Скачать или смотреть Noreg i dans og spel: 32 Nordland - Lofoten og Vesterålen

32. Nordland - Lofoten og Vesterålen
Opptak frå Landskappleiken, Oppdal 1999.
Anne Berit Heide og Sigurd Johan Heide dansar nordlandspols. Mikal Lundemo spelar fele. Slått: Polsdans frå Valberg etter Børre Holmstad.

Om dansen
Nordlandspols er frå Lofoten og Vesterålen. Folkedansinstruktøren Mali Furunes (1888-1969) frå Vestnes i Romsdalen lærde først dansen i Lofoten. Ho fekk dansen fram att i bruk då ho var reiseinstruktør i Nord-Noreg i lange perioder frå 1923 og fram til andre verdskrigen. Ho tok etter kvart òg med nokre motiv ho såg i Bø i Vesterålen. Dansen har seinare har levd i folkedansmiljøet i Nord-Noreg. Han blir vanlegvis dansa med heller fast rekkefølgje og lengde på motiva, og inneheld fleire vendingsdelar med ei- eller tohandstak, lausdans, og eitaktssnu som samdansdel. Jamvel om alle idag fører lina tilbake til Mali Furunes, fekk dansen litt ulik form i Troms og i Nordland. Skilnaden ligg mest i rekkefølgja på motiva.

Dansen har i alle fall eitt motiv som ikkje finst i andre bygdedansar i landet, det er der gut og jente dansar rundt kvarandre medan dei stadig byter tak i fingertuppane.

Om musikken
Felestillet på opptaket er nedstilt bas, g-d-a-e, men slåtten er spelt på oppstilt bas av kjelda for slåtten, Børre Holmstad (1909-1996) frå Valberg på Vestvågøya. Han spelte òg slåtten på hardingfele.