සිළුමිණ සෑයට ප්‍රථම වරට මල් පූජා කළ හිමිවරුන්...

පොසොන් උත්සවය වෙනුවෙන් අනුරාධපුරයට පැමිණෙන බැතිමතුන්ට වෙනුවෙන්, එප්පාවල, කැලේසියඹලෑව වැවෙහි දිය මත ඉදි කළ අසිරිමත් සිළුමිණි සෑය බෝට්ටුවෙන් ගොස්  වන්දනා මාන කිරීමට ඊයේ (20) පස්වරුවේ සිට එළැඹෙන 23 වැනි දින දක්වා අවස්ථාව ඇත.
 
එප්පාවල, ඇඳගල කැලේ සියඹලෑව ශ්‍රී ආනන්දෝදය මහා පිරිවෙනෙහි සුදර්ශනාරාමයේ විහාරාධිකාරී කැලේසියඹලෑව නන්ද හිමියන්ගේ ආශිර්වාද මත එම විහාරස්ථානයේ ශීෂ්‍ය භික්ෂූ නේවාසිකාගාරය ඉදි කර ගැනීමට මුල්‍ය ආධාර එකතු කර ගැනීමේ අරමුණද පෙර දැරිව, විහාරස්ථ දායක සභාව හා ප්‍රදේශයේ තරුණ ප්‍රජාව එක්ව කැලේසියඹලෑව වැව කේන්ද්‍ර කර ගනිමින් මෙම සිළුමිණ සෑය ඉදි කරමින් පවති. පොසොන් උත්වසය වෙනුවෙන් අනුරාධපුරය ඇතුළු පූජනීය ස්ථාන වැඳ පුදා ගැනීමට පැමිණෙන ජනතාව වෙනුවෙන් දිය මත ඉදි කළ මෙම සෑයද වන්දනා මාන කිරීමට අවස්ථාව උදා කර දීමට නියමිතය.
 
ඊයේ (20) රාත්‍රියේ චෛත්‍යය අනුරුව අසල බුද්ධ රූපයක්, බෝධීන් වහන්සේ නමක් තැන්පත් කිරීමෙන් අනතුරුව සෙත් පිරිත් සජ්ජායනාකර මෙම චෛත්‍යය මහජනතාව වෙනුවෙන් වැද පුදා ගැනීමට විවෘත කරනු ලැබීය.ඒ අනුව අද (21), හෙට(22) හා අනිද්දා (23) යන තෙදින පුරා මෙම අසිරිමත් නිර්මාණය දැක , වැඳ පුදා ගැනීමේ අවස්ථාව මහජනතාවට හිමි වේ.

වැව් බැම්ම මත සිට මීටර 800 ක් පමණ දුර ගෙවා වැවේ කෙළවර යකඩ බට 400 ක් පමණ යොදා ඉදි කළ පාදමක් මත, මෙම චෛත්‍යය අනුරුව ඉදි කර ඇත.එම ස්ථානයට බෝට්ටුවෙන් ගමන් කර, සෑය වන්දනා කර නැවත පැමිණිමට බැතිමතුන්ට අවස්ථාව සලසා ඇත.