Самвел Бабаян: “Футболчиларимиз ўз савияларини намойиш этишди холос...”

Самвел Вячеславович одатдагидек ўз сўзини ўйин ҳақидаги фикрлари билан бошлади.
- Ассалому алайкум! Авваламбор “Навбаҳор” мухлисларини ғалаба билан табриклайман. Ўйинга келсак, жуда ҳам қийин бўлди. Сабаби, бу ерга келган ҳар қандай жамоа ҳимояланади. “Локомотив”ни ҳам кўрдик, яхши ўйнади. Бироқ йигитларимизга раҳмат. Улар ўз савияларини намойиш этишди. Яна бир бор ишқибозларни ғалаба билан табриклаймиз.

- Чиройли ғалаба билан табриклаймиз. Фаррух Сайфиевни кўпроқ ярим ҳимояда кўряпмиз. Бу Иброҳим Йўлдошевга ўйин амалиёти бериш учун қилиняптими?
- Шу мавзу бўйича Фаррух билан ҳозир гаплашдик. Бизда унинг позициясида ўйнай оладиган Иброҳим бор. Бугун у яхши ўйин намойиш этди.

- Руслан Жиянов олимпия терма жамоамизда ўйнади ва бугунги учрашувда ҳам майдонга тушди. Бу унинг шахсий қарори эдими?
- Биринчи навбатда, бу менинг қарорим. Руслан даражасидаги футболчи бизнинг ўйинимизга сифат қўша олади. Кеча унинг соғлиги билан муаммо бор эди. Бугун шифокорлар унга рухсат беришди. Жиянов бизнинг жангчи футболчи. У “Навбаҳор”даги стартини ажойиб бошлади. Биз Руслан билан фахрланамиз. Менимча, у олимпия терма жамоамизга ҳам катта ёрдам берди. Албатта, биз бутун термани табриклаймиз. Ўйлашимча, у буёғига тикланиб, “Навбаҳор”га ҳали кўп ёрдам беради.
- “Локомотив” учрашув аввалидан ҳимояда ўйнади. Сиз рақибнинг шундай ўйнашини кутганмидингиз?
- Ҳа, биз рақибни яхши ўргангандик. Уларнинг ҳужумдаги қанотлари ўта тезкор. Шунинг учун, рақиб тезкор қарши ҳужумларга ўтишини кутгандик. Бизга мана шу ерда Болтабоевнинг индивидуал маҳорати ёрдам берди. Агар бугун очко йўқотсак, фақат ўз хатоларимиз туфайли рўй берарди. Шундай бўлсада, учрашувнинг ҳар дақиқасини назорат қилдик. Йигитларга катта раҳмат.

Бабаян расми 1 05 05 24

- Сиз ёшларга ҳам кўпроқ имконият беряпсиз ва бугун Наврўзбек Иминжоновни захирадан майдонга туширдингиз. Унинг намойиш этган ўйини борасидаги фикрингизни билдирсангиз.

Шунингдек, аввалги ўйинларда майдонга туширилган Шодиёр Шодибоев бугун учрашув қайдномасидан ҳам ўрин олмади. Бу нима билан боғлиқ?

- Наврўзбек Иминжонов майдонга тушди ва голли вазиятдан фойдалана олмади. Биз у билан кийиниш хонасида гаплашдик. Наврўзбек билан индивидуал ишлашда давом этамиз. Ажойиб йигит ва у ўтган мавсум биринчи лигада ўйнаганди. Унга имконият берамиз.

Шодибоевга келсак, у жароҳат олган ҳамда тикланишни давом эттиряпти. Нимага у ўйнаяпти, нимага у ўйнамаяпти, деган фикрга келсак, менинг вазифам - натижа кўрсатиш. Ким лойиқ бўлса, ўша ўйнайди. Шунинг учун, ўйин амалиёти ва бошқа жиҳатлар иккинчи даражали.

- Биламиз, миллий терма жамоамизда ишлаган мураббийсиз. Ўзбекистон илк маротаба Олимпиадага йўл олди. Тимур Кападзенинг мухлисларга тақдим этган туҳфаси ҳақида гапирсангиз, жуда яхши бўларди...
- Албатта, бу тарихий натижа. Биринчи навбатда, футбол ассоциациясининг ўйланган сиёсати самараси. Натижанинг фундаментини айнан федерация қурди. Бироқ ғоя мураббий ва футболчиларнинг иши. Бу ерда мураббийлар штабининг ўрни бошқа. Улар футболимиз тарихидаги энг яхши натижани қайд этди. Шундай экан, Тимурни алоҳида эътироф этиб кетиш керак. “Олтин авлод”ни ҳам айтиш лозим. Улар бизнинг футболимиз келажаги. Ҳатто финалда улар Осиёнинг энг кучли термасини ўйин томонлама таслим этишди.