劉嘉玲低調陪同出席釜山影展 梁朝偉透露欲再拍電視劇

劉嘉玲低調陪同出席釜山影展 梁朝偉透露欲再拍電視劇

南韓第27屆釜山國際影展於10月5號開幕，不少巨星出席共襄盛舉，梁朝偉相隔7年再度抵達韓國，偉仔獲頒今屆「亞洲電影人獎」，過往偉仔主演嘅經典電影喺南韓累積唔少粉絲，偉仔由落機一刻已成為焦點，佢喺記招透露想重返公仔箱，挑戰未演過嘅角色。

5號晚偉仔身穿白色西裝壓軸行紅地毯時，現場歡呼聲震耳欲聾，釜山影展主席許文永早前表揚偉仔係受韓國與全球影迷尊敬及喜愛嘅偉大演員之一，偉仔於開幕禮上以英語發表致謝辭，感謝大會頒發獎項畀佢，太太劉嘉玲低調陪伴在側，更在社交平台全程直擊，狂晒老公靚相。

偉仔休息一晚再出席記者會分享得獎感受，喜見同業不斷進步，偉仔指差唔多廿年前開始經常去韓國做電影宣傳，佢續道：「釜山電影節喺頭一、兩屆已開始參加，今次係第4次出席，自己亦好早期，《八月照相館》、《Oldboy》嗰啲好早期開始睇韓國電影，一直睇住成長同進步，有今日呢個成績，我覺得好開心。」

偉仔由公仔箱到大銀幕演過唔少經典角色，偉仔自言最近好想重新拍電視劇：「喺電視台開始我嘅表演工作，作為而家呢個階段，我好想再重新做一次電視劇呢個感覺會係點，一路以嚟由我出道有follow我嘅觀眾，可能都有興趣睇番我做電視劇。」而大會為偉仔準備作品展，放映《2046》、《東成西就》、《無間道》、《暗花》、《春光乍洩》及《花樣年華》等六齣代表作。

此外，何超儀以電影製作人身份獲邀出席釜山影展，身穿黑色晚裝行型格路線現身，喺後台跟韓國殿堂級導演林權澤及揚威奧斯卡嘅⽇本導演是枝裕和等同業互相交流，及影相留念。

#梁朝偉 #釜山國際影展 #劉嘉玲 #亞洲電影人獎 #何超儀
#TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0