ယခင် မင်းသားဇေယျာ ယခု ဦးပညာဝံသ

မြန်မာ့ရုပ်ရှင်လောကမှာ နာမည်ကျော် မင်းသားတွေဖြစ်တဲ့ ကျော်သူ၊ စိုးသူ၊ သီဟတင်စိုးတို့နဲ့ ခေတ်ပြိုင် ဇာတ်ကားပေါင်းများစွာမှာ ပါဝင်သရုပ်ဆောင်ခဲ့တဲ့ ရုပ်ရှင်မင်းသားဇေယျာဟာ သာသနာ့ဘောင်မှာ ပျော်မွေ့သူအဖြစ် နေထိုင်ဖြတ်သန်းလျက်ရှိပါတယ်။

သူဟာ အနုပညာလောကမှာကျင်လည်ခဲ့စဉ်က ရုပ်ရှင်ဇာတ်ကားပေါင်း ၆၀ ကျော် နဲ့ ဗီဒီယို ကားပေါင်း ၃၀၀ ကျော်မှာ ပါဝင်သရုပ်ဆောင်ခဲ့တဲ့ မင်းသားကြီးဖြစ်ပါတယ်။

မင်းသားတယောက်ဖြစ်ပေမယ့် လောကီအာရုံ ကာမဂုဏ်တွေကို စွန့်တဲ့နေရာမှာ လူမသိ သူမသိ ခပ်ဆိပ်ဆိပ်နဲ့သာ သာသနာ့ရိပ်မှာခိုလှုံခဲ့တာဖြစ်ပါတယ်။

အရင်က မင်းသားဇေယျာ အခုအခါမှာ ဦးပညာဝံသဖြစ်တဲ့ ဘုန်းဘုန်းကြီးဟာ ဗုဒ္ဓဘုရားရှင်ရဲ့သာသနာ့ရိပ်မှာ ခိုလှုံနေတာဟာ အခုဆိုရင် ဝါတော် ၈ ဝါတောင် ရရှိလို့နေပါပြီ။

မင်းသားဇေယျာဟာ ပြည်သူချစ်အနုပညာရှင် ဖိုးပါကြီး၊ ရုပ်ရှင်နဲ့ပြဇာတ်မင်းသမီး တေးသံရှင် မေချစ်တို့ရဲ့ အငယ်ဆုံးသားလည်းဖြစ်ပါတယ်။

ရဟန်းတပါးအနေနဲ့ အထူးအထွေ လိုအပ်ချက်မရှိလှပေမယ့် သာသနာ့ဘောင်မှာ အေးချမ်းစွာ တရားကျင့်ကြံ သီတင်းသုံးနိုင်ဖို့အတွက် တပါးကျောင်းလေးကိုတော့ လိုအပ်နေတယ်လို့ ဘုန်းဘုန်းက မိန့်ပါတယ်။

ဘဝရဲ့အကောင်းဆုံးအချိန်တွေကို အနုပညာအလုပ်တွေနဲ့ ဖြတ်သန်းခဲ့တဲ့ မင်းသားဇေယျာဟာ အခုအခါမှာတော့ ဘုန်းဘုန်းဦးပညာဝံသအဖြစ် သာသနာ့ဘောင်မှာ မွေ့လျော်နေပြီဖြစ်ပါတယ်။

ဘုန်းဘုန်းဟာ ရန်ကုန်မြို့၊ သန်လျင်မြို့နယ် သဘာဝတရားရိပ်သာမှာ တရားကျင့်ကြံအားထုတ်လျက်ရှိပါတယ်။