الليل طرف سج ياراسي ⚡️👏🏻 خالد ال بريك & سلطان بن بتلاء ( جديد ) 2024

2024
حصرياً

الملك لله والثنا لله علّام الغيوب
مومن برسله وبملايكته وحكمه واكتبه

انسان والانسان فيه من المزايا والعيوب
جبريل يرسل بسببه وابليس يطرد بسببه

من الكواكب لو تكبّر مايجيبه تلسكوب
في كوكب الارض ويحسب الكون كله كوكبه

صرت اتعجب يوم اشوف ضلوع صدري ماتذوب
على كثر ماضمت احداث الحياه المتِعبه

الصبر صبر المنهزم ، والكِبر مقبرة القلوب
والجهل تكرار الخطا ، والعلم علم التجربه

والبخل بخل المقتدر ، والظلم تهوين الذنوب
والكدح نوع من الامل، والعمر نوع من الهبه

ان كان بالدنيا نجاح وكان بالدنيا رسوب
ذروة سنام المرجله بالدين واعظم مرتبه

لاتاخذ الدنيا بعين الجد والدنيا لعوب
تطمّع الرجّال وتبعّد مداه وتنكبه

رجّال تحسب له لاجا وقت المداحم بالجنوب
ورجّال مايدحم بجنبه غير وقت المأدبه

حتى المسمى كان فعله غاب فاسمه ماينوب
ان كان ماينفعك في حاجتك مانت مناسبه

الليل طرّف سج ياراسي وهبي ياهبوب
زل اكثره واللي بقى به ثلث من دون انتبه

لاطاب ليلي ذعذعي من غرب والا من جنوب
واحسني رديت غرناطه ومسجد قرطبه

احايله قبل الفجر يلبس ظلامه لبس ثوب
ثوب ٍ مايقدر قبل مغرب شمس بكره يسلبه

اذا غياب الواهس الشعري من اشكال الغروب
ترى حضوره من شروق الشمس تلقا به شبه

شعر نحاكي به عقول الناس ونخاطب شعوب
والنخبويه للمقام اللي تجي فيه انخبه

ازهل يابندر لاتوصيني لياحان الوجوب
واشره على اللي لابدا اللازم مايعرف واجبه

جنّب عن اللي عند ربعه لاوقف تقل مغصوب
وعليك باللي يطلق حجاجك بقوّ الموهبه

اطرب لطاري حرب لاطروّه والطيب طروب
اللي لها تاريخ عجزت تحتويه المكتبه

في السلم اهالي المعجزات الخالدات وبالحروب
اهل الرماح الماكنه واهل السيوف المرعبه

وواجب هل العرفا مايثنينا عنه طول الدروب
سلك الحرير يجرّنا حتى بدون مناسبه

سلام ي اللي محتمين الطايله من كل صوب
ماضي وحاضر بالفعل والقول ماجت طبطبه

سلّم على اللي سمعته رنانه وناره شبوب
فريح من يتعب مراقيب الفخر ماتتعبه

تنساق له روس المدايح لو بنات المدح عوب
دون ونعم يدحم طحاطيح الرجال بمنكبه

ابو محمد صامل الوقفات بكبار الخطوب
من نافسه بالطيب يفتر عزمه ولايغلبه

وسلم على اللي قوّم الدنيا وشوّش بالحروب
ناموسنا مرزوق والله يرحم اللي عقبه

حوّل على اهل الشيقحان ولاقفاها دوب دوب
اول حضور ارهى على الاول وحقق مطلبه

قالوا من اللي يشرب الفنجال والوضع امهيوب
وقام يتعزوا راعي العرفا بجده واشربه

كم واحد ٍ خلاه عن هقواته وطيشه يتوب
وكم واحد عوّد على دقنه عقب مسّ شنبه

قام يتحالف ضده قروب وطلب فزعة قروب
وجاهم بشقحٍ من رهاوتها تقول مذّهبه

راهي وسايقها جلد والمجد غالب ومغلوب
ان جات بالطيب اكسبه ، وان جات بالغصب اكسبه

مثل مايضحك بالسعه يضحك حجاجه بالكروب
اليا احتمى الميدان هذا وقته وذا ملعبه

لو يستفزه في التنافس جاهل ويكذب كذوب
واثق ولاقلل من الخصم وحلاله واتعبه

على كثر مااسرف بحسّاده مقدّر وامحسوب
والقدر شي ٍ مايجي بالخمخمه والحبحبه

يبغى مثل مرزوق وجهه لاعبوس ولاشحوب
للي يجيه بمجلسه ، واللي يجيه بمكتبه

..
للتواصل والاستفسارات :
الحسابات الرسمية لـ منصة بصمة الابداع .

‏Official Whatsapp :
الرابط محادثة الواتساب المباشر :
https://wa.me/message/4GKUGHJQFDZTC1
+966562778026


‏Official Snapchat :
  / a_thane2  

‏Official Twitter :
  / a_thane2  

‏Official Instagram :
  / a_thane2  

ـــــــــــــــــــ