Скачать или смотреть កម្ពុជា និងប្រទេសមេគង្គ-ឡានឆាង ទទួលបានសមិទ្ធផលគួរឱ្យកត់សម្គាល់ក្នុងសកម្មភាពមីន

មន្ត្រីជាន់ខ្ពស់អាជ្ញាធរមីន៖ កម្ពុជា និងប្រទេសមេគង្គ-ឡានឆាង ទទួលបានសមិទ្ធផលគួរឱ្យកត់សម្គាល់ក្នុងសកម្មភាពមីន តែការគំរាមកំហែងនៅតែបន្តមាន

មន្ត្រីជាន់ខ្ពស់អាជ្ញាធរមីនកម្ពុជា បានលើកឡើងថា ប្រទេសកម្ពុជា ក៏ដូចជាបណ្ដាប្រទេសក្នុងតំបន់មេគង្គ-ឡានឆាង បានទទួលសមិទ្ធផលគួរឱ្យកត់សម្គាល់ក្នុងវិស័យសកម្មភាពមីន ក៏ប៉ុន្តែការគំរាមកំហែងដោយសារមីន និងសំណល់ជាតិផ្ទុះពីសង្គ្រាមនៅតែបន្តមាន ដែលតម្រូវឱ្យមានការពង្រឹងកិច្ចសហការដើម្បីដោះស្រាយបញ្ហានេះ។

ក្នុងពិធីបិទសិក្ខាសាលាស្ដីពីសកម្មភាពមីននៅក្នុងតំបន់មេគង្គ-ឡានឆាង នៅខេត្តសៀមរាប នាថ្ងៃទី២៩ ខែតុលា ឆ្នាំ២០២៥ ឯកឧត្តម លី បញ្ញារិទ្ធិ៍ អគ្គលេខាធិការអាជ្ញាធរមីន បានបញ្ជាក់ថា ការគំរាមកំហែងដោយសារមីន និងសំណល់ជាតិផ្ទុះពីសង្គ្រាមនៅតែបន្តមាន បើទោះបីជានៅក្នុងសកម្មភាពមីនយើងបានទទួលសមិទ្ធផលគួរជាទីកត់សម្គាល់ក្ដី។ ឯកឧត្តមក៏បានថ្លែងអំណរគុណដល់បណ្ដាប្រទេសក្នុងតំបន់មេគង្គ-ឡានឆាង និងភាគីពាក់ព័ន្ធ ដែលបានបង្ហាញឆន្ទៈក្នុងការបង្កើនកិច្ចសហប្រតិបត្តិការ រួមគ្នាឆ្ពោះទៅសម្រេចបានតំបន់មួយដែលគ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម។

សូមជម្រាបជូនថា ក្នុងវិស័យសកម្មភាពមីន កម្ពុជាបានខិតខំប្រឹងប្រែងរហូតក្លាយជាប្រទេសគំរូនិងឈានមុខគេ ក្នុងការជំរុញឱ្យមានការប្ដេជ្ញាចិត្តរួម និងលើកកម្ពស់កិច្ចសហប្រតិបត្តិការក្នុងសកម្មភាពមីនសកល។ កម្ពុជាបានដាក់ចេញនូវសេចក្ដីថ្លែងការណ៍ និងផែនការសកម្មភាពសៀមរាប-អង្គរ ២០២៥-២០២៩ ដែលជាផែនទីបង្ហាញផ្លូវសម្រាប់សកម្មភាពមីនសកល ដើម្បីលុបបំបាត់នូវទុក្ខវេទនារបស់មនុស្សជាតិបង្កឡើងដោយសារមីន។

សិក្ខាសាលានេះ គឺជាផ្នែកមួយនៃគម្រោងកិច្ចសហប្រតិបត្តិការមេគង្គ-ឡានឆាង ក្នុងសកម្មភាពមីន ដែលគាំទ្រដោយមូលនិធិពិសេសរបស់សាធារណរដ្ឋប្រជាមានិតចិន។ គោលបំណងនៃគម្រោងនេះ គឺដើម្បីលើកកម្ពស់កិច្ចសហប្រតិបត្តិការក្នុងតំបន់ និងការចែករំលែកចំណេះដឹង និងជំនាញ ក្នុងវិស័យសកម្មភាពមីន រវាងប្រទេសនានានៅក្នុងតំបន់មេគង្គ-ឡានឆាង រួមនឹងមានការចូលរួមពីអ្នកជំនាញមកពីអង្គការអន្តរជាតិ និងតំណាងស្ថាប័នជាតិដែលបម្រើការងារពាក់ព័ន្ធនឹងវិស័យសកម្មភាពមីន របស់ប្រទេសក្នុងតំបន់មេគង្គ-ឡានឆាង រួមមាន ចិន ឡាវ មីយ៉ាន់ម៉ា វៀតណាម និងកម្ពុជា៕

អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ