Yakkabog‘ning yakka hokimi avvaliga aytdi, keyin qaytdi: Jabrini tadbirkor tortmoqda

Qashqadaryo viloyatining Yakkabog‘ tumani hokimi Lutfiddin Abdullayev tumanda auksion orqali sotilgan yer noqonuniy sotilganini aytib, onlayn sotuvga chiqqan holatni o‘z imzosi bilan rad etdi. Oqibatda esa uy qurishni niyat qilib, harakat boshlagan tadbirkorning ishi to‘xtab qoldi. Bu haqda “Daryo”ga shikoyat qilgan tadbirkor Sanjar Shonazarovning aytishicha, tumanda faoliyat yurituvchi blogerlarning auksion borasidagi chiqishiga javob bergan hokim Lutfiddin Abdullayev Telegram’da ko‘p qavatli uy qurish uchun sotuvga chiqqan yerdan “dom” qurilishiga norozi ekanini, qolaversa, yer sotuvga noqonuniy holatda chiqqanini yozgan. Bu esa tadbirkorning ishi to‘xtab qolishiga, tuman prokuraturasi tomonidan mazkur holat bo‘yicha tergov ishi boshlanishiga sabab bo‘lgan.