Скачать или смотреть మాయా రెక్కల గుర్రం తెలుగు కథ || Magical flying horse Fairy tales || Grandma stories

మాయా రెక్కల గుర్రం తెలుగు కథ || Magical flying horse Fairy tales || Grandma stories
#మాయారెక్కలగుర్రంతెలుగుకథ #Magicalflyinghorse #Moralstories

*********** మాయా రెక్కల గుర్రం ***********
అనగనగా రామాపురం అనే ఊరిలో చంద్రయ్య అనే ఒక రైతు వుండేవాడు. అతను చాలా మంచివాడు.. తనకు ఉన్నంతలో ఎదుటి వారికి సహాయం చేయడమే తప్పా ఎవరికీ ఎటువంటి ఆపదా తలపెట్టేవాడుకాదు. అతనికి వున్న కొద్దిపాటి భూమిలో చెరకు పంటను సాగు చేసేవాడు.. గత ఏడాది కంటే, ఈ ఏడు పంట బాగా పండింది.. పైగా చెరకు గడలు కూడా చాలా తీయగా వున్నాయి.. తొందరలోనే పంటను అమ్మి కొద్దో గొప్పో వెనకేసుకోవాలనే ఆలోచనలో వున్నాడు.
ఒకనాడు చేను దగ్గరకు వచ్చిన చంద్రయ్యకు కొన్ని చెరుకు గడలు మాయం కావడం కనిపించింది..
" చాలా తియ్యాగా వున్నాయని ఎవరో నాలుగు గడలు తీసుకుని వెళ్లివుంటారులే... నన్ను అడిగితే మాత్రం ఇవ్వకపోదునా, ఏంటీ.. నా చెరకు వాళ్ల మనసునైనా తీపి చేయనియ్యి.. " అని ఆనంద పడ్డాడు.
మరునాడు చేను దగ్గరకు వచ్చిన చంద్రయ్యకు .. మళ్లీ పంటలో కొంత భాగం మాయం కావడం కనిపించింది.
"ఏమయ్యిందీ.. ఎందుకు కొంత భాగం దొంగతనానికి గురి అయిందీ.. నాకా ఇక్కడంటూ ఎవరూ శత్రువులు లేరు... ఒకవేళ ఎవరైనా బయట ఆకతాయిల పనా.." అనే ఆలోచనలో పడ్డాడు..
అలా చెరకు పంట రోజూ కొద్దికొద్దిగా తరిగిపోతూ చేనులో చివరికి సగమే మిగిలింది.. ఇక ఆలస్యం చేస్తే ఆ ఉన్నది కూడా దక్కదని భయపడిన చంద్రయ్య ఆ దొంగ ఎవరో కనిపెట్టాలని ఆ రోజు రాత్రికి అక్కడే కాపలా కాసాడు. కొంత సమయం తరువాత ఆకాశంలోంచి ఎగురుకుంటూ వచ్చిన మాయా రెక్కల గుర్రం చెరకు పొలంలో దిగింది.. అది తెల్లరంగులో మెరిసిపోతూ వుంది. దాన్ని చూస్తునే చంద్రయ్య ఆశ్చర్యపోయాడు.
" ఓహో.. నువ్వా.. రోజూ నా పంటను మాయం చేస్తున్నదీ.. ఈ రోజు నిన్ను ఎలాగైనా పట్టుకుని చెట్టుకు కట్టేస్తాను.. "
దర్జాగా తియ్యటి చెరకును లొట్టలేసుకుంటూ తినసాగిందా రెక్కల గుర్రం. దాన్ని బంధించడానికి చంద్రయ్య చాటుగా వెనుకనుంచి వెళ్లాడు.. అతడి రాకను గమనించిన గుర్రం .. వేగంగా గాలిలోకి లేచింది.. అంతే.. ఒక్కసారిగా దాని తోకను పట్టుకున్నాడు. దానితో పాటే ఆకాశంలోకి ఎగిరిపోయాడు..
అలా ఆకాశంలో గుర్రంతో పాటే దాని తోక పట్టుకుని ప్రయాణించిన చంద్రయ్య.. మాయాలోకం చేరుకున్నాడు. అదొక అందమైన లోకం.. అక్కడంతా తెల్లటి మంచుతో మెరిసిపోతూవుంది. ఆ ప్రదేశాన్ని చూసి అబ్బురపడ్డాడు. అక్కడొక మామిడి చెట్టు కనిపించింది. ఆ చెట్టుకు మొత్తం బంగారు మామిడిపండ్లే... వాటిని చూసి ఆశ్చర్యపోయాడు.
అప్పుడే అక్కడకు వచ్చిన రెక్కల గుర్రం ఇలా అన్నది.
" చంద్రయ్యా.. ఆ బంగారు మామిడి పండ్లు కొన్ని కోసుకో.. నీ కూడా ఇంటికి తీసుకుని వెళ్లు.. నీకిక ఏ లోటూ వుండదు.. "
"వద్దు..వద్దు... నాకు ఎలాంటి అత్యాశా లేదు.. పైగా, దొంగ తనం చేయడం తప్పు... ఆ విషయం నీకు చెప్పాలనే నీ వెంట వచ్చాను.. "
" శభాష్ చంద్రయ్యా.. శభాష్.. నీవు చాలా గొప్పవాడవు.. నీవు నా మెప్పుపొందావు..
మా లోకంలో బంగారం, వజ్రవైడూర్యాలు లాంటి విలువైనవి ఎన్నో వున్నాయి... కానీ ఏం లాభం, ఆకలి తీర్చే ఆహారం లేదు.. అందుకే నేను అక్కడికి వచ్చి నీ తీయనైన చెరకును తిన్నాను.
మీ లోకంలో ఎంతో ఇష్టంగా తినడానికి పంచభక్ష పరమాన్నాలు వున్నా.., అందరూ వాటిపై కంటే ఇలాంటి విలువైన వాటికే ఎక్కువ ప్రాధాన్యత ఇస్తారు. అయితే, నీవు అందరిలా అత్యాశకు పోకండా నీ మంచి గుణాన్ని చాటుకున్నావు..
కాదనకుండా నేనిచ్చే వీటిని తీసుకో.. నీ మంచితనం ముందు ఈ కానుకలు కూడా చాలా తక్కువే చంద్రయ్యా.. " అని బుట్ట నిండుగా బంగారు మామిడి పండ్లు ఇచ్చింది. తిరిగి ఈ లోకానికి తీసుకుని వచ్చి దింపింది మాయా రెక్కల గుర్రం..
అందుకే పెద్దలు చెబుతారు.. " మంచి గుణం కలిగిన వారికి ఎప్పుడూ మంచే జరుగుతుంది."