Скачать или смотреть TUME HURU YA TAIFA YA UCHAGUZI YAKAMILISHA MAANDALIZI YA UCHAGUZI MKUU 2025 MKOANI KATAVI.

Mratibu wa Uchaguzi Mkoa wa Katavi, Bi. Rebecca Msambusi, amesema maandalizi yote ya Uchaguzi Mkuu wa Oktoba 29, 2025 yamekamilika kikamilifu. Akizungumza na kituo cha redio cha Mpanda FM, leo Oktoba 23, 2025, Bi. Msambusi ameeleza kuwa uchaguzi huo utafanyika katika majimbo matano ya mkoa wa Katavi, Mpanda Mjini, Tanganyika, Nsimbo, Katavi na Kavuu. Amesisitiza kuwa jumla ya vituo 1,544 vya kupigia kura vimeandaliwa ili kuhakikisha mchakato wa uchaguzi unafanyika kwa utaratibu na ufanisi.

Ameeleza kuwa tangazo la uchaguzi limebandikwa katika vituo vyote vya kupigia kura likiwa na mfano wa karatasi ya kura kwa lengo la kuwaelimisha wananchi kuhusu utaratibu wa upigaji kura. Vituo vya kupigia kura vitafunguliwa saa moja kamili asubuhi na kufungwa saa kumi kamili jioni, wakati vituo vilivyoko magerezani na katika vyuo vya mafunzo vitafunguliwa saa mbili asubuhi na kufungwa saa tisa alasiri.

Bi. Msambusi amefafanua kuwa mpiga kura atakayestahili kupiga kura ni yule aliyejiandikisha katika Daftari la Kudumu la Wapiga Kura, mwenye kadi halali ya mpiga kura, na anayepiga kura katika kituo alichopangiwa au mwenye kibali cha kupiga kura kituo kingine kwa mujibu wa sheria. Ameongeza kuwa mawakala walioapishwa watakuwepo katika vituo vyote vya kupigia kura ili kuhakikisha mchakato wa upigaji kura unafanyika kwa mujibu wa sheria na kwa utulivu.

Aidha, amesema Tume Huru ya Taifa ya Uchaguzi itatangaza matokeo mara baada ya kujumlisha kura kukamilika, ambapo matokeo ya urais yatatangazwa ndani ya saa 48 hadi 72 baada ya upigaji kura. Amewataka wananchi wote wa Mkoa wa Katavi kujitokeza kwa wingi siku ya uchaguzi ili kutekeleza haki yao ya kikatiba ya kuchagua viongozi wao, na amekumbusha kaulimbiu ya Uchaguzi Mkuu wa mwaka 2025 isemayo: “Kura Yako Haki Yako, Jitokeze Kupiga Kura.”