ابتدا الليل | كلمات رائد نايف واداء سعد فيصل

القصيدة :

ابتدا الليل الطويل وحضّر الشاعر خياله
والقصيد اللي مايحمى ماقفه .. كبه وخله

كل شاعر يفتخر فاللي يصوغه من حلاله
والعيون تشوف فرق الجدي من بين الاهلّه

والقصيد اللي تبى تلقاه حتى فالبقاله
لا لقيت اللي يقوله بين كل الناس قلّة :

مبدع الالهام دايم ياخذ الالهام باله
عند بيتً له مقام وعند فكره مستقلّه

ماكتبت الشعر والله غايتي كسب الجماله
الجماله فالفعول اللي تثبّتها .. الادلة

إحتميت العقل عن درب التسرّع والجهاله
ولا حسبت حساب للي تدفن الضحكات غِلّة

لو كسبت الي كسبت وجبت عز وجبت طاله
شيء عادي لو خسرت اللي كسبت بربع زلة

من يدوّر من عيون الناس .. تقدير وعدالة
مثل من يمشي برجله للسراب ، ولا وصل له

واحدً يفتكّ ميقافه وحمله لا ارتكاله
ياعسى سود الليالي ماتجيه ولا تعلّه

ماحرمني من لذيذ النوم .. من شحّ بوصاله
ماحرمني غير سيف العلم الابيض يوم اسلّه

صاحبً مادون ميقافه عذر بعد اتصاله
والله اني مارقدت الليل كله واقفً له

ليلةً فيها السعادة تشبه العيد وهلاله
تِفرح القلب الحزين وتبري اللي فيه خِلّه

مرحبا باللي حضر في حفلنا واللي عنا له
مرحبا على الشحم والعود مع فنجال دلة

مرحبا ترحيبةً مثل المطر لا ارزم خياله
يجعل وجيه العباد اللي تشوفه مسفهلّه

مرحبا في حفلة اللي باذلً حاله وماله
في سبيل المرجلة والطيب دايم يستحله

انت ياعبدالعزيز محمد الوافي لحاله
وقفتك وقفة عزيز وكل معقودً تحله

ضابطً لا جاته الدعوى يخليها سهالة
والعلوم الغانمة ينزل عليها بالمظلّة

يكفي ان ابوك دايم قمة الامجاد فاله
والبشر تطلع وتنزل لاكن محمد محلّه

لا تدوّر لا غزاك الوقت .. رجالً بداله
حطها في كف من كفّه تفك الهم والله

من بعاصيص الشهامة والمروّه والجزاله
سِعد منهم فالمواقيف العظيمة محزم له

مع خوالً عزمهم ماينكسر ف ايات حالة
من بني دسمان ساس العزّ والتاريخ كله

والولد وان طابوا اعمامه وطابوا له خواله
كل جزلً يحتويه .. وكل مطنوخً يدلّه

ياذوي سريع ربعي والفخر لا جاء مجاله
اتباهى وافتخر في فعلكم دايم واجلّه

السريعي نجدت المضهود لا شانت لياله
فزعة اللي فزعته تشفي لها عشرين علة

من بني عاصم دروع الجنب وجبال الشكالة
قدرهم نعرف مكانه بين الافلاك المطلّة

يوم للنخوات صوت ويوم للخيل اجتواله
والله ان الفوز من حظً العصيمي عادةً له

كل الافعال القوية والصعيبة والمحالة
تنتهي مع كلمة ابشر واحتزم بي والله الله

فوق يامركي عتيبة بالشموخ وبالاصالة
ياظلالً كلنا نمشي ونفخر تحت ظلّه

تمشي الايام دايم بين ميله واعتداله
بس مايمشي بوسط عروقنا مثقال ذلّة

تمت وصلوا على اللي جابه الله بالرسالة
سيرته سيرة عظيم وملّته هي خير ملّة

وانطوى الليل الطويل وغادر الشاعر خياله
والعيون تشوف فرق الجدي من بين الاهلّه