01_Стихиры на хвалитех: "Ангельския предъидите силы" (день первый)

ДЕНЬ ПЕРВЫЙ (20 декабря/2 января н.ст.)

Свято-Троицкая Сергиева лавра. Успенский собор. 1 января 2018 год.

Управляет - архимандрит Диодор.
Канонарх - игумен Силуан.

На хвали́тех стихи́ры предпра́зднства, гла́с 6, на 4, по алфави́ту. Творе́ние Рома́на Певца́. Самоподо́бен: Ангельския предъидите силы

Ангельския/ предъидѝте сѝлы,/ ѝже в Вифлеѐме/ угото̀вайте я̀сли:/ Сло̀во бо ражда̀ется,/ Му̀дрость происхо̀дит,/ приѐмлет целова̀ние Цѐрковь./ На ра̀дость Богоро̀дицы,/ лю̀дие рцѐм:/ благословѐн пришѐдый// Бо̀же на̀ш, сла̀ва Тебѐ.

Го́ры / сла́дость да ка́плют, / се́ бо прихо́дит Бо́г от ю́га, / язы́цы, покаря́йтеся, / ра́дуйтеся, проро́цы, / патриа́рси, взыгра́йте, / челове́цы, восплещи́те рука́ми: / Кре́пкий и Вели́кий Кня́зь / Христо́с ражда́ется, / Ца́рь небе́с // на зе́млю прихо́дит.

От земли́ / вознося́ челове́чество, / Зижди́тель прии́де, / ца́рский обновля́я па́ки о́браз. / Сра́дуйтеся, го́рних си́лы,/ и воспо́йте, / вражды́ средосте́ние, разори́ся, / прии́де, Ему́же прилежа́ше: / Бо́г бо Челове́к быва́ет, / Ца́рь Изра́илев, // Христо́с Бо́г на́ш.

Гряди́, Изра́илю / тяжкосе́рдый, / отве́ржи и́же в души́ твое́й / надлежа́щий тебе́ о́блак, / позна́й Созда́теля,/ в верте́пе ражда́ющагося. / Се́й язы́ков ча́яние, / Се́й разори́т пра́здники твоя́, / вопи́ти бо не повину́ешися: / Ца́рь Изра́илев, // Христо́с прихо́дит.

Сла́ва, гла́с и подо́бен то́йже:
Приближа́ется Христо́с, / Вифлее́ме, предугото́вися, / уже́ язы́ков спасе́ние озаря́ет, / благоукраси́ я́сли, / па́стыри собери́, / призови́ волхвы́ от Перси́ды, / во́инства безпло́тных умо́в,/ воззови́те: / Ца́рь небе́с // на зе́млю прихо́дит.

И ны́не, гла́с и подо́бен то́йже:
За́висть же и о́гнь / поя́ст тя́, / безу́мный преле́стниче, вои́стинну / и зако́нная кля́тва: / се́ бо Де́ва, / я́коже Иса́ия прорече́, / име́ во чре́ве / и в я́слех восклони́т Царя́, / Имже вси́ / от коле́на Иу́дова // си́льнии оскуде́ют.