OKM Asembuba Toktep: Sangro Züngtep (Slam Poetry)

Clean Election

Tarutsü tia asoshi apu rongdoka doker, aseni mangur na?
Zoni adok medem, kodang election tonga arutir.
Züngsem bo tajung ka ta anitaker, saka sashinemshi agi.
Aseni inyakba mapa agi asen temulung sataka sayur.
Masenkosen lenir aginüba agi raksar asü? Nübur nokyumedem mesütetba agi raksar? Ya lenir tai asü, ongkhupur tai?
Longjemshir, khen junga aroka yia rajemshiti arung.


Kodang lenir ka indang bilemtir, ochishir ka nüklai arur.
Shibai tetsü tasoli asoshi salasashia, nübur ajungtsü sapisayang-a inyaker.

Shibai khonang, rongsen asoshi masü, saka ochi asoshi tasü ita noktaker.
Ochi temeten aser teimla agi par tenük prangshir.
Nungloktsüba mapatem ajak roro-a inyakteter.
Khrista-er yimjung yimli asoshi vote malir, mesüra mayoker.

Meyazür, maoyar,sübokrem mamshir,tashiyim agi taküm magir.
Nisung aser Tsüngrem tsüngdang ochishia ajemalua par yimli yanger.


Teni tsükra Tenük nungi Nüktzü alur.
Iba den sakuku, rogotong meshidakra, ongkhupur jungtima? Rogotong aser ongkhupurtemi, temerük inyakyim agi nübur remja. Ochi mashir, sen teimba agütsür ka nem masü .
Latetyim meteter, asen tebilembatem tatar senden nung jembitetba lenir shimti.
Kechiyong, Lenir-i Nübur yanglur masü saka Nüburi Lenir yanglur.
Asen temeten senti vote jagi temerük Lenir shimti.
Shir Tsüngrem tsüngdang temerük aser ochi lenjeter Lenir lir.


Süng Lung mulungbo angur aser meteter.
Saka Lenir ka indang mulungbo shibai shitetsü.

Tenemi atudang tarok amatokra ajak asoshi ayatai.
Ochi mashi rongsen aser sübokrem agi tarutsü nükjidong metongtetsü.
Tzüsem yipru aidang rongji telungi alur.
Iba den sakuku, arok telongjem aser tangatetba melira telungi alutsü.

Tiazü tenangzükba aser ochi mashi sen nem mepuadaktsüli.
Tarutsü nükla tajung asoshi asen shilem inyakti.


Lenir shimba süiren jenjang khen meyipa repangshiti.
Rongdokba apu asütsü asü, azükaro ba apu asütsü aseni shimti.
Züliolir senso takum ka mesüi.
Ochi nung nungiter Yokji tajung ka süti.
Züngpong nung asen Lokti asoshi zemlazemshitsur suti .

Clean Election yimyim ola ya omatsü süa jembiti arung.
Ongpangkong sanger asoshi clean election ya omajen ka sütaktsüti.
Nükmen akangshir, tsüngkang medema ochi aser temerük agi tongbangji rarati arungma.

Special thanks to:

Shindir Ola
(Live recording and Editing)

Language Translation Centre,
Fazl Ali College Mokokchung
(Script Translation)