Скачать или смотреть Serikali Morogoro yaboresha uuzaji wa karafu, lengo kuwabana matapeli dhidi ya wakulima.

Serikali Morogoro yaboresha uuzaji wa karafu, lengo kuwabana matapeli dhidi ya wakulima.

Serikali ya Mkoa wa Morogoro imeendelea kuboresha maisha ya wananchi wake na kujenga maghala ya masoko ya kuuzia mazao na viungo hususan katika Halmashauri ya Morogoro DC ili kuondoa utapeli uliokuwepo ambapo wananchi walikuwa wakitapeliwa mazao yao kwa kuuza mazao hayo kwa bei ya chini, jambo lililowapelekea kudidimia kiuchumi.

Hayo yamebainishwa Machi 10, 2026 na Katibu Tawala wa Mkoa wa Morogoro, Dkt. Mussa Ali Mussa, wakati wa ziara yake ya kugawa miche kwa wanafunzi wa kidato cha kwanza katika Shule za Sekondari za Tawa na Matombo zilizopo Halmashauri ya Wilaya ya Morogoro.

Dkt. Mussa amesema, awali wananchi walikuwa wakiuza karafuu kwa bei ya chini kutokana na uwepo wa matapeli waliokuwa wakiwadhulumu bila wao kujua. Kutokana na hali hiyo, serikali imeweka mikakati ikiwemo ujenzi wa soko maalum kwa ajili ya uuzaji wa mazao yao ili kuondokana na utaratibu wa kuuza mazao shambani, ambapo wakulima wengi wamedhulumiwa na baadhi ya wanunuzi.

“...Tukasema tutafute fedha na tuilazimishe halmashauri ijenge soko la kuuza viungo, ikiwemo karafuu pamoja na viungo vingine, Lengo ni kuondoa ule utapeli wa katikati...” amesema Dkt. Mussa Ali Mussa.

Aidha, Katibu Tawala huyo amewataka wazazi, walezi pamoja na wanafunzi kuhakikisha miche hiyo inapandwa na kutunzwa vizuri ili iweze kuwasaidia wanafunzi mara baada ya kumaliza elimu ya sekondari na kuwasaidia wanapoendelea na masomo ya juu.

Naye Katibu Tawala Msaidizi Sehemu ya Uchumi na Uzalishaji Mali, Dkt. Rozalia Rwegasira, amesema, mwaka huu jumla ya miche 2,650 ya kakao iligawiwa kwa Halmashauri ya Mlimba kwa wanafunzi wa kidato cha kwanza na huku miche 9,680 wakipewa Halmashauri ya Morogoro DC ambapo ugawaji umeanza katika Shule ya Sekondari Tawa miche 410, Sekondari ya Matombo miche 910.

Kwa upande wake, Kaimu Mkuu wa Shule ya Sekondari Tawa, Bw. Omary Tufahamu, amesema uanzishwaji wa upandaji wa kitalu cha miche umeongeza kipato katika shule hiyo na kwamba jumla ya miche14,000 ya karafuu imeuzwa kwa shilingi milioni 14, ambapo fedha hizo zitatumika katika ukarabati wa nyumba ya mwalimu, ukarabati wa meza na viti, ujenzi wa choo pamoja na mpango wa chakula kwa wanafunzi.

Mwisho.