Скачать или смотреть પ્રાકૃતિક કૃષિની શરૂઆત કરતા કવાંટ તાલુકાના જામ્બા ગામના રમેશભાઈ રાઠવા

પ્રાકૃતિક કૃષિની શરૂઆત કરતા કવાંટ તાલુકાના જામ્બા ગામના રમેશભાઈ રાઠવા
-------
પ્રાકૃતિક રીતે ઉત્પાદિત ડાંગર,મકાઈ, શાકભાજી આહારમાં લેવાથી શરીર નિરોગી રહે - રમેશભાઈ રાઠવા
-------
સાચો અને સારો મિત્ર તમને પ્રગતિપથ પર લઈ જાય છે. તમારા જીવનમાં આનંદ, ઉત્સાહ, હિંમત અને આત્મવિશ્વાસ લાવી તમને નવા કાર્ય કરવાની પ્રેરણા આપે છે. છોટાઉદેપુર જિલ્લાના કવાંટ તાલુકાના જામ્બા ગામના રહેવાસી રમેશભાઈ રાઠવાના જીવનમાં તેમના મિત્રે મહત્ત્વની ભૂમિકા ભજવી છે.

તેમના મિત્ર હરસિંગભાઈ રાઠવાએ રાસાયણિક ખેતી છોડી પ્રાકૃતિક કૃષિ અપનાવી સારુ ઉત્પાદન મેળવ્યું. રમેશભાઈને ડર હતો કે પ્રાકૃતિક કૃષિ કરવાથી ઉત્પાદન સારૂ નહીં મળે તો? ત્યારે તેમના મિત્રે તમને હિમત આપી ગાય આધારિત પ્રાકૃતિક કૃષિ કરવી પ્રોત્સાહિત કર્યા હતા.

રમેશભાઈ સાથે વાત કરતા જાણવા મળ્યું કે તેઓ છેલ્લા બે વર્ષથી પ્રાકૃતિક કૃષિ કરૂ છું. ગત વર્ષે રીંગણ, ભીંડા અને ફલાવરનું વાવેતર કર્યું હતું. આ વર્ષે પાકમાં રીંગણ, વેલાવાલી શાકભાજી, ટીંડોળા, ચોળી, પાપડી, ભીંડા અને ટામેટાનું વાવેતર કર્યું છે. તેઓ કહે છે, આ બધું શાકભાજી અમને પ્રાકૃતિક રીતે મળે અને અમારા સ્વાસ્થ્ય માટે સારું છે.

વધુમાં રમેશભાઈ જણાવે છે કે, આ વર્ષે સોયાબીનનું પણ વાવેતર કર્યું છે અને અત્યાર સુધી કોઈ ખર્ચ લાગ્યો નથી. મારે ખેતરમાં ખાતર નાખ્યા વગર ઢીચણ જેટલી સોયાબીન તૈયાર થઈ ગઈ છે. શાકભાજીમાં જીવાતનો ઉપદ્રવ દેખાય તો તેઓ અજમાસ્ત્રનો છંટકાવ કરે છે અને જીવામૃતનો ઉપયોગ કરે છે.

પ્રાકૃતિક કૃષિના ફાયદાઓ વિશે વાત કરતાં રમેશભાઈ કહે છે, પ્રાકૃતિક કૃષિમાં અમારે બહારથી કશું લાવવું પડતું નથી. અમારા ગામના મારા મિત્ર હરસિંગભાઈ રાઠવા (કોમ્યુનિટી રિસોર્સ પર્સન) પ્રાકૃતિક કૃષિના આયામો બનાવી અમને વિનામૂલ્યે આપે છે. તેનો અમે ઉપયોગ કરીએ છીએ. તેઓ અજમાસ્ત્ર બનાવવા માટે અજમો, હિંગ અને પાણીનો ઉપયોગ કરે છે. જીવામૃત બનાવવામાં દેશી ગાયના ગૌમૂત્ર, ગોબર, કઠોળનો લોટ અને માટીનો ઉપયોગ કરીને જીવામૃત બનાવે છે.

પ્રાકૃતિક કૃષિને કારણે રમેશભાઈના જીવનમાં ઘણા ફેરફારો આવ્યા છે. તેઓ હવે પોતાના પરિવાર માટે સ્વાસ્થ્યપ્રદ આ આરનું ઉત્પન્ન કરી રહ્યા છે અને ઘર વપરાશ કરતા વધારાનું ઉત્પાદન વેચીને આવક પણ મેળવે છે. તેઓ જણાવે છે કે, પ્રાકૃતિક રીતે ઉત્પાદિત ડાંગર,મકાઈ, શાકભાજી આહારમાં લેવાથી શરીર નિરોગી રહે છે. પ્રાકૃતિક કૃષિ અપનાવીને ખેડૂતો પોતાના જીવનમાં સુધારો લાવી શકે છે અને પોતાની જમીન અને પર્યાવરણનું પણ સંરક્ષણ કરી શકે છે.
૦૦
(સાફલ્ય ગાથા)