо тусгай асрамжийн газар өгч, “өөрийнхөө амьдралыг бод” гэж ятгадаг ч Жэйн “Миний охин бол миний амьдрал. Охиныхоо асаргааг хэн нэгэнд даатгана гэж хэзээ ч байхгүй” гэж хариулдаг. Өнгөрсөн жил Жэйн Нью-Йоркийн марафонд охиноо тусгайлан тоноглосон тэргэнцэрт суулган түрж гүйсэн нь хөгжлийн бэрхшээлтэй хүүхдийн эцэг эхчүүдийн тухай олон улсын мэдээний телевизийн нэвтрүүлэгт онцлог хэсэг болж гарсан. Жэйн сүүлийн жилүүдэд хэд хэдэн эрэгтэйтэй болзсон ч гэрлэхийг хүсдэггүй. Ялангуяа өөрийнх нь эцэг эхийн хамтын амьдрал ямар ч аз жаргалгүй байсан нь энэ бодолд нь нөлөөлдөг.
Информация по комментариям в разработке