ទស្សនីយភាពការសម្តែងពេញ របាំកាប់ក្របីផឹកស្រា ពីមហោស្រពសិល្បៈ បុណ្យភូមិមានជើង នៅខេត្ត​ក្រចេះ

របាំកាប់ក្របីផឹកស្រា ជាកេរមរតកបន្តវង្សត្រកូល តាំងពីយូរលង់ណាស់មកហើយរបស់បងប្អូនខ្មែរលើ មានសេសសល់រហូតមកដល់សព្វថ្ងៃនេះ នៅក្នុងភូមិភាគឦសាននៃប្រទេសកម្ពុជា។ តាមមតិអ្នកប្រាជ្ញ អ្នកសិក្សាស្រាវជ្រាវ បានឲ្យដឹងថា របាំកាប់ក្របីផឹកស្រា ឬពិធីកាប់ក្របីផឹកស្រា ជាមរតករួមគ្នារបស់ជនជាតិអំបូរ អូស្ត្រូអាស៊ីយាង ដែលបានមកតាំងទីលំនៅច្រើនពាន់ឆ្នាំមកហើយ តាមជួរភ្នំ ឬនៅលើកោះនានា នៃតំបន់អាស៊ីអាគ្នេយ៍។

របាំនេះ ក៏មានទំនាក់ទំនងយ៉ាងជ្រៅជាមួយជំនឿខ្មែរដើម ប្រហាក់ប្រហែលគ្នានឹងប្រជាជនដទៃទៀត នៃពិភពលោកដូចជា ជនជាតិនៅទ្វីបអាហ្រិ្វក ទ្វីបអាស៊ី ឬនៅប្រទេសអូស្ត្រាលីជាដើម។ តាមទម្លាប់របស់បងប្អូ​នជនជាតិខ្មែរលើមាន គ្រឹង ទំពួន ព្នង បើមានហេតុភេទមិនល្អផ្សេងៗដូចជា ជំងឺ​ដំកាត់ មានកើតរោគរាតត្បាត ឬមានឧបទ្រពចង្រៃមកយាយី ក្នុងភូមិ ស្រុក គេតែងនាំគ្នាបន់ស្រន់ សុំអង្វរអស់លោកអ្នកតាម្ចាស់ទឹកម្ចាស់ដី ដែលជាវត្ថុស័ក្កិសិទ្ធិ និងជាអាណាព្យាបាលរបស់ពួកគេ ដើម្បីឲ្យជួយបំបាត់ ឬកម្ចាត់ឧបទ្រពចង្រៃឲ្យអស់ និងនាំមកនូវសេចក្តីសុខ សុភមង្គលតរៀងទៅ។

ចំពោះរបៀបប្រារព្ធពិធី កាប់ក្របីផឹកស្រា វិញគេច្រើនជ្រើសរើសយកក្របីឡើងក ១ក្បាល មកចងដោយខ្សែពួរផ្តៅ ទៅនឹងបង្គោលធំមួយ ដែលមានការតុបតែងលំអផ្សេងៗ នៅចំកណ្តាលភូមិ។ មេភូមិ និងចាស់ទុំនៅក្នុងភូមិ នាំគ្នាដុតទានធូប សូត្រធម៌ និយាយបន់ស្រន់រួចប្រស់ទឹកលើក្បាលក្របី រួចហើយប្រជារាស្រ្តទាំងចាស់ ទាំងក្មេង ប្រុស ស្រី នាំគ្នាវាយគង ប្រគំតន្ត្រីរាំជារង្វង់មូល នៅជិតកន្លែងចងក្របី និងជាកន្លែង ដែលគេតម្រៀបពាងស្រាតូចធំជាច្រើនសម្រាប់ពិធីបុណ្យ ហើយទីបំផុតគេសម្លាប់ក្របីនោះ ដើម្បីយកឈាម និងសាច់ធ្វើជាដង្វាយដល់វត្ថុស័ក្តិសិទ្ធិ និងជាម្ហូបចំណីរួមគ្នា ក្នុងពិធីបុណ្យនោះ។

សម្តែងក្នុងព្រឹត្តិការណ៍ មហោស្រពសិល្បៈ @បុណ្យភូមិមានជើង BonnPhum On The Move ប្រារព្ធធ្វើថ្ងៃ ទី១៨ ខែវិច្ឆិកា នៅវត្តរកាកណ្តាល (បទុមវនីវណ្ណរាម) ក្រុងក្រចេះ ខេត្តក្រចេះ
សម្ដែងដោយ: សិស្សមកពី វិទ្យាល័យ ខូវ ប៊ុនស៊ុន

បង្កើតនិងរៀបចំដោយ: ភ្លើងគប់ & បុណ្យភូមិ
សហការរៀបចំដោយ: UNICEF Cambodia & Australian Government Department of Foreign Affairs and Trade
ឧបត្ថម្តដោយ: KampumEra
សហការជាមួយ: Baramey Production
គាំទ្រដោយ: Cambodian Living Arts
#បុណ្យភូមិមានជើង #ក្រចេះ​ #ទៅលេងបុណ្យភូមិនៅក្រចេះ​ #BonnPhumOnTheMove #Festival #Kratie #GoBonnPhumGoKratie #PlerngKob #BPOTM #WCD2023 #WorldChildrensDay #BonnPhumForChildren #PhumUNICEF #Kampumera #Baramey #Cambodia