ناصر الفراعنة | من أقوى وأفضل القصائد ( إبداع مثلثة قطرب )

ياناصر الفراعنة
وين الظعينه ظاعنة
خل العلوم مطاعنة
من دوّر الغايب لقاه

ياناقتي صبرك عليّ
واليا اعتزيت اصغي إليّ
ثم درهمي ثم زرفلي
والثالث الثالث نباه

أشملت من طول الطوى
عن حروة الوادي طوى
الخاسراللي ماطوى
كشحه وجافوا من جفاه

الاوله جوع السباع
والثانيه من البقاع
والثالثه عند الوداع
اليا عطا غيره قفاه

لالا ولا مالك لوى
وين انت من سقط اللوى
وين انت ياراع اللوا
وين انت من راع العباه

الاوله ميل اعوج
والثانيه دارٍ زراج
والثالثه تحت العجاج
يفرق غزاةٍ من غزاه

قم خلِ ممشانا خبب
بين الخباري والخبب
يمكن ورا هاك الخبب
يلقى فؤادك بابغاه

الاوله ممشاً عجل
والثانيه سكّة رمل
والثالثه منقع وبل
له مدةٍ ماجفّ ماه

اليوم ذا يوم الربوع
ممكن باهل ذيك الربوع
عن الجماعه والربوع
تلقى بهم احمر حصاه

الاوله يوم اربعه
والثانيه دار وسعه
والثالثه من لي معه
صحبه ولي قربٍ معاه

ياجاك من علمه سفر
وارتحت من طول السفر
راحه وكبرت السفر
فرحه ودسمت القناه

الاوله حلّ السؤال
والثانيه شد الرحال
والثالثه اكلٍ حلال
في بيت من يندى صخاه

والّا على بنت العصا
كّب وفي يدك العصا
إن العصا لمن عصى
اليا تعصوك العصاه

الاوله بنت الحصان
والثانيه من خيزران
والثالثه كل ابن جان
على الخطا تركض خطاه

اليوم حنّا في صفر
ناتج تنشدنا صفر
لهل العفر واهل الصفر
والحمر والسود الحماه

الاوله مفرد علم
والثانيه تعني العدم
والثالثه من النعم
صفرٍ تذاودها الرعاه

ماجا يبن حربان راح
الوقت نشوة كاس راح
مسرع يطق براح راح
من عزّه الوقت وعطاه

الاوله للذاهبين
والثانيه كرمٍ دفين
والثالثه بطن اليدين
كفعل من فارق اباه

ياكثر من عنّا كما
كسبه وهو يلقط كما
تقول ما يلقى كما
من ضيّع الصيده وراه

الاوله دفن معلوم
ولثانيه رزق محروم
والثالثه تشبيه قوم
بقوم هذا مثل ذاه

مثل الرشا فوق المحال
محال ذي حال محال
محال ان يبقى محال
حالٍ على حالٍ حلاه

الاوله حبلٍ مرن
والثانيه تأكيد كن
والثالث مالم يكن
ثابت وثبتنا حذاه

وقتٍ عثر باهل المقام
مافيه للطرقي مقام
لو بين زمزم والمقام
مافي حيٍ ماوطاه

الاوله قدرٍ رفيع
والثانيه نزل النجيع
والثالثه من كل ريع
جيناه حانين الجباه

عوايده منذ القدم
ضرب الثنادي من قدم
كم خان من ساقٍ قدم
فيه وكم حرٍ نعاه

الاوله ماضٍ خفاك
والثانيه بالوجه جاك
والثالث اللي من هناك
اوصل غريبٍ مشتهاه

كم فيه من حامي عقاب
في مثل جنحان العقاب
اسقاه من نار العقاب
كاسٍ على ماضٍ جناه

الاوله ادبار عير
والثانيه طيرٍ ييطير
والثالثه سوء المصير
من ساء فعله ذا جزاه

هو ليه ماتطوي رشاك
طوي المخلص من رشاك
لابوه حبٍ ما رشاك
خيره ولا ناشك رشاه

الاوله من الحبال
والثانيه اسم الغزال
والثالثه كما يقال
ماسر ابو زيدٍ اخاه

عقّب ردي الرابعه
واقطع عليه الرابعه
والشيخ مولى رابعه
ياكبر في عيني خطاه

الاوله قرب الهدد
والثانيه رابع عدد
والثالثه مدد مدد
بدعة مؤلهة البغاه

#ناصر_الفراعنة #ناصر_الفراعنه #المحنك_التميمي
ـــــــــــــــــــــــــــــــــــــــــــــــــــــــــــــــ
قناة التلقرام فيها كل القصائد: mu7nk
رابط قناة التلقرام : https://t.me/mu7nk

لدعم القناة ماديا : https://paypal.me/mu7nnk?locale.x=ar_EG