РАРИТЕТЫ ЯКУТИИ - уникальный проект Республики Саха (Якутия)

От ыйын 11-17 күннэригэр Амма улууһугар Дьокуускайдааҕы Национальнай художественнай музей үлэһиттэрэ кэлэннэр биһиги улууспут түмэллэригэр баар былыргы сэдэх маллары хаартыскаҕа түһэрэн, реставрациялаан киэҥ хабааннаах, дириҥ ис хоһоонноох научнай-чинчийэр үлэлэрин саҕалаатылар.

Бу бырайыак салайааччытынан өр сыл художественнай музей дириэктэринэн таһаарыылаахтык үлэлээбит, билигин научнай-чинчийэр отдел кылаабынай исписэлииһэ, Российскай Федерация уонна Саха Өрөспүүбүлүкэтин искусствотын үтүөлээх деятелэ Ася Львовна Габышева буолар.

- Биһиги Амма улууһун бары нэһилиэктэригэр сылдьан научнай-чинчийэр үлэни ыытыахпыт. "Раритеты Якутии" сериянан тахсар улахан альбом-кинигэбитигэр былыргы маллары таһынан нэһилиэк, түмэл историяларын, биллэр дьоннорун, баһылыктарын киллэрэбит. Түгэнинэн туһанан, Амма улууһун олохтоохторуттан өбүгэлэриттэн эһэлэриттэн, эбэлэриттэн хаалбыт күндү малларын аҕалан, бу сэдэх альбом-кинигэҕэ киллэртэрэн үйэтитэллэригэр ыҥырабыт, - диэн Ася Львовна баҕа санаатын эттэ.

Онон, Амма олохтоохторо маннык түгэни мүччү туппакка, былыргы өбүгэлэргититтэн хаалбыт дьиэ кэргэҥҥит сэдэх малларын "Былыргы Солобуода" музей комплексыгар, Партизанскай уулусса 1/1 №-дээх дьиэтигэр аҕаларга тиэтэйиҥ, сиһилии бу төлөпүөҥҥэ +7(924)595-50-80 эрийэн билсиэххитин сөп.

#раритет #раритеты #якутия #саха #музей #экспедиция #реставрация #искусство