Ann ale basen Waka, Pòmago |Cap-Haitien Vlog 08

Nan dat, ki te dimanch 28 jiyè a, nou te ale vizite Basen Waka ki twouve l Pòmago. Se yon basen ki nan mitan 2 mòn e pyès moun poko ka di kòman dlo a fè rive la.

Nou te prevwa fè wout la an transbòde paske l ra pou jwenn machin ki ale Pòmago akoz de eta wout la. Men kòm gwoup nou t avèl la te plen tout machin nan chofè ''Hiace'' nou te pran nan estasyon Baryè Boutèy la te aksepte mennen nou kote machin ka rive, pou apre nou fè rès wout pou rive nan basen an apye.

Lè nou rive kote ki gen pankat ki ekri Basen Waka a, nou desann machin nan , peye epi jwenn kèk moun nan zòn nan, ke nou pale ak yo , epi antann sou yon pri pou yo gide nou. Wout pou rive nan basen an pa te dous, nou te gen pou mache nan yon lagon dlo ki te plen ti krab akote l, apre sa pou nou grenpe monte yon mòn ki yon ti jan a pik epi plen wòch. Te gen bon anbyans sou wout la ak kèk ti plenyen tanzantan, pou eta wout la, dlo a...

Basen an te bèl, ak pwòp, se yon kote ki trankil anpil. Li ase fon pou sa nou te pito fe ti tranpe kò nou sou kèk wòch ki akote a. Lè nou fin pase yon bon ti tan anwo a, nou refè wout la pou ale nan plaj Chouchoubay pandan n ap tann chofè a vin cheche nou.

An gwo se te yon bèl ''excursion'' ke m te kontan patisipe ladan l.