Скачать или смотреть សិក្ខាសាលាស្តីពី កិច្ចសន្ទនាអន្តរជំនឿសាសនា ដើម្បីសុខដុមនីយកម្មសាសនានៅកម្ពុជា ឆ្នាំ២០២៥

ឯកឧត្តមបណ្ឌិត ចាយ បូរិន រដ្ឋមន្រ្តីក្រសួងធម្មការនិងសាសនា បានថ្លែងថា រាជរដ្ឋាភិបាលកម្ពុជា បានផ្តល់សិទ្ធិសេរីភាពពេញលេញ ក្នុងការគោរពប្រណិប័តន៍ជំនឿសាសនានានាដោយគ្មានការរើសអើង ឈរលើមូលដ្ឋាននៃការពង្រឹងសុខដុមនីយកម្មគ្រប់សាសនា។

ឯកឧត្តមបណ្ឌិត ចាយ បូរិន បានថ្លែងលើកឡើងបែបនេះ ក្នុងពិធីបើកសិក្ខាសាលាស្តីពី កិច្ចសន្ទនាអន្តរជំនឿសាសនា ដើម្បីសុខដុមនីយកម្មសាសនានៅកម្ពុជា ឆ្នាំ២០២៥ ក្រោមប្រធានបទ “សាសនិករួមគ្នារក្សានិងពង្រឹងសាមគ្គីភាពជាតិ” ដោយបានសង្កាត់ធ្ងន់លើការពង្រឹងសាមគ្គីភាពជាតិ និងជំរុញដល់ការរីកចម្រើនរួមគ្នា អភិវឌ្ឍន៍រួមគ្នា និងបំពេញឲ្យគ្នាទៅវិញទៅមក តាមរយៈវិស័យសាសនា ស្របតាមការវិវត្តន៍របស់សង្គម ដើម្បីរួមចំណែកលើកស្ទួយសុខដុមនីយកម្មក្នុងវិស័យសាសនាផង និង ចូលរួមអនុវត្តគោលនយោបាយ ផែនការយុទ្ធសាស្ត្រ និងកម្មវិធីនយោបាយរបស់រាជរដ្ឋាភិបាល ក្រោមការដឹកនាំប្រកបដោយភាពប្រាកដនិយប្រាកដនិយមនិងងម៉ាត់បំផុត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

នៅក្នុងពិធីនេះក៏មានការយាង និមន្តនិង អញ្ជើញចូលរួម ជាព្រះរាជាកិត្តិយសពីសំណាក់ សម្ដេចព្រះមហាសង្ឃរាជ សម្តេចព្រះរាជាគណៈ ព្រះថេរានុត្ថេរៈគ្រប់ព្រះអង្គ ,ឯកឧត្តមលោកជំទាវ សមាជិក សមាជិការ ព្រឹទ្ធសភា រដ្ឋសភា រាជរដ្ឋាភិបាល ថ្នាក់ដឹកនាំក្រសួងធម្មការនិងសាសនា , ថ្នាក់ដឹកនាំពាហិរសាសនា ( សាសនិកឥស្លាមសាសនា គ្រិស្តសាសនា ) ដែលប្រារព្ធធ្វើឡើងនៅសាលផ្ការំដួល នាថ្ងៃទី៤ ខែធ្នូ ឆ្នាំ២០២៥។

ឯកឧត្តម រដ្ឋមន្រ្តី បានបញ្ជាក់ថា ប្រទេស កម្ពុជា មានព្រះពុទ្ធសាសនា ឥស្លាមសាសនា គ្រិស្តសាសនា និងសាសនា ផ្សេងៗទៀត បានរស់រានមានជីវិតក្រោយថ្ងៃរំដោះ ៧មករា ឆ្នាំ១៩៧៩ ហើយសាសនាទាំងអស់នៅប្រទេសកម្ពុជា ត្រូវបានរដ្ឋធានាប្រជាពលរដ្ឋ គ្រប់រូបគោរព និងប្រតិបត្តិទៅតាមជំនឿ នៃគោលលទ្ធិសាសនារបស់ខ្លួន នីមួយៗ ប្រកបដោយសុខដុមរមនាក្នុងសង្គមខ្មែរទាំងមូល ជាមួយនឹង ភាពរីកចម្រើនគួរឱ្យកត់សម្គាល់ ។ទន្ទឹមនឹងនេះ ឯកឧត្តម សូមអំពាវនាវ ដល់ប្រជាសាសនិកគ្រប់ជំនឿ និងនិកាយសាសនា ឱ្យចេះគោរព ស្រឡាញ់ សន្តោស ឱ្យតម្លៃគ្នា និងជួយគ្នាទៅវិញទៅមកដោយឥតរើសអើង និងអាចរស់នៅជាមួយគ្នា ដោយសុខសាន្តតាំងពីថ្នាក់ជាតិ រហូតដល់កម្រិតគ្រួសារក្នុងសហគមន៍។ ទាំងនេះ គឺជាអ្វីដែលរាជរដ្ឋាភិបាល បានផ្តោតការយកចិត្តទុកដាក់ នាពេលកន្លងមក ទាំងសម្រាប់សុខមាលភាពប្រជាជនផ្ទាល់ ក៏ដូចជា សន្តិសុខ សណ្តាប់ធ្នាប់សង្គម ។

នាឱកាសសិក្ខាសាលានេះ ឯកឧត្តម រដ្ឋមន្រ្តី បានផ្តល់អនុសាសន៍គន្លឹះមួយចំនួនដូចខាងក្រោម ៖

១.សូមថ្នាក់ដឹកនាំគ្រប់សាសនាទាំងអស់ គោរពនូវអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានជំរុញឱ្យមានសុខដុមនីយកម្មសាសនានៅកម្ពុជា ប្រកបដោយសុខសន្តិភាព ។

២.សូមឱ្យបន្តចូលរួមថែរក្សាការពារ សន្តិភាព ស្ថេរភាព និងគាំទ្រ កម្មវិធីនយោបាយរបស់រាជរដ្ឋាភិបាល ក្នុងការអភិរក្សនិងការអភិវឌ្ឍ វិស័យសាសនានៅកម្ពុជាឱ្យមានភាពសុខដុមរមនាជានិរន្តរ៍ ។

៣.គោរពនិងអនុវត្តឱ្យបានម៉ឺងម៉ាត់ តាមគោលនយោបាយយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋភិបាលនីតិកាលទី៧ នៃរដ្ឋសភា ។

៤.សូមឱ្យគ្រប់ស្ថាប័នពាក់ព័ន្ធនិងមេដឹកនាំសាសនា បន្តអនុវត្ត មុខងារតួនាទី ភារកិច្ចរបស់ខ្លួន ក្នុងការអប់រំទូន្មាន និងផ្សព្វផ្សាយភាពសុចរិតនិងវឌ្ឍនភាព ដើម្បីបញ្ចៀសឱ្យបានជាដាច់ខាតនូវរាល់អធិករណ៍ ទាំងក្នុងក្របខណ្ឌនៃសាសនារបស់ខ្លួន និងជាមួយសាសនាដទៃ ។

៥.គោរពសេរីភាពខាងជំនឿដែលមានចែងក្នុងរដ្ឋធម្មនុញ្ញ នៃ ព្រះរាជាណាចក្រកម្ពុជា បង្កើនសាមគ្គីភាពរវាងគ្រប់សាសនា ដើម្បីប្រែក្លាយ សក្តានុពលសាសនា ក្នុងការចូលរួមចំណែកថែរក្សាសន្តិភាព និងការ អភិវឌ្ឍប្រកបដោយចិរភាព ៕