ბოლო წლებში საქართველოს უძრავი ქონების ბაზარზე ისეთი საინვესტიციო შეთავაზებები გაჩნდა, რომლებიც მოქალაქეებს მაღალი სარგებლის დაპირებით იზიდავს. ბაზარზე ადგილი აქვს როგორც ყიდვის, ისე გირავნობის შემთხვევაში მოქალაქეებისთვის არარეალურ შეთავაზებებს, რასაც ასობით დაზარალებული ჰყავს.
ამ თემაზე BMG-იმ გასული კვირის ბოლოს სიუჟეტიც მოამზადა, რომლის ინსპირაციის წყარო, ცხადია გახლდათ კომპანია "სფერო ფოლდინგი" და მათი "ბიზნეს მოდელი."
კომპანიას არაერთი მომჩივანი ჰყავდა. სხვადასხვა ტელევიზიებთან თუ სოციალურ ქსელებში მოქალაქეები გასული თვეების განმავლობაში ამბობდნენ, რომ მათ ბანკიდან სესხი აიღეს და ინვესტიციის სახით კომპანიაში ჩადეს. დაზარალებულების მონათხრობის მიხედვითვე, "სფერო ჰოლდინგი," მათ ჩადებული ფულის სანაცვლოდ გარკვეული დროის განმავლობაში ქირით ცხოვრებას, ჩადებული ფულიდან საპროცენტო სარგებელს და ვადის გასვლის შემდეგ მათი ფულის უკან დაბრუნებას სთავაზობდა.
მოქალაქეთა კუთვნილი დიდი ოდენობით თანხის დაუფლების ბრალდებით გუშინ საღამოს ცნობილი გახდა, რომ კომპანია „სფერო ჰოლდინგის“ დამფუძნებელი გივი (გიგა) წულეისკირი დააკავეს. ხოლო სისხლისსამართლებრივი დევნა დაიწყო „სფერო ინვესტის“ დირექტორის გიორგი მურუსიძის მიმართ.
გამოძიების მიხედვით, საუბარია 244 დაზარალებულზე, რომელთა მიმართ მიყენებული ზიანი დაახლოებით 12 მილიონ ლარს აღწევს, რომელიც შესაძლოა კიდევ გაიზარდოს.
"გივი წულეისკირმა და გიორგი მურუსიძემ 2022 წლის თებერვლიდან 2025 წლის ოქტომბრამდე, ,,სფერო ინვესტის“ სახელით, ფიზიკურ პირებთან გააფორმეს ,,უძრავი ქონების დროებით საცხოვრებლად გადაცემის,“ აგრეთვე ე.წ. ,,კაპიტალდაბანდების შესახებ“ ხელშეკრულებები, კერძოდ: უძრავი ქონების დროებით საცხოვრებლად გადაცემის შესახებ ხელშეკრულების თანახმად, ფიზიკურ პირებს „სფერო ინვესტი“-ს ანგარიშზე შეჰქონდათ თანხები, რის შემდეგაც „სფერო ინვესტი“ მათთვის მესამე პირებისაგან ქირაობდა ბინებს.
ხელშეკრულების ვადის გასვლის შემდგომ ორგანიზაციას სრულად უნდა დააბრუნებინა მოქალაქეების მიერ შეტანილი თანხები. მიუხედავად ამისა „სფერო ინვესტმა“ შეწყვიტა ქირის საფასურის გადახდა, არ დააბრუნა თანხები, რის გამოც ასეულობით მოქალაქე საცხოვრებლის გარეშე დარჩა.
ამავე ,კაპიტალდაბანდების შესახებ“ ხელშეკრულების საფუძველზე, მოქალაქეები „სფერო ინვესტის“ ანგარიშზე რიცხავდნენ თანხებს, ხოლო კომპანიას მათთვის უნდა გადაეცა ყოველთვიური სარგებელი, ხოლო ხელშეკრულების ვადის გასვლის შემდგომ, მოქალაქეთა მიერ შეტანილი თანხები სრულად უნდა დაებრუნებინა, რაც არ განახორციელეს.
შინაგან საქმეთა სამინისტროს მიერ ჩატარებული გამოძიებით დადგინდა, რომ გივი წულეისკირმა და გიორგი მურუსიძემ, დიდი ოდენობით თანხების მოტყუებით დაუფლების მიზნით, შპს „სფერო ჰოლდინგის“ 100%-იანი წილობრივი მონაწილეობით დააფუძნეს „სფერო ინვესტი“, რომლის ფორმალური დირექტორი მურუსიძე იყო, თუმცა კომპანიას ორივე ერთობლივად მართავდა. - ნათქვამია შსს-ს მიერ ცოტა ხნის წინ გავრცელებულ განცხადებაში.
ამ ამბის ერთ-ერთი საინტერესო პასაჟია ის ფაქტი, რომ "სფერო ჰოლდინგი" დეველოპმენტთან, ინვესტთან თუ ტელევიზიასთან ერთად, აერთიანებდა ორ არასამთავრობო ორგანიზაციას რომელთა შორის იყო იპოთეკით და მევახშეობით დაზარალებულთა და შეჩერებული მშენებლობით დაზარალებულთა ასოციაცია.
თავად კომპანიის დამფუძნებელი დაკავებამდე რამდენიმე დღით ადრე მომხდარში ფინანსური ინსტიტუტების მხრიდან ყადაღას ასახელებდა და ამბობდა, რომ მისი ფინანსური პრობლემების საწყისი სწორედ ეს იყო.
ვის და ტიპის დანაშაული მიუძღვის ამას ალბათ გამოძიება დაადგეს, ჩვენი, როგორც მედიის როლი და მიზანი კი გახლავთ სწორი ინფორმაციის მოწოდება თქვენთვის, რათა სამომავლოდ უკეთესი წარმოდგენა გვქონდეს ფინანსურ დაპირებებზე და მის რეალისტურობაზე.
სტუმრები: გიორგი კეპულაძე -„საზოგადოება და ბანკები“-ს გამგეობის თავმჯდომარე;
ოთარ კაჭკაჭაშვილი - OK & CG-ის დამფუძნებელი
#უძრავიქონებისპროსპექტი თათია ჩაფიჩაძე & გუგა კობახიძესთან ერთად
Информация по комментариям в разработке