Скачать или смотреть UNESCO-მ ჰებრონი ნუსხაში პალესტინური კულტურული მემკვიდრეობის ძეგლის სტატუსით შეიტანა

მდინარე იორდანეს დასავლეთ სანაპიროზე მდებარე ჰებრონის ძველი ქალაქი და პატრიარქთა სამარხები UNESCO-ს ნუსხაში პალესტინური კულტურული მემკვიდრეობის ძეგლის სტატუსით შევიდა - წერს BBC.

ისრაელის მთავრობის წინააღმდეგობის მიუხედავად, გადაწყვეტილება კრაკოვში გამართული წლიური სამიტის ფარგლებში, გაეროს კულტურული კომიტეტის სხდომაზე დამტკიცებული რეზოლუციის შედეგად მიიღეს. დოკუმენტს მხარი 12-მა ადამიანმა დაუჭირა, წინააღმდეგი კი 3 იყო.

ისრაელის განათლების მინისტრმა ნაფტალი ბენეტმა UNESCO პოლიტიკურ სპეკულაციაში დაადანაშაულა.

„ისრაელი დავითის სამშობლოა. აქ დაიბადნენ ისრაელის მეფეები, ამ ტერიტორიაზე. პატრიარქთა სამარხები ისრაელის ხალხს ეკუთვნის. ამ ძეგლებისთვის პალესტინური კულტურული მემკვიდრეობის ძეგლის სტატუსის მინიჭება ისრაელისთვის შეურაცხმყოფელია“, - განაცხადა ნაფტალი ბენეტმა.

ჰებრონი სამი აბრაჰამისტული რელიგიისთვის - ქრისტიანობა, იუდაიზმი, ისლამი, ერთ-ერთ წმინდა ქალაქად არის აღიარებული, რომლის ისტორია ძვ. წელთაღრიცხვით 1300 წლიდან იწყება. მაშინ ჰებრონი ქანაანური კულტურის ცენტრი იყო. პირველი ებრაელები ჰებრონში ძვ. წელთაღრიცხვით მე-13 საუკუნეში გამოჩნდნენ. მეფე დავითმა ისრაელის დედაქალაქად სწორედ ჰებრონი გამოაცხადა. რომის იმპერიის პერიოდში ქალაქი რომის პროვინცია იუდეის ნაწილი იყო, მოგვიანებით კი, როცა რომაელებმა ებრაელები ისრაელის ტერიტორიიდან გააძევეს, პალესტინის ტერიტორიად იწოდებოდა.

ისრაელის სახელმწიფოს აღდგენის შემდეგ, მე-20 საუკუნეში ჰებრონი დასავლეთ სანაპიროზე მდებარე სადავო ტერიტორიად იქცა. ქალაქი, სადაც დღეს 166 ათასი პალესტინელი და 1200 ისრაელელი ცხოვრობს, პალესტინელებისთვის ისრაელის მიერ ოკუპირებულ ტერიტორიად განიხილება. 1997 წელს დადებული ჰებრონის ხელშეკრულების თანახმად, ქალაქი ორ ნაწილად გაიყო. პირველი ნაწილი (H1), რომელიც ჰებრონის 80% შეადგენს, პალესტინელებითაა დასახლებული, დანარჩენ 20%-ს (H2) ისრაელის ჯარი აკონტროლებს. ისინი ე.წ. H2 სექტორში ებრაელი მოსახლეობის დასაცავად განლაგდნენ. პატრიარქთა სამარხები სწორედ ისრაელის მიერ კონტროლირებად ტერიტორიაზე მდებარეობს.

პატრიარქთა სამარხები იუდაიზმში იერუსალიმის შემდეგ მეორე წმინდა ადგილია. გადმოცემის თანახმად, ივრითზე „მახპელად“ წოდებულ გამოქვაბულში აბრაამი, იაკობი, ისააკი და მათი ცოლები, - სარა, რებეკა და ლეა არიან დაკრძალულები.