Alalá nº 152 "Os cabezudos de Santiago de Compostela" - TVG

Alalá nº 152 "Os cabezudos de Santiago de Compostela" - TVG
Emisión en Televisión de Galicia: 17-06-10 - Gravación en Santiago
http://alala.crtvg.es

Os cabezudos de Santiago son únicos en España porque bailan. E non bailan de calquera xeito. Debaixo das súas simpáticas cabezas están algúns dos mellores bailadores de Compostela. Por iso velos é todo un espectáculo. Pola alegría das máscaras, da música e dos bailes do seu repertorio. Un repertorio que interpreta de xeito maxistral a charanga que os acompaña e que inclúe xotas, muiñeiras, rumbas, pasodobres e ata o mítico baión.

Houbo un tempo en que os cabezudos ían sémpre acompañando ós xigantes e chegaron incluso a bailar no altar maior da catedral, porque segundo parece a súa orixe está relacionada coas festas relixiosas. O certo é que hai máscaras semellantes a estas en todo o mundo, desde Rusia ata a Polinesia, e en Galicia eran habituais ata non hai moitos anos nas festas de case tódalas vilas.

Os cabezudos teñen unha compoñente festiva e misteriosa que os fai irresistibles para grandes e pequenos. E máis se bailan tan ben como o fan os de Compostela, que non poden faltar nas festas do Apóstolo nin por suposto nas da Ascensión, as festas que os composteláns senten máis súas.