زامل وحال الشاعر الكبير هلال المرادي (الباهوت) في عرس الشيخ محمد مهيوب رشاد المصري

من الإرشـيف:
ــــــــــــــــــــ
الحال الذي ألقاه الشاعر العقيد / هلال أحمد المرادي
في حفل زفاف الشيخ محمد مهيوب رشاد المصري

قال المرادي عظم الله أجري
في ذي قبرته بعد عبدالقادر

وجيت كني منبعث من قبري
فارح بفرحتكم سلي الخاطر

سلام للشيخ الجليل الكبري
مولى الكُباره كابراً عن كابر

كِبر الكبار اهل الشموخ الفطري
حاشاه من كِبر الصغار الصاغر

واثني سلامي بالسلام الذكري
للهيم ذي شوفه يسر الناظر

مهيوب الأهيب بن رشاد المصري
اخــو مطـهــر وابن عــم الطاهر

صديقي الغالي وموزا ظهري
وسلاح جنبي وقت حوم العاكر

لا قلت يا عزي ومصدر فخري
فانا اكيد اعتز به وافاخر

واهدي سلامي بالمحدش جبري
لاخوانه اصحاب المقام الباهر

واولاد عمه يا سلامي حصري
خص المغيب منهم والحاضر

يا اقيال بن نسل الحسن بن عمري
ذي قاد فتح انصار عبدالناصر

والجــــد مالك قيل كندة حجري
ابن السمــيدع زنـد ابوه الجاسر

كلين له قــدره وانا لي قــدري
ولو مكاني صار بعــدي شـاغر

ولو تروني فوق كرسي مزري
حاسر وانا مثله مكسر حاسر

قد فايتي شليتها اول عمري
عاصرت كم من هيم قرنه عاصر

واعتدت شلات الثقل من صغري
من ضمن غــلمه شرها مـطـّاير

حلت بلد ما يدخله متـجــري
ما يدخل الا ضيفــها والزاير

كِنها مفــاعـل للسلاح الذري
من مغربه لا راس وادي زاهر

فيها عمد جدي وشيد وكري
ذي شاد في السحل المنيع الواعر

في قــاهــرة عزان آية فخري
ميــراث صُـبّـه ما عليها ناكــر

صُبّة علي بن سيف ريشة صدري
ميثار عــزي والجدود مواثر

بن ذي يزن كوكب مراد الدري
قيل العرب قفل اليمن والداير

كانت له القِـدمه وظلت تسري
فينا عليهم للزمان الحاضر

ما القبلي إلا ساقية من بحري
صياد موجة بحره المتزافر

صياد ابونا والزعيم الحصري
لاقيال مذحج بعد ابوه يحابر

مذحج ولد كهلان غرة دهري
ذروة سبا تاج الزمان الباهر

راس اهل يعرب والاساس الجذري
قحطان بن هود النبي بن عامر

تاريخ ما ورث لي الا فقري
ايش عاد انا باقول والا خابر

لو هو نفعني في جدودي فخري
مانا على صبار بقعا صابر

تاسع سنه وانا مفرش زوري
مثل الجمل والعام هذا العاشر

عايش زجا مثل النبات البري
متحدي الظرف الشديد القاهر

ساقي مردم بالجليد الصخري
محبوس في حبس القوي القادر

حرام لو هو بوش والا كيري
لا قُـط راسه مثل راس الطاير

ما كنت اظن ان الزمن با يحري
ويجرني مجرى الحياه العاثر

وابدي على الفندم بوجه البطري
ذي ما لقي وجهه لعيبه ساتر

اقبلت بالخفين داعس قمري
والاسئله ما فارقت لي خاطر

ايش با تقل للخالدي يا حمري ؟!
وايش با تقل للحاتمي يا مادر ؟!

بالرغم لا مهيوب ساهن خيري
ولا الحريو امسى لاجله ساهر

لا البحر با يحتاج ماء من نهري
ولا الزمن مضى لحظي شابر

شهرين وانا في عجب من امري
ادوم نفسي من عشا لا باكر

ان قمت اقفي وقعت في ظهري
وان قلت ببدي وقعت في الصابر

واليوم بكرت اصطبح من بدري
واقول يالله يا دليل الحاير

وحين قررت اني احسم امري
ناديت هاتوا عدتي باسافر

اذا دعاني صاحبي في الغدري
باجاوبه ما بنتظر لا باكر

بديـه على الصاحب تنقص سعري
ولا نذاله تصِّـــله للصــافــر

وجيت اقدم للمشايخ عذري
مانا مجابر حد ولا باجابر

واجبي العزي بباقة جوري
من ورد فوح بالعبير العاطر

وعطر من باريس شمه مغري
صادر من النوع الاصيل الفاخر

بسمه طلبته عبر موقع سري
واليوم بقطع وارده والصادر

واجبي الفندم قلص من خمري
من خمر اقل اوصافه انه نادر

جباك به واسقاك ماه السكري
انسان اقل اوصافه انه شاعر

وتقدمه لك بنت عذرا قمري
ما تبدي الا وقت ما انته سامر

ايش الحلا وايش الجمال السحري
وايش النعومه فوقها يا ساتر

خذ راحتك معها واجل شكري
لا بعد تاسع يوم والا عاشر

خذ راحتك ما عاد انا متحري
انا وغيري نعرف انك شاطر

وانك من اصحاب السلاح الجفري
ذي لا رمى صـاد الغزال النافر

ما لك ولاصحاب السلاح العبري
ذي ما ينجي صاحبه من غابر

صلاة ربي في خواتم شعري
على محمد ما يشن الماطر
_________________ـ
25/6/2018م