Скачать или смотреть ផែនទីខ្នាត ១/២៥ ០០០ បង្ហាញកាន់តែជាក់លាក់ពីស្ថានភាពព្រំដែនកម្ពុជា-វៀតណាម

(ភ្នំពេញ)៖ ផែនទីព្រំដែនកម្ពុជា និងវៀតណាម មាត្រដ្ឋាន ឬខ្នាត ១/២៥ ០០០ ត្រូវបានបោះពុម្ពរួចរាល់ ហើយប្រទេសទាំងពីរបានយកទៅរក្សាទុករៀងៗខ្លួនកាលពីថ្ងៃទី០១ ខែសីហា ឆ្នាំ២០២០កន្លងទៅនេះ។ ផែនទីខ្នាត ១/២៥ ០០០ ជាខ្នាតមួយនៅលើផែនទី ដែលអាចឱ្យគេកំណត់ និងមើលទីតាំងព្រំដែនរវាងប្រទេសទាំងពីរបានច្បាស់លាស់ជាង ផែនទីខ្នាត ១/១០០ ០០០ ឬផែនទីខ្នាត ១/៥០ ០០០ ដែលកម្ពុជាធ្លាប់មាននាពេលកន្លងមកនោះ។

លោកស្រី កុយ ពិសី អនុប្រធានលេខាធិការដ្ឋានអចិន្រ្តៃយ៍នៃអាជ្ញាធរជាតិទទួលបន្ទុកកិច្ចការព្រំដែន បានបញ្ជាក់ឱ្យដឹងថា ផែនទីព្រំដែនខ្នាត ១/២៥ ០០០ ត្រូវបានរៀបចំឡើងដោយគណៈគម្មការព្រំដែនកម្ពុជា និងវៀតណាម ដោយយោងតាមផែនទីបោនខាង ១/១០០ ០០០ បន្សល់ទុកពីសម័យអាណានិគមបារាំង ហើយត្រូវបានបោះពុម្ពដោយក្រុមហ៊ុននៅប្រទេសដាណឺម៉ាក។

បើតាមលោកស្រី កុយ ពិសី ផែនទីមាត្រដ្ឋាន ១/២៥ ០០០នេះ ជាផែនទីបង្ហាញព្រំសីមារវាងកម្ពុជា និងវៀតណាម ដែលបានព្រមព្រៀងគ្នារួចរាល់ប្រមាណ ៨៤ភាគរយនោះ។

លោកស្រី ក៏បានពន្យល់ពីភាពខុសគ្នារវាងផែនទីខ្នាត ១/១០០ ០០០ និងខ្នាត ១/២៥ ០០០ នេះផងដែរ។ លោកស្រី កុយ ពិសី បានអះអាងថា ខ្នាត ១/២៥ ០០០ គ្រាន់តែជាខ្នាតថ្មីមួយដែលត្រូវបានពង្រីកមាត្រដ្ឋានលើផែនទីឱ្យកាន់តែធំងាយស្រួលមើល និងមានការបញ្ជាក់កាន់តែច្បាស់លាស់លើស្ថានភាពព្រំដែនជាក់ស្តែងលើដី នៅក្នុងផែនទីនេះ។ រីឯផែនទីបោនខ្នាត ១/១០០ ០០០ គឺមានតែខ្សែព្រំដែន ហើយមិនមានអ្វីបង្ហាញជាក់លាក់ច្រើន ដែលនាំឱ្យមានការលំបាកក្នុងការពិនិត្យ និងផ្ទៀតផ្ទាត់។

ផែនទីខ្នាត ១/២៥ ០០០នេះ ត្រូវបានបោះពុម្ព ៥០០ច្បាប់ដើម ក្នុងនោះភាសាខ្មែរ-វៀតណាម ចំនួន ២៥០ច្បាប់ និងភាសាវៀតណាម-ខ្មែរចំនួន ២៥០ច្បាប់ ដែលបានចងជាអាល់ប៊ុម (album) បានល្អ ត្រូវតាមបទដ្ឋានបច្ចេកទេស ដើម្បីទុកប្រើប្រាស់ក្នុងប្រទេសរៀងៗខ្លួនតទៅ។

សូមបញ្ជាក់ថា កម្ពុជា-វៀតណាម មានព្រំដែនគោកជាមួយគ្នាប្រវែង ១,២៧០គីឡូម៉ែត្រ។ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក ង្វៀន សួនហ្វ៊ុក នាយករដ្ឋមន្ត្រីវៀតណាម កាលពីថ្ងៃទី០៥ ខែតុលា ឆ្នាំ២០១៩ បានចុះហត្ថលេខាទទួលស្គាល់បង្គោលព្រំដែនប្រទេសទាំងពីរដែលសម្រេចបានចំនួន ៨៤ភាគរយ។ ការចុះហត្ថលេខាទទួលស្គាល់បង្គោលព្រំដែននៃប្រទេសទាំងពីរ គឺជាព្រឹត្តិការណ៍ប្រវត្តិសាស្ត្រថ្មីមួយទៀតសម្រាប់កម្ពុជា និងវៀតណាម។

ដោយឡែកបញ្ហាព្រំដែន ដែលនៅសេសសល់ ភាគីទាំងពីរក៏បន្តប្ដេជ្ញាចិត្តដោះស្រាយ និងបោះបង្គោលព្រំដែនខណ្ឌសីមា ឱ្យបានចប់សព្វគ្រប់ផងដែរ៕

ទូរទស្សន៍ព័ត៌មាន Fresh News ផ្សាយគ្របដណ្តប់ទូទាំងប្រទេសតាមរយៈផ្កាយរណប និងខ្សែកាប PPCTV ប៉ុស្តិ៍ 76, DTV ប៉ុស្តិ៍ 19, SkyOne ប៉ុស្តិ៍ 26, One TV ប៉ុស្តិ៍ 18, CCTV ប៉ុស្តិ៍ 37 និងទូរទស្សន៍ខ្សែកាប ២៥រាជធានី-ខេត្ត និងផ្សាយព័ត៌មានថ្មីៗចុងក្រោយតាមប្រព័ន្ធ App, Website, TV Channel, Radio, YouTube, Facebook, English, Chinese, Telegram.