Скачать или смотреть មួយឆ្នាំនេះ រដ្ឋមន្ត្រីបរិស្ថាន ដាក់ចេញយុទ្ធនាការធំៗ ទាក់ទាញមនុស្សរាប់លាននាក់ថែរក្សាបរិស្ថាន

ក្រសួងបរិស្ថានក្រោមការដឹកនាំដោយលោក អ៊ាង សុផល្លែត បានបង្ហាញសមិទ្ធផលសម្រេចបានក្នុងរយៈពេលមួយឆ្នាំលើការងារពាក់ព័ន្ធកិច្ចការពារបរិស្ថាននិងធនធានធម្មជាតិ។

រដ្ឋមន្ត្រីដែលឡើងជំនួសលោក សាយ សំអាល់ ក្នុងនីតីកាលទី ៧ នៃរាជរដ្ឋាភិបាល បានដាក់ចេញយុទ្ធសាស្ត្រចក្រាដែលផ្ដោតលើមុំធំៗចំនួន ៣ គឺ ស្អាត បៃតង និងចិរភាព។ លោករដ្ឋមន្រ្តីបានផ្តួចផ្តើមយុទ្ធនាការ «ថ្ងៃនេះ ខ្ញុំមិនប្រើប្រាស់ថង់ប្លាស្ទិក » ដែលមានការចូលរួមពីពលរដ្ឋរាប់លាននាក់។ យុទ្ធនាការដាំដុះកូនឈើឲ្យបាន ១ លានដើមក្នុងមួយឆ្នាំ ដើម្បីសម្រេចបានអព្យាក្រឹត្យកាបូន និងបង្កើនគម្របព្រៃឈើឲ្យបាន ៦០% ក្នុងឆ្នាំ ២០៥០ រួមទាំងដាក់ចេញយុទ្ធនាការសម្អាតផ្ទៃទឹក ដោយជំរុញឲ្យសហគ្រាសបំពាក់ប្រព័ន្ធតាមដានគុណភាពទឹកកខ្វក់ដើម្បីការពារសុខភាព និងអាយុជីវិតរបស់ពលរដ្ឋ។

បន្ថែមពីនេះ លោករដ្ឋមន្រ្តីបានរៀបចំបង្កើតថ្នាលបណ្តុះកូនឈើកម្រិតតំបន់តាមបណ្តាខេត្តធំៗចំនួន ៤ ប្រកាសបង្កើតកម្មវិធីប្រកួតប្រជែងគ្នា «កម្ពុជាស្អាត គ្មានសំរាមប្លាស្ទិកតាមដងផ្លូវ» និងការដាក់ចេញនូវយុទ្ធនាការ «កម្ពុជាស្អាត ខ្មែរធ្វើបាន» រួមគ្នារើសសំរាម ប្លាស្ទិក សម្អាតតាមដងវីថិ តាមទីសាធារណៈ ជុំវិញបរិវេណផ្ទះ រោងចក្រសហគ្រាស សាលារៀន និងតាមទីអារាមជាដើម។

អ្វីដ៏គួរឲ្យចាប់អារម្មណ៍ លោករដ្ឋមន្រ្តីបានរៀបចំពិព័រណ៍ដើមឈើដ៏ធំមិនធ្លាប់មាន «ពន្លកបៃតង» ដែលមានការចែកកូនឈើរាប់ម៉ឺនដើមដោយឥតគិតថ្លៃ ក្នុងចលនាបំផុសពលរដ្ឋនិងយុវជនចាប់ផ្ដើមស្រលាញ់ដើមឈើ និងចូលរួមដាំដើមឈើតាមគេហដ្ឋាន វត្តអារាម សាលារៀន និងទីសាធារណៈនានា៕

Follow Kampuchea Thmey TV for more:

Facebook:   / kptdaily  
Telegram: https://t.me/kampucheathmeytv
Tiktok:   / kampuchea_thmey_daily