មុខរបរចិញ្ចឹមបង្កងកំពុងមានប្រជាប្រិយភាព ខណៈតម្រូវការទីផ្សារក្នុងស្រុកកំពុងកើនឡើង

មុខរបរចិញ្ចឹមបង្កងកំពុងមានប្រជាប្រិយភាព ខណៈតម្រូវការទីផ្សារក្នុងស្រុកកំពុងកើនឡើង
------------------------------------------------------------------------------------------------------------------
បាត់ដំបង ៖ មុខរបរចិញ្ចឹមបង្កង បច្ចុប្បន្នបានក្លាយជាមុខរបរមួយដែលមានប្រជាប្រិយភាព ខណៈដែលតម្រូវការទីផ្សារបង្កងមានកំណើនខ្ពស់ទាំងនៅក្នុងតំបន់អាស៊ីអាគ្នេយ៍ ក៏ដូចជាក្នុងប្រទេសកម្ពុជាយើងផងដែរ។
លោក តាំង លាងឆាយ ជាអ្នកបណ្តុះបណ្តាលជំនាញចិញ្ចឹមបង្កងអូស្ត្រាលីទឹកសាប មានទីតាំងស្ថិតនៅទឹកដីខេត្តបាត់ដំបងបានប្រាប់ AMS ថា នៅក្នុងការចាប់ផ្តើមអាជីវកម្មខ្នាតតូចមួយនេះ ដំបូងឡើយគេអាចចាប់ផ្តើមដើមទុនប្រមាណជា 2ពាន់ដុល្លារសម្រាប់ការចំណាយទៅលើការបង្កើតស្រះទឹក និងការទិញពូជ ឬការទិញកូនបង្កងមកចិញ្ចឹម ឬអាចចិញ្ចឹមនៅក្នុងអាងក៏បាន ហើយក៏មិនចាំបាច់ទៅទិញចំណីពីគេមកឱ្យបង្កងស៊ីដែរ ដោយគេអាចរកចំណីឱ្យវាបានយ៉ាងងាយស្រួល។
លោកបានមានប្រសាសន៍ថា ៖«អ្វីដែលពិសេសសម្រាប់បងប្អូនប្រជាកសិករខ្មែរដែលចង់ចិញ្ចឹមបង្កង ខ្ញុំនឹងផ្ដល់បច្ចេកទេសជាក់ស្តែង ក៏ដូចជាពូជក្នុងការចិញ្ចឹមផងដែរ ព្រោះនៅកសិដ្ឋានខ្ញុំមានស្រះចិញ្ចឹមបង្កងយកសាច់ ប្រភេទអាងភ្ញាស់ និងមានឧបករណ៍វាស់ទឹក ប្រភពទឹកដើម្បីឱ្យអ្នករៀនបានមើលឃើញផ្ទាល់តែម្តង ព្រោះបើយើងចិញ្ចឹមយកសាច់ វាត្រូវការទីតាំងធំ ព្រោះក្នុង 1ម៉ែត្រការ៉េដាក់បានបង្កងតែ 10ក្បាលទេ។ តែបើផលិតកូនបង្កងសម្រាប់លក់វិញ ក្នុង 1ម៉ែត្រការ៉េដាក់បានប្រមាណ 100ក្បាល»។
លោក តាំង លាងឆាយ ដែលជាម្ចាស់កសិដ្ឋានបង្កង បានបញ្ជាក់ឱ្យដឹងទៀតថា៖«បងប្អូនដែលចង់ទិញពូជបង្កងរបស់ខ្ញុំ សម្រាប់កូនបង្កង 1គ្រាប់ក្នុងតម្លៃ 2ពាន់រៀល។ ដូច្នេះបើខ្ញុំផលិត 1ខែបាន 10,000កូន ខ្ញុំបានចំណូល 5,000ដុល្លារ។ សម្រាប់ពូជយកទៅបង្កាត់(ពូជមេញី1ឈ្មោល1) 1គូតម្លៃ 10ដុល្លារ ដោយអ្នកខ្លះគាត់ទិញមេ 50គូ ឬ100គូ តាមលទ្ធភាព និងតាមទំហំទីតាំង ដែលគាត់បានត្រៀមទុក។ ចំណែកបង្កងសាច់ក្នុង 1គីឡូតម្លៃ 30 ទៅ 35ដុល្លារនៅក្នុងទីផ្សារបច្ចុប្បន្ន»។
លោកក៏បានបញ្ជាក់ឱ្យដឹងដែរថា ៖«សម្រាប់កូនបង្កងបច្ចុប្បន្ន ខ្ញុំផលិតលក់បាន 1ខែ 1ម៉ឺនក្បាល ឬខែខ្លះ 2ទៅ 3ម៉ឺនក្បាល គឺក្នុងការផលិតកូនបង្កងនេះយើងត្រូវប្រើពេល 45ថ្ងៃ ឯការចិញ្ចឹមបង្កងសាច់ ត្រូវប្រើពេល 6ខែ ទើបអាចចាប់លក់បាន ព្រោះអាស្រ័យលើស៊ីតណ្ហភាព បើមានកម្ដៅជិត 40អង្សា បង្កងឆាប់ធំធាត់បានល្អ ព្រោះវាស៊ីចំណីបានល្អ និងបង្កកំណើតលឿន តែបើមេឃត្រជាក់ បង្កងវាពុំសូវស៊ីចំណីទេ ហើយការបង្កកំណើតក៏មានលក្ខណៈយឺតដែរ។ នៅថ្ងៃខាងមុខ ខ្ញុំនឹងពង្រីកទីតាំងបន្ថែម ព្រោះបច្ចុប្បន្នតម្រូវការទាំងកូន ទាំងសាច់មានទីផ្សារកាន់តែកើនឡើង»។
លោក លាងឆាយ ក៏បានអះអាងដែរថា ៖ «ខ្ញុំមិនឱ្យអ្នកត្រូវការសាច់បង្កង និងទីផ្សារអស់សង្ឃឹមនោះទេ ព្រោះទិន្នផលបង្កងសាច់ និងដែលអាចប្រមូលបាននោះ បានមានវត្តមានលក់នៅលើទីផ្សារហើយ។ តម្រូវការអ្នកចង់ចិញ្ចឹមក៏មានការចាប់អារម្មណ៍ច្រើន និងកើនឡើងដែរពី 1ថ្ងៃទៅ 1ថ្ងៃ ព្រោះវាជាវារីវប្បកម្មប្រភេទថ្មី ប៉ុន្តែវាមានការលំបាកខ្លាំងដែរ ប្រសិនបើយើងមិនបំពេញតាមលក្ខណៈបច្ចេកទេសនៃការចិញ្ចឹមទេនោះ»។
លោក តាំង លាងឆាយ ក៏បានអះអាងថា ទីផ្សារវាមិនខ្វះឡើយ ហើយប្រសិនបើកសិករដែលបានប្រកបរបរចិញ្ចឹមបង្កងលក់នេះហើយ គឺអាចសម្ងំកើបប្រាក់ចំណូលខ្ទង់ម៉ឺនដុល្លារក្នុង 1ឆ្នាំៗ ពីរបរមួយនេះ។ សូមជម្រាបថា កសិដ្ឋានចិញ្ចឹមបង្កងនេះស្ថិតនៅបាត់ដំបង ដែលមានទីតាំងស្ថិតនៅក្នុងភូមិ13មករា ឃុំព្រែកព្រះស្តេច ស្រុកបាត់ដំបង ខេត្ដបាត់ដំបង៕