محمد السليمان - الكنة ( عذب السجايا ) | مهرجان ليالي الصقور 2021

الكلمات | Lyrics

الله عطاني والله يعطي الجنه
واليا استجد الهوى كلٍ ومقسومه

عذب السجايا وعوده باول الكنه
متى تزين السوالف واخذ علومه

واسامحه عن خطاة الجرح والونه
واعاتبه لو يصد شوي والومه

واذكره باول المسفار حتى انه
اليا تذكر زمان اول نسى نومه

يوم انه اقبل خدين الروح يوم انه
واقبلت اراعيه والقومه هي القومه

من يومها والحشى ماعاد له خنه
الا لصوته وميعاده وملزومه

عفري هنف للضلوع وجالهن حنه
واستانست له فياض القلب ورجومه

لبى جبينه اليا ارتج الغطا كنه
برق يصب الرفيف بكبد ديمومه

ما اقول شفته وشفت البيض يتلنه
اقول شفته وشفت الشمس منجومه

ما اقول كنه جديل الليل لكنه
ليل خرعه الظلام وضيع نجومه

يا قبلة الله هكا العنقود لامنه
قام يتهجا شذى عطره ويشمومه

فيه انتهى النور ؟ لا والله بدى منه
فجر نعس بالوريد ونام بهدومه

ورد تفرعن حماره قلت اباكنه
اليا متى والحنايا منه مفطومه

فز وتطرّق رطيبه قلت ما عنّه
‏با آلمّ شيحه وريحانه وقيصومه

‏صد وتلعثم هديله في برد سنه
‏ياقوم ذا النور يوم أنكّت ياقومه

‏الله عطانيه والله يعطي الجنه
‏واليا أستجد الهوى كلٍ ومقسومه
-
كلمات : مساعد الرشيدي
الحان : محمد السليمان