Скачать или смотреть Sampoorna Sri Ramayanam - 2025 | Day 11 | Brahmasri Chaganti Koteswara Rao garu

బ్రహ్మశ్రీ డా. చాగంటి కోటేశ్వరరావు గారిచే "సంపూర్ణ శ్రీ రామాయణ ప్రవచనములు" - 2025 I పదకొండవ రోజు (04-02-2025)

అయోధ్యకాండ - నాల్గవ రోజు ప్రవచనము

ప్రముఖ ఆధ్యాత్మిక ప్రవచనకర్త, పూజ్య గురుదేవులు, "ప్రవచన నిధి" బ్రహ్మశ్రీ చాగంటి కోటేశ్వర రావు గారు విశాఖపట్నం కొమ్మాదిలోని గాయత్రీ మహిళా ఇంజనీరింగ్ కళాశాలలో చేస్తున్న సంపూర్ణ శ్రీరామాయణ ప్రవచనములు 11వ రోజునకు చేరుకున్నవి. ఈ దేశమునకు ఇంత గౌరవము, కీర్తి, ప్రతిష్ట మహాపురుషులై మహాతపస్సంపన్నులైన మహర్షుల వలన కలిగిందని వారు ప్రవచనాంతర్గతముగా వివరించారు. శ్రీరాముడు ప్రయాగలోని గంగా యమునా సంగమ స్థానము వద్ద భరద్వాజ మహర్షిని కలుసుకున్నప్పుడు ఆయన ఆశ్రమ వాతావరణము, అక్కడ పశుపక్షాదులు, అనేక మహర్షిలు ఎంతో ప్రశాంతంగా ఉండటము ఆ మహర్షి యొక్క తపశ్శక్తిని సూచిస్తాయని వారు వివరించారు.

ఈ దేశములోని నగరములకు, నదులకు, పర్వతములకు అధిష్టాన దేవతలు ఉంటారని, వారు తప్పక అనుగ్రహిస్తారననే విషయమును శ్రీ రామాయణం మనకు తెలియజేస్తుందని పూజ్య గురువు గారు ప్రవచించారు. అరణ్యవాసమునకు బయలుదేరే సమయములో శ్రీరాముడు అయోధ్య నగరమునకు నమస్కరించారని,అట్లాగే వనవాసమును పూర్తి చేసుకుని క్షేమముగా తిరిగి రావాలనే సంకల్పముతో సీతమ్మ గంగమ్మకు మొక్కుకున్నదని వారు వివరించారు. భరద్వాజ మహర్షి శ్రీరాముని చిత్రకూట పర్వతము వద్ద నివాసము ఉండమని చెబుతూ ఆ పర్వత శిఖరము యొక్క దర్శన మాత్రము చేతనే పాపము చేయాలన్న ఆలోచన కలగదని చెప్పటం ఈ దేశంలో ఉన్న పర్వతముల యొక్క గొప్పతనమును కూడా సూచిస్తుందన్నారు.

వనవాసమునకు బయలుదేరిన శ్రీరాముణ్ణి గుహుడు కలుసుకున్న ఘట్టము గూర్చి వివరిస్తూ గుహుడు అర్పించిన అర్ఘ్యము, ఆహార పదార్ధములను పుచ్చుకొనక కేవలం తాను వచ్చిన రథము యొక్క గుఱ్ఱములకు మాత్రం ఆహారము ఇమ్మనటం మునివృత్తి పట్ల రామునికి ఉన్న నిబద్ధతను సూచిస్తుందని పూజ్య గురువు గారు తెలియజేశారు. మనసారా ఆతిథ్యమును ఇవ్వటము అనే విషయము రామాయణంలో గుహుని నుండి మనము నేర్చుకోవాలని వారు తెలియజేశారు. ఆ రాత్రి కటిక నేలపై పవళించిన సీతారాములను చూచి లక్ష్మణుడు పడిన వేదన, లక్ష్మణున్ని అక్కడ నుంచి తిరిగి అయోధ్యకు వెళ్లి పొమ్మని శ్రీరాముడు చెప్పినప్పుడు శ్రీరాముడు కనిపించినంత సేపు మాత్రమే తాను జీవించి ఉండగలనని ఆ తరువాత ప్రాణములు వదిలేస్తానని చెప్పటం లక్ష్మణుని యొక్క సోదర ప్రేమకు నిదర్శనమని వారు అభివర్ణించారు.

గంగానది వద్ద శ్రీరాముని విడిచిపెట్టి తిరిగి అయోధ్యా నగరమునకు వెళ్లిన సుమంతుడు దశరథ మహారాజు గారికి విషయములను తెలుపుట, దశరథ మహారాజుగారు పొందిన పరివేదన, కౌసల్యాదేవి కూడా పలికిన కఠినమైన వాక్యముల వలన ఆయన పొందిన బాధ, ఒకప్పుడు అరణ్యములో మునికుమారుని సంహరించటం వలన ఆయనకు కలిగిన శాపము ఆయనకు గుర్తు వచ్చుట, దశరథ మహారాజు గారి మరణము, అనంతరము భరతునికి వెంటనే తిరిగి రమ్మని వార్త పంపుట వంటి అనేక ఘట్టముల సమాహారముగా గురువుగారి ప్రవచనము సాగినది.

సత్య ధర్మముల గొప్పతనమును వివరిస్తూ సత్యమును వదిలి ధర్మమును పట్టుకున్న దశరథ మహారాజు గారి కోరిక తీరలేదని, ధర్మమును వదిలి సత్యమును పట్టుకున్న కైకమ్మ కోరిక తీరలేదని, సత్య ధర్మములు రెండిటినీ పట్టుకున్న రామచంద్రుడు తరాలు మారిపోయినా ఆదర్శ పురుషుడై అందరి చేత పూజాలంటుకుంటున్నారని, సత్య ధర్మములు అంత గొప్పవని గురువుగారు అభివర్ణించారు.

#SriChagantiVaani
#SriChagantiPravachanamulu
#ChagantiKoteswaraRaoGaru
#Ramayanam
#sampoornaramayanam
#SampoornaRamayanam
#ChagantiRamayanam
#ChagantiLatestPravachanamulu
#Ramayanam2025
#sriguruvanichaganti
#ChagantiKoteswaraRaoGaru
#ChagantiPravachanam
#GuruvaniChagantiKoteswaraRaoGaru
#sreeguruvani
#sriguruvaani
#sriguruvani
#chagantikoteswararaogaru
#chaganti
#chagantiramayanam
#vizag
#visakhapatnam
#2025