Скачать или смотреть PULUKADIGINA YATTI/పులుకడిగినయట్టి/AAV SERIES 08 EP 795/ DR JOSYABHATLA/ HARINI / SRI LATHA/ARABHI

Srivari Abhisheka Vaibhavam Ep – 24💐

🌺🍃 -----------🍃🌺

తాళ్లపాక పెద తిరుమలాచార్య శృంగార సంకీర్తన

( పులుకడిగినయట్టి పురుషోత్తముఁడు వాఁడె .. )

రేకు రాగము:-- శ్రీరాగం

రేకు: 94-4 సంపుటము: 17-506

స్వరకర్త :-- Dr జోశ్యభట్ల గారు

రాగం :-- ఆరభి

గానం :-- శ్రీమతి హరిణి మరియూ మూల శ్రీలత గారు

🌺🍃 -----------🍃🌺

🌹🌹 సంకీర్తన 🌹🌹

॥పల్లవి॥

పులుకడిగినయట్టి పురుషోత్తముఁడు వాఁడె
యెలమి నారతులు మీరెత్తరే దేవునికి

॥చ1॥

గొప్పయింద్రనీలాల కొండ మంచు గప్పినట్టు
నెప్పు మింట పాలవెల్లి నెరసినట్టు
విప్పు నీలమేఘముపై వెన్నెల గాసినయట్టు
కప్పురధూళిమేనఁ గప్పిరి దేవునికి

॥చ2॥ *

నిండు నై రావతముపై నీలిజగ గప్పినట్టు
వెండిమేడపైఁ జీఁకటి విడిసినట్టు
వుండరీకపుఁ గొలను పొరిఁ దేం ట్లాగినట్టు
మెండగు తట్టుపుణుఁగు మెత్తిరి దేవునికి

॥చ3॥

అదె నల్లఁ గలువలన కరువు లుండినట్టు
మెదిగి కస్తూరిభూమి మేరు వున్నట్టు
యెదుట శ్రీవేంకటేశుయెద నలమేల్మంగను
గుదిగుచ్చి సొమ్ములెల్లా గుప్పిరి దేవునికి

🌺🍃 -----------🍃🌺

అన్నమయ్య అక్షరవేదం సంపుటి – 795

( పులుకడిగినయట్టి పురుషోత్తముఁడు వాఁడె .. )

🌺🍃 ----------- 🍃🌺

ప్రార్థన ః-- 🌹

కడిగిన ముత్యము వోలెన్
బుడమిన నీలగనివోలె బుత్తడి వోలెన్
దడిసిన దేహముతో నీ-
యొడయడు వన్నెలను జూపె నువిదలకిలలో !

✍️ --స్వీయపద్యము ( కందము)

🌹🌹

చక్కగా కడుగబడి మెరయుచున్న ముత్యమువలె ఒకసారి ,

ఈ భువిపైన ఇంద్రనీలి గని వెలసినదా అన్నట్లు ఒకసారి ,

బంగారుకొండవలె ఒకసారి ,

శుక్రవారపు అభిషేకమున తడిసిన దేహముతో ఉన్న
ఈ విభుడు ఎన్నెన్నో అందాలను ఒక్కసారే చూపుచున్నాడు
ఈ భూమిపైన అంగనలకు ( జీవాత్మలకు ) !!🙏

🌹🙏🌹

🌺🍃 -----------🍃🌺

మున్నుడి 🌹👇

పెదతిరుమలాచార్యుల వారు వ్రాసిన ఎన్నో అభిషేక వర్ణనా సంకీర్తనలలో ఇది ఒక చక్కని సంకీర్తన .

నల్లని స్వామిపై కర్పురపు ధూళి జల్లినప్పుడు ఏ విధముగా ఉన్నాడు ,

ఆ పిదప తెల్లని ఆ స్వామిపై నల్లని తట్టుపునుగు కస్తూరి అలదినప్పుడు ఎలా ఉన్నాడు ,

అలాగే ఆ నల్లని స్వామిపై యెదన మెరయుచున్న అలమేలుమంగ ఏ విధముగా ఉన్నది ,

అభీషేక అనంతరము సర్వాలంకృతుడై స్వామి ఏ విధముగా ఉన్నారో చక్కని ఉపమానాలతో వర్ణించి చెప్పారు !🙏

మరి ఆ చక్కని సంకీర్తన అర్థము తెలుసుకుని పాడుకుందామా !!👇

🌺🍃 ----------- 🍃🌺

🌹🌹

బాగుగా మెరెసిపోయేటట్లుగా కడుగబడి శోభలీనుచూ
అదిగో అతడే పురుషోత్తముడైన దేవదేవుడు .🙏

అభిషేకానంతరము దివ్యతేజస్సుతో నున్నాడు .
అందరూ ఈ దేవునికి హారతులనెత్తండి ఇప్పుడు !!🙏

🌹🌹

స్వామిపై తెల్లని కర్పూర ధూళి జల్లినప్పుడు ఎలా ఉన్నాడనగా ..

గొప్పనైన ఇంద్రనీలమణుల కొండపై తెల్లని మంచు కప్పితే ఎలా ఉండునో ,

పాదుకొని ఆకాశమున తెల్లని పాల సముద్రము వ్యాపించితే ఎట్లుండునో ,

అలముకుని ఉన్న సాంద్రమైన నీలిమేఘముపై వెన్నెల కాసితే ఎట్లూందునో ,

ఆ విధముగా స్వామికి నిండుగా కర్పూరపు ధూళి జల్లినారు 🙏

🌹🌹

ఈ విధముగా తెల్లగా మారిన స్వామిపై నల్లని కస్తూరి తట్టు పునుగు కాపు అలదగా ఎలా ఉన్నాడనగా ..

తెల్లని కాంతులతో మెరిసిపోయే ఐరావతముపై ( ఇంద్రుని గజము )
నీలి వర్ణపు పట్టు వస్త్రమును అలంకరించితే ఎట్లుండునో ,

వెండి వెలుగులతో మెరిసే ఒక కోటపై చీకటి ప్రసరించితే ఎట్లుండునో ,

తెల్లని విరబూసిన కలువలతో నిండిన కొలనులోకి నల్లని తుమ్మెదలగుంపు వచ్చి చేరితే ఎట్లుండునో ,

ఆ విధముగా కర్పూరధూళి జల్లిన పిదప స్వామికి నిండారా తట్టుపునుగు కస్తూరిని మెత్తినారు 🙏

🌹🌹

ఈ విధముగా మరలా నీలవర్ణుడైన స్వామి ఉరముపై అమ్మ అలమేలుమంగ ఎట్లుండెననగా ..

నల్లని కలువ మధ్యలో బంగరు వర్ణముతో మెరిసే పుప్పొడి వలె ,

నల్లని భూమిపై బంగరువర్ణపు మేరుపర్వతము మెరయుచున్నవలె,
తళుకులీనుచున్నది .

ఆ విధముగా ఎదురుగా అదిగో అలమేలుమంగకు శ్రీ వేంకటేశ్వరునకూ శోభాయమానముగా అభిషేకము కావించి ,
ఎన్నెన్నో ఆభరణములను ఎంచి ఎంచి పోగుచేసి అలంకరించినారు .🙏

అట్టి అలమేలుమంగా శ్రీ వేంకటేశ్వరులకు హారతులు ఎత్తి నీరాజనములు పాడండి ! !🙏

🌹🙏🌹

ఓమ్ శ్రీ అలమేలుమంగా సమేత శ్రీ వేంకటేశ్వర స్వామినే నమః !🙏

తాత్పర్య సహిత దృశ్య మాలికగా మీకు అందించాలన్న నా చిన్న ప్రయత్నమును ఆశీర్వదిస్తారని ఆశిస్తూ..🙏
దోషములున్న...మన్నించమని విన్నపము... 🙏

✍️ -- వేణుగోపాల్ యెల్లేపెద్ది 🙏
#PULUKADIGINAYATTI #/లుకడిగినయట్టి #josyabhatla #hariniivaturi #moolasrilatha #abhishekam #srivariabhishekam
#annamacharyakeerthanalu #annamayya #annamayyasongs #అన్నమయ్య #అన్నమాచార్య #annamayyakeerthanalu #annamayyakeerthana