Скачать или смотреть អត្ថបទ រឿងថាដូ និងភ្លើងឆេះស្រូវ - ភាសាខ្មែរ ថ្នាក់ទី៨ (ការស្ដាប់)

អត្ថបទ រឿងថាដូ និងភ្លើងឆេះស្រូវ - ភាសាខ្មែរ ថ្នាក់ទី៨ (ការស្ដាប់)

#រឿងថាដូនិងភ្លើងឆេះស្រូវ
នៅលើភ្នំប្រទេសជប៉ុន គេសង្កេតឃើញមានផ្ទះដ៏តូចមួយសង់ប្របនឹងចង្កេះភ្នំ។ ក្នុងផ្ទះនោះ មានសមាជិកពីរនាក់រស់នៅគឺ ថាដូ និងជីតារបស់វា។ នៅតាមល្បាក់ភ្នំជុំវិញផ្ទះរបស់ថាដូ មានស្រែជាច្រើនកន្លែង ដែលអ្នកភូមិតែងនាំគ្នាធ្វើជារៀលរាល់ឆ្នាំ ហើយជីតានិងចៅរមែងចូលរួមជួយដល់ក្រុមកសិករទាំងនោះ មិននឿយណាយឡើយ។

មកដល់ពេលនេះថាដូ មានអាយុប្រមាណជាប្រាំឆ្នាំប៉ុណ្ណោះ។ ប៉ុន្តែវាមានសមត្ថភាពខ្ពស់ក្នុង ការពិចារណាទៅលើអត្ថប្រយោជន៍នៃដំណាំស្រូវ សម្រាប់អាយុជីវិតរបស់ប្រជាជនជប៉ុន។ ស្រប ជាមួយនេះ លោកតាបានក្រើនរំឮកជារឿយៗដល់ថាដូ ៖ « ស្រូវជាអាហារ ដ៏ចាំបាច់បំផុតសម្រាប់យើងទាំងអស់គ្នា បើសិនជាមានរឿងអ្វីមួយ កើតឡើងចំពោះវា យើងប្រាកដជាដាច់ពោះស្លាប់ជាមិនខាន ពីព្រោះយើងគ្មានអ្វី បរិភោគទេ »។ ថាដូមិនចង់ដាច់ពោះស្លាប់ទេ។ ហេតុនេះហើយបានជាវាត្រេកអរណាស់ នៅពេលឃើញស្រូវចាប់ផ្ដើមទុំ និងឃើញរដូវចម្រូវខិតជិតចូលមកដល់។

នៅថ្ងៃមួយ នាពេលរសៀលបន្តិច មានហេតុការណ៍មយយកើតឡើង គួរឱ្យតក់ស្លុត។ ដំបូងគេឃើញជីតាថាដូឈរខាងក្រោយស្រែ ឯភ្នែកទាំងគូរបស់លោកតាបាញ់ឆ្ពោះទៅសមុទ្រ ស្រាប់តែទឹកមុខលោកតាឡើងស្លេកស្លាំង។ ជាបន្ទាន់នោះ គាត់ស្រែកយ៉ាងភ្លាត់សំឡេងទៅកាន់ថាដូ៖ « ចៅឯងរត់ឱ្យលឿន ទៅយកមែក ឈើដែលកំពុងឆេះនោះ មកឱ្យតា ! ឆាប់ឡើង ! »។ ឮដូច្នោះ ថាដូក៏ប្រញាប់ប្រញាល់រត់សំដៅភ្នក់ភ្លើង ហើយក៏កាន់មែកឈើមួយមែក ដែលមានរងើកក្រហមច្រាលមកឱ្យជីតាវា។ ភ្លាមនោះ លោកតាក៏បោះមែកឈើនោះចូលទៅក្នុងស្រែ ធ្វើឱ្យស្រូវឆេះឡើងមួយរំពេច។ គាត់បានបញ្ជាថាដូឱ្យធ្វើកិច្ចការដដែលនេះទៀត។ ថាដូនឹកឆ្ងល់នឹងទង្វើរបស់លោកតាយ៉ាងខ្លាំង វាបោះជំហានស្ទើរមិនរួច។ វាយំរួចសួរបញ្ជាក់ ៖ « លោកតា ! លោកតាកំពុងដុតស្រូវហើយណា ! »។ លោកតាគ្រាន់តែងក់ក្បាល តែគ្មានចាប់អារម្មណ៍ចំពោះសម្ដីថាដូឡើយ ហើយនៅតែប្រើថាដូឱ្យដុតស្រូវនៅគ្រប់ជ្រុងស្រែទៅទៀត។

គ្រានោះ ផ្ទៃស្រែដែលធ្លាប់តែឃើញស្រូវក្រហមទុំ ក៏ប្រែជាមានពណ៌ខ្មៅគ្របដណ្ដប់ ដោយផ្សែងខ្មូល ខ្មាញ់អណ្ដែតទៅលើអាកាស។ ទិដ្ឋភាពនេះ បានធ្វើឱ្យអ្នភូមិ ទាំងចាស់ ទាំងក្មេង នាំគ្នារត់ឡើងមកលើភ្នំ ដើម្បីពន្លត់អគ្គិភ័យជួយស្រោចស្រង់ដល់វត្ថុ ដ៏មានតម្លៃសម្រាប់ទ្រទ្រង់អាយុជីវិតរបស់ពួកគេ។ គ្រាន់តែឡើងមក ដល់ស្រែភ្លាម បុរសម្នាក់មានមាឌមាំ បានសួរទាំងកំហឹងទៅកាន់លោកតារបស់ថាដូ ៖ « ហេតុអ្វីបានជាមាន រឿងនេះកើតឡើង ? តើអ្នណាជាអ្នកប្រព្រឹត្ត ប្រាប់ មក ? »។ លោកតាបានឆ្លើយមួយៗ ទៅកាន់បុរសនោះ ៖ « ខ្ញុំជាអ្នកប្រព្រឹត្ត »។ បុរសមាឌសួរបន្តទៀត ៖ « ហេតុអ្វី ? ហេតុអ្វី ?»។ លោកតាបានចង្អុលទៅសមុទ្រ។ អ្នកស្រុកមើលតាមដៃគាត់ ឃើញរលកដ៏ធំសម្បើមមួយកំពុងបោះពួយយ៉ាងលឿនស្លេវ សំដៅមករកភូមិអ្នកស្រុក។ ពួកគេឈរ ទ្រឹងគ្មានកម្រើក ឬ និយាយស្ដីអ្វីឡើយ។ ទឹកបានរត់រំលងភូមិនោះ បោកផ្ទប់ចង្កេះភ្នំលាក់យ៉ាងខ្លាំង។ ប្រជាជនមានទឹកមុខតក់ស្លុត និងព្រួយកង្វល់ព្រោះឃើភូមិរបស់ខ្លួនទាំងមូលនៅក្រោមទឹក។ ទីបំផុតទើបពួកគេយល់ពីមូលហេតុ ដែលនាំឱ្យលោកតាសម្រេចចិត្តដុតស្រូវ។

ប្រសិនជាប្រិយមិត្តអ្នកស្ដាប់ទាំងអស់មានបំណងចង់ឧបត្ថម្ភគាំទ្រ និងលើកទឹកចិត្តចំពោះការផលិតអត្ថបទការស្ដាប់ជាសំឡេងរបស់ខ្ញុំ ក៏អាចចូលរួមឧបត្ថម្ភបានតាមរយៈ៖
គណនីអេស៊ីលីដាទាន់ចិត្ត ៖ 1287-0708-0
ឬ គណនីធនាគារអេស៊ីលីដា៖ 34760356300515
ឬ Facebook Page :   / edumediacambodia  

To get more news, knowledge and entertainment on
Facebook Page:   / edumediacambodia