Скачать или смотреть Jamita Minggu 27 Oktober 2024 : Job 42:1-6

Jamita Epistel Minggu XXII Trinitas
27 Oktober 2024
Job 42:1-6
“Guru dok ni Debata do saluhutna”

Huria ni Tuhanta….
Ilustrasi: Sahalak dolidoli mahasiswa teologi naik bis mulak tu hutana sian Jakarta. Topet na hundul di sampingna ima sahalak anakboru na uli. Masitandaan ma nasida hape marpariban sian parmargaon, laos padonokdonok do hutanasida. Pardalanan dua ari dua borngin sian Jakarta. Mulana i, biasa-biasa saja jala kompak nasida. Mulai ma mondokhondok nasida gabe tarpodom di Bis i. Hape ampe ma simanjujung ni anakboru i tu abara ni si dolidoli on. Ido mambahen tarsunggul si dolidoli i, tarsonggot situtu ibana. Didungoi ma asa dipadenggan parhundulna. Alai goarna pe na mondokhondok, sai mulakhulak ma songon i: Ampe simanjujung ni anakboru i tu abara ni ibana.
Gabe marloboklobok tarontokna, gabe martangiang ma ibana tu Tuhan i: “Ale Tuhan padao ma pangunjunan on.” Pigapiga hali songon i tangiangna, alai ndang mampan, gariada tahe lam sinok do anakboru i modom di abarana. Ujungna, menyerah ma si dolidoli i, ninna ma di tangiangna i: “Ale Tuhan, hupangido tu Ho asa padao ma pangunjunan sian au, alai sai songon on do na masa, antong sai saut ma lomo ni rohaM” Gabe dipasombu ibana ma ampe simanjujung ni anakboru i tu abarana….hahahaaa….

Huria ni Tuhanta….
Masa do songon i tu si Job. Menarik do tapaihutihut ketokohan ni si Job na binaritahon di Bibel on. Sahalak na mora, na burju, na dermawan, huhut na bonar roha. Boasa ma pola ingkon songgop sitaonon na borat tu ibana??? Jala mardapotdapot do sitaononna i.
Di mulana i benget do roha ni si Job manaon, gariada didok ibana do songon on: “Jahowa do na mangalehonsa, Jahowa do muse mambuatsa, pinuji ma goar ni Jahowa” (Job 1:21). Alai dung mardapotdapot sitaonon i jala lam dokdok dihilala ibana, gabe dihorhon i do mulai ro pandelean tu ibana.

Ala sikap na songon i ma gabe hona hata si Job dibahen Jahowa. Dijou Debata do si Job mempertanggung-jawabkan hatana. Didok Tuhan i tu ibana: “Ua hohosi ma gontingmu songon baoa! Ai adong do na naeng sungkunhononHu tu ho, asa ho nian mangajari Ahu” (Job 38:3, 42:4). Tung tajom jala pedas do hata i, lumobi ma ala didok Jahowa: Asa ho nian mangajari Ahu.
Ndang tartaon si Job hata ni Tuhan i. Tung ise ma na patut mangajari Tuhan i? Alanii, gabe tarjolma ma ibana, disadari ibana ma hagaleonna mangantusi pambahenan ni Debata. Ditanda ma hametmetonna di jolo ni Tuhan i. Manolsoli ma rohana di adopan ni Debata, didok ibana ma mangalusi: “Ida ma, mametmethu do ahu, tung aha ma dohononku balosna tu Ho? Huampehon nama tagonan tanganhu tu pamanganhu. Nunga sahali tarsor hatangku, ndang be ulahanku, manang dua hali pe, na so tupa be datdatanhu.” (Job 40:4-5).
Lam dipatorang Debata ma, saguru di Ibana do saluhutna di portibi on. Tunduk do sude jadijadian ni Debata tu Ibana. Na sun hinagogo jala Nasunbonar do Debata. Tangkas do dihatindanghon si Job hadirion ni Debata. Didok ibana: Di Debata do habisuhon dohot hagogoon, di Debata do panuturion dohot panimbangon (Job 12:13, 38:2, 42:3). Lapatanna: Saguru di Debata do saluhutna parngoluonta dohot sude na masa di portibi on. Allah yang mengendalikan dunia dan segala isinya.
Panuturion dohot panimbangion ni Debata do na saut di ngolunta. Lomo ni roha ni Debata do songon dia bahenonNa tu hita; jala marhuaso do Debata mangaturhon saluhut jadijadianNa. INGKON TASADARI DO I AMANG/INANG. Unang lilu rohanta disi, unang adong hita merasa hebat di adopan ni Debata.
Sanghidop mata do muba sude baheonon ni Tuhan i: Na sangap hian bahenonna gabe marlea; haru raja, malim, parhuaso, dohot angka na gogo, tompu bahenonNa gabe sisoada. Sabalikna pe, na lea hian boi do gabe sangap dibahen Debata. TIDAK ADA YANG ABADI DALAM HIDUP MANUSIA, DAN TIDAK ADA YANG KEKAL DI DALAM DUNIA.
Ido umbahen didok si Job: “Dibahen i jora ma ahu jala husolsoli dagingku hundul di bagasan orbuk dohot sirabun.” (Job 42:6). Lapatanna: Ndang be manihai si Job tu Debata manang tu angka donganna di na marsitaonon ibana; alai dipasahat ma dirina hibul tu Debata. Unang ma lomo ni rohanta na saut, alai sai saut ma lomo ni roha ni Tuhan i di ngolunta. Unang ala na menguntungkan gabe tadok sai saut ma lomo ni rohaM tu ahu, songon sarito marimpola i, tangiang ni dolidoli i ala na di ampehon anakboru i simajujungna tu abarana, gabe didok ibana: “Ale Tuhan molo songon on do na masa, sai saut ma lomo ni rohaM” Hahaaa… Sandok, saguru di Debata do tahe saluhutna!
Antong, tapangido ma gogo dohot bisuk sian Debata; asa margogo jala marbisuk hita mandalani ngolunta siganup ari. Tapangido panuturion dohot panimbangion sian Debata. Sebelum kita bertindak, mintalah pertimbangan dan pengertian dari Allah, agar Allah memberi petunjuk arah hidup kita, dan biarkanlah kehendak Tuhan terjadi dalam hidupmu. AMIN

Salam Sejahtera, Salam Sahabat, Salam Sehat.

#jamitaminggu
#job42
#roberthendrasimanjuntak
#robertsimanjuntak