Nə müddətdir yol gedirəm – Ağakişi Kazımov (1995)

Veriliş xalq artisti, professor, görkəmli rejissor Ağakişi Kazımovun yaradıcılığına həsr olunub.

Aparıcı və ssenari müəllifi – Yaqub Əlioğlu Məmmədov

Verilişi hazırlayanlar:
Rejissor – Kərim Kərimov
Operator – Aydın Mansurov
Musiqi tərtibatçısı – Minurə Əfəndiyeva

Ağakişi Şəmməd oğlu Kazımov 28 noyabr 1935-ci ildə anadan olub.
1952-1957-ci illərdə Azərbaycan Dövlət Teatr İnstitutunun aktyorluq fakültəsində ali təhsil almışdır. Bir müddət aktyor kimi fəaliyyət göstərən Ağakişi Kazımov, 1964-cü ildə Leninqrad Dövlət Teatr, Musiqi və Kinematoqrafiya İnstitutunun rejissorluq fakültəsinə daxil olmuşdur. Leninqradda (indiki Sankt-Peterburq) təhsilini başa vuran Ağakişi Kazımov, Kazanda Q.Kamal adına Tatarıstan Dövlət Akademik Dram Teatrının səhnəsində M.Bayciyevin "Duel" dramına və C.Cabbarlının "Aydın" əsərinə tatarca quruluş vermişdir.
1969-1970-ci illərdə O, Sumqayıt Dövlət Musiqili Dram Teatrında baş rejissor kimi fəaliyyət göstərmişdir. O bir rejissor kimi bu teatrın səhnəsində "Müsibəti Fəxrəddin" (N.Vəzirov), "Toy" (S.Rəhman), "Təzə gəlin" (S.Dağlı), "Arşın mal alan" (Ü.Hacıbəyov), "Xoşbəxtliyə gedən yol" (İ.Dunayevski) əsərlərinə səhnə həyatı bəxş etmişdir. Sonralar rejissor Gənc Tamaşaçılar Teatrının səhnəsində "Məlik Məmməd" (Ə.Abbasov), "Hacı Qənbər" (N.Vəzirov), "Kiçik təpə" (N.Xəzri), "Büllur sarayda" (İ.Əfəndiyev) və s. müxtəlif janrlı əsərlərə quruluş vermişdir. A.Kazımov Akademik Milli Dram Teatrında bir çox müxtəlif janrlı "Darıxma, ana!" (N.Dumbadze), "Qəribə oğlan", "Büllur sarayda" (İ.Əfəndiyev), "Mirzə Şəfi" (N.Xəzri), "Sehrli alma" (Y.Lada), "Çahargah fantaziyası" (K.Kərimov), "Od gəlini" (C.Cabbarlı), "Vaqif" (S.Vurğun), "Özümüzü kəsən qılınc", "Dar ağacı", "Rəqabət", "İkinci səs" (B.Vahabzadə) və onlarca başqa əsərlərə rejissorluq etmişdir.
Qazandığı sənət uğurlarına görə Ağakişi Kazımov 1987-ci ildə Əməkdar İncəsənət Xadimi, 2000-ci ildə Xalq Artisti fəxri adlarına layiq görülmüşdür. O, Prezident təqaüdçüsüdür.