Aşıq Ədalət Nəsibov -"Naxçıvanı"

ƏDALƏTİN SAZINDA
Bəhmən Vətənoğlu

Əsli nalə çəkər zülfü pərişan,
Fəqan eylər Ədalətin sazında.
Kərəm çıxar alovların içindən,
Üsayan eylər Ədalətin sazında.

Haray çəkər: - Dünya mənə dar deyin,
Xan evində Gülgəz yarım var deyin.
Tufarqanlı Aşıq Abbas yar deyin
Tüğyan eylər Ədalətin sazında.

Dağ çəkilər neçə dərdə, məlala,
Cilvələnər hər bənövşə, hər lala.
Zöhrə deyin Tahir yetər vüsala,
Dövran eylər Ədalətin sazında.

Gələr qızılgülü dərməyə Dilqəm,
Dərib pünhan yerdə sərməyə Dilqəm.
O dünyada yarı görməyə Dilqəm
Güman eylər Ədalətin sazında.

Libası poladdan geyən Koroğlu,
Ulu şahlar boynun əyən Koroğlu.
Nərəsindən yer titrəyən Koroğlu,
Cövlan eylər Ədalətin sazında.

Qərq eyləyər xəyallara, qananı,
Bircə anda dolandırar cahanı.
Zərif tellər hər duyğusuz nadanı
İnsan eylər Ədalətin sazında.

Nadan kəslər anlamıram dərdi nə
Bağban bağdan dərmədi nə,dərdi nə.
O barmaqlar çox Bəhmənin dərdinə,
Dərman eylər Ədalətin sazında.

   • Ədalət Nəsibov  yanıq Kərəmi