Скачать или смотреть Ishlerite na baba Nikolina | Hrana i Vino MKD

ИШЛЕРИТЕ НА БАБА НИКОЛИНА

ЗА ТЕСТО
200 г брашно
100 г маргарин
70 г шеќер во прав
40 г путер
1 јајце
3 лажици какао
ЗА ФИЛ
3 јајца
150 г шеќер во прав
50 г путер
50 г маргарин
2 лажици нишесте
1 ванилин шеќер
ЗА ЧОКОЛАДЕН ПРЕЛИВ
100 г чоколада за готвење
1 лажица путер

Потребно време за подготовка на овој десерт е 70–тина минути.

Почнуваме со подготовка на тестото. Во длабок сад ги ставаме брашното, маргаринот, путерот, шеќерот во прав и какаото. Јајцето го кршиме и ја додаваме жолчката во садот. Ги месиме состојките со рака додека не се соединат во тесто. На набрашнета работна маса од тестото со сукалка развлекуваме кора. Со калап од кората вадиме тркалезни форми и ги редиме во тава за печење, обложена со хартија. Ја ставаме тавата во рерна. Печеме 15 минути на 200 степени и ја вадиме од рерна.
Почнуваме со подготовка на филот. Кршиме две јајца и ги ставаме во тенџере. Третото јајце го кршиме, ја додаваме жолчката во тенџерето и матиме со миксер. Ги додаваме шеќерот во прав, густинот и ванилиниот шеќер, и матиме со миксерот додека смесата не се соедини. Го ставаме тенџерето на оган и продолжуваме да мешаме со жица. Откако кремот ќе ја добие потребната густина го тргаме тенџерето од оган. Оставаме кремот да се излади. Во сад за матење ги ставаме путерот и маргаринот. Матиме со миксер додека не станат пенести. Го додаваме изладениот крем и матиме со миксерот додека филот не се соедини. Го ставаме во слаткарска кеса.
На чинија за сервирање редиме неколку испечени форми. Со кесата на секоја форма нанесуваме фил. Преостанатите форми ги сечеме на половина.
Почнуваме со подготовка на чоколадниот прелив. Чоколадата ја кршиме на парчиња и ја ставаме во тенџере на оган. Го додаваме путерот и мешаме со лажица. Откако чоколадата и путерот ќе се растопат го тргаме тенџерето од оган. Половинките испечени форми од едната страна ги потопуваме во растопена чоколада и ги редиме на парче алуминиумска фолија. Откако чоколадата ќе се стегне со нив, забодувајќи ги во филот, ги украсуваме ишлерите. Декорираме со зашеќерени цреши и листови мента.

Со овој десерт ви предлагаме да се напиете квалитетно суво бело вино. Се служи на температура од 10-12 степени.

Добар апетит.

www.hranaivino.com.mk
www.hranaivino.tv