කතානායක බලන් ඉන්න කොට මගේ ලිපිගොනු සනත් නිශාන්ත මන්ත්‍රීවරයා සොරකම් කළා.

කතානායක බලන් ඉන්න කොට මගේ ලිපිගොනු සනත් නිශාන්ත මන්ත්‍රීවරයා සොරකම් කළා - විපක්ෂ නායකවරයාගෙන් දැඩි චෝදනාවක්

පාර්ලිමේන්තුවේ ස්ථාවර නියෝග 27 (2) යටතේ විපක්ෂ නායකවරයා වන තමා විසින් පාර්ලිමේන්තුවේ දී ප්‍රශ්න කර සිටින විට ආණ්ඩු පක්ෂයේ මන්ත්‍රීවරුන් විසින් සභාගර්භය මැදට පැමිණ එම ප්‍රශ්න කිරීමට බාධා සිදු කළ බවත් එහි දී තමා අත තිබු ලිපිගොනු සියල්ල පුත්තලම් දිස්ත්‍රික් පාර්ලිමේන්තු මන්ත්‍රී සනත් නිශාන්ත මන්ත්‍රීවරයා උදුරා ගත් බවත් එම ලිපිගොනු තුළ වැදගත් ලිපි රාශියක් තිබූ හෙයින් එම ලිපි නොමැතිව තමාගේ ඉදිරි කටයුතු සිදු කළ නොහැකි බවත් විපක්ෂ නායකවරයා පැවසීය.

කතානායකවරයා ඉදිරියේ එම ලිපිගොනු සොරා ගැනීමට සනත් නිශාන්ත මන්ත්‍රීවරයා කටයුතු කළ හෙයින් ඒ සම්බන්ධයෙන් ගන්නා ක්‍රියාමාර්ග කවරේද කියා ප්‍රශ්න කර සිටි විපක්ෂ නායකවරයා කියා සිටියේ මේ නිසා විපක්ෂ නායකවරයාගේ අයිතිවාසිකම් උල්ලංඝනය වී ඇති බව යි.

මේ වන විට වේත්‍රධාරීතුමාට ලැබී ඇති ලිපි ගොනුවේ ඇති වැදගත් ලිපි රාශියක් අඩු වී ඇති බවත් මේ සොරකමට පොළොන්නරුවේ සමරවික්‍රම මන්ත්‍රිවරයා පවා හවුල් වී ඇති බවත් මේ සම්බන්ධයෙන් කතානායකවරයා පවා වගකිව යුතු බවත් විපක්ෂ නායක සජිත් ප්‍රේමදාස මහතා අද (21) පාර්ලිමේන්තුවේදී පැවසීය.

රටේ ජනතාව බඩගින්නේ සිටින විට ආණ්ඩු පක්ෂයේ හොර රැළ මෙන් රට බංකොලොත් කළ අයගේ උපන් දින කේක් කෑමට තමා නොගිය බවත් මොවුන්ට විරුද්ධව දඩුවම් ලබා දිය යුතු බවත් ඊට අමතරව නැති වූ ලිපි ගොනු සියල්ල නැවත ලබා දිය යුතු බවත් පැවසූ විපක්ෂ නායකවරයා කියා සිටියේ මේ සිදුවීම නලින් බණ්ඩාර මහතා වීඩියෝ කළ නිසා එය සාක්ෂියක් ලෙස පවතින බව යි.

පාර්ලිමේන්තුවේ මිරිස් කුඩු ගැසූ සිදුවීම් පවා අනාවරණය වූයේ එසේ වීඩියෝ කිරිම නිසා බවත් එම නිසා කිසිම පුද්ගලයක-ුගේ හැසිරිමක් සම්බන්ධයෙන් තමා බිය නොවන බවත් විපක්ෂ නායක සජිත් ප්‍රේමදාස මහතා මෙහි දී වැඩිදුරටත් පැවසීය.