Məhkəmənin azad etdiyi şəxsi binadan çıxanda polislər yenidən tutdu

Məhkəmə qərarı ilə sərbəst buraxılan şəxs binadan çıxa bilmir. Çünki çöldə onu polislər gözləyir: yenidən tutmaq üçün. Oktyabrın 10-da Xətai Rayon Məhkəməsi İsmayıl Qəhrəmanov adlı şəxsi həbsdən azad etsə də, məhkəmə binası qarşısında polislər ona evinə getməyə imkan verməyiblər. Onlar Qəhrəmanovu məhkəmə binası önündə zorla tutub, Xətai rayonu, 36-cı polis bölməsinə aparıblar.
Bundan əvvəl – məhkəmənin dəhlizində İsmayıl Qəhrəmanov video çəkərək, kömək istəyib. İsmayıl Qəhrəmanovun qardaşı İbrahim Qəhrəmanov Meydan TV-yə bildirib ki, oktyabrın 6-dan qardaşı 36-cı bölmədə işgəncəyə məruz qalıb.
Daxili İşlər Nazirliyi də baş verənlərə münasibət bildirib. “Oğurluq əməlində şübhəli bilinən şəxsin 36-cı polis bölməsində döyülməsi iddiaları ilə bağlı araşdırma aparılır”, - nazirliyin Mətbuat Xidmətindən belə cavab verilib.